الأربعاء، 23 يونيو، 2010

Overqualified

ملاحظة: هذه التدوينة كتبت في أكتوبر 2009 وكان ذلك قبل أن ألتحق بكلية الظروف الخاصة

للمرة الثانية على التوالي يسحب الموظف المسئول عن طلبات التوظيف ورقة الطلب مني، وذلك لأني أحمل شهادة ماجستير فيما تتطلب الوظيفة أن يكون المتقدم من حملة البكالوريوس.
في المرة الأولى أبدت الموظفة الشابة شبه تعاطف معي ثم قالت: "خلاص أنا بمررها، بس ما اتوقع همّا يمرروها" فيما سحب الموظف الأكبر منها سنا الطلب "اللي طلعت عيني وأنا بعبيه" مني وأعطاني الورقة الثانية منه فقط، مبررا الرفض بأني overqualified للحصول على الوظيفة، أبقيت الورقة معي إلى أن وصلت باب الرئاسة في الطابق الأول ثم مزقتها وألقيت بها في سلة المهملات تحت ناظري موظف الأمن والحماية الصامت.

تذكرني كلمة "فوق المؤهل" بموقف قديم شهدته منذ سنوات حين رفضت إحدى الشركات تعيين مهندس في فرع صغير لها بحجة أنه "فوق المؤهل" المطلوب وكانت عبارتهم بالنص: "you are overqualified "

اليوم قال لي ذات الموظف بعد أن أعاد نموذج الطلب الفارغ إلى مكانه على الرف وحين عرف بأني متحصلّة على شهادة ماجستير مشيرا إلى جملة في ذيل الطلب: "أنا الموقع أدناه.. أتعهد بأن مؤهلي العلمي وجميع البيانات المذكورة صحيحة"
قال لي: "يعني بعد كل تعبك، بترضيها على حالك تكتبي بكالوريوس وانتي ماجستير؟!"
رددت قائلة: "لا والله ما برضاها، ولا بدي إياها السلام عليكم، أنا رايحة أشوف الإيفاد"

بصراحة كنت بحاجة إلى أي حجة حتى لا أقدّم الطلب، وذلك لأني في المرتين كنت أقوم بهذه الحركة بدافع من فكرة "إنو بيجيك راتب آخر الشهر" أحسن من القعدة ولكن..

لا أدري شيء في داخلي يمنعني وأعلم بأنه "غبا مركّب" ولكني أحب أن أمارس هذا التمسك بشهادتي التي أمضيت 3 سنين ونصفا (والنصف قبل الثلاث) في الحصول عليها مع أن فكرة الحصول على 400 دينار آخر الشهر تبدو فكرة معقولة جدا لمعظم من عرفتهم وأولهم المشرف على رسالتي.
الخلاصة، كما قد ترفض أحيانا لأنك لا تمتلك المؤهلات اللازمة، من الممكن  أن ترفض أيضا لأن مؤهلاتك أعلى من الحد المطلوب، شو رايك بهالبلد المضبوظه عالليبره؟!!

هناك 17 تعليقًا:

Qwaider قويدر يقول...

لا تزعلي حالك ابدا!
شوفي يا ستّي، اذا حد قلّك انّك لا تملكين المؤهّل المناسب، فكلامه يحتمل الصحة و الخطأ. لكن ان تملكي مؤهل اعلى فهو دائما على صواب، حتى و ان اخطأ!
للعلم انا اؤيّد رفض من هم اعلى تأهيلا من الوظيفة. لعدّة اسباب اهمها ان الشخص ان كان مؤهله اعلى بكثير من الوظيفة و ان كان هذا شيء يثير لعاب اصحاب العمل حتى يستغلّوه، الا انه سيصاب و من اليوم الأول بالإحباط و الشعور بعدم الرضى و قصور في الطموح. يعني من مبدأ رضينا بالهم. بالإضافة الى ان هذا الشخص سيحصل على الكثير من الفرص خارج العمل والتي سيسرع باللحاق بها بسبب مؤهلاته المرتفعة.

يعني اوّلا حرام بحق الشخص ذاته ان لا يأخذ كامل اعتباره حسب مؤّهله.

بعرف، وجهة نظري صعبة شوي، سامحوني

nissan يقول...

صباح الخير مياسي
مزبوط...ال400 دينار احسن من القعده
وهم ليش زعلانين؟وللا ناسيين حملة البكالوريوس والماجستير اللي بيشتغلوا شوفيرية تكاسي وجراسين وبياعين مع الاحترام للمذكورين والاحترام لكل من يعمل ليكسب رزقه بدل من التمسك بشكليات ومظاهر كذابه.

Palestinian Princess يقول...

في البداية أعتذر لتطفلي على مدونتك و قد وجدتها مصادفة بين مدونات صديقة لمدونتي (الصراحة صديقة صديقة صديقة مدونتي)

إستوقفني كلامك لأنه و ببساطة يمثل الحال اللتي أعيشها منذ إنهائي دراسة الماجستير قبل ثماني أشهر و أنا صراحة لا أعيش في الأردن .. و لكن يبدو أن ما يحدث لا يعد كونه مبررا للتخلص من طلب وظيفة و تقليل لعدد المتقدمين.
قد تصل الحال بان نرضى بأقل من القليل في سبيل الحصول على مرتب أخر الشهر لكني لا أزال آمل في يوم قريب "أحطه بين عينين اللي حكوا عني أوفر كواليفيد"

بدعيلك ان شاء الله تتوفقي في شغل مناسب عن قريب و ربنا لا يضيعلك تعب.

Jarat يقول...

اشتري ادماغك واضربيهم كلهم بصرمه قديمه الله لا ايردهم هما الخسرانين وانتي الكسبانه بمؤهلات فوق ولا تحت كلو واحد :)

الي اخت عمله الماستر ولمن راحت اتقدم على وظائف صار معها نفس الي صاير معك بس اللهم انهم قبلوها بالوظيفه صارو كل الي بالشركه يستكردوها ويا ريت في حد بفهم كانت تعمل كل الشغل وفي يوم فجره فيهم ومسكت حالها وروحت على البيت قعدت مع نفسها وفكرت انا ليش بسوي بحالي كل هادا لقت انها بتعطي بس ما بتاخد وهل الاشي بدال ما يطلعها لفوق بنزلها لتحت وصلت لقناعه انو الشهاده ابها وبقلتها ما بتسوي اشي وهادا الاشي عملها احباط المهم ضلت ادور على هدفها ولقت انو كل الي حوليها حمير بالعربي يعني وين مكان في حمير يعني لو راحت على مكان انزل من المؤهلات الي عندها حتلاقي حمير ولو راحت على المكان الي في مؤهلات زيها حتلاقي حمير

المهم الي بدي اوصلك اياه سدقيني يا عزيزتي انتي المفروض تعرفي قيمه ال3 اسنين الي درستيهم لنفسك مش للوظيفه وعمرك ما تيأسي لانو الفرص قدامك كتير والابواب كلها مفتوحالك ودائماالباب الي بنفتح اطرقيه الشغله كلها بدهااشويه صبر والله بيعطي كل انسان رزقتو اسعى يا عبدي وأنا أسعى معاك فانتي اتوكلي على الله وما تيأسي الفرصه الاحسن حتكون الك انشالله :)

Rasha* يقول...

وتعب الماجيستير يروح ع الفاضى؟
انا معاكى انك ما قبلتى...الشغل ده رزق..والرزق عند الله...ومفيش مرة ربنا قال نتنازل عشان يرزقنا...هو قال العبادة علينا والرزق عليه :)
وفعلاً حيبقى امر صعب ومحبط جداً...اعتقد انه حتى لو وافقتى فى الاول حييجى وقت وتضايقى...
اتمنى لك العمل المناسب المُرضى يا عزيزتى مياسى :)

فتاه من الصعيد يقول...

لا عندنا احنا الشهاده الاعلى تتعين ومفيش حد فوق المؤهل ... لاننا بلد شهادات يا اختشي

وكتير من الناس بتشتغل بوظايف لا تتطلب الدراسات العليا لكن بيقبلوهم عادي :)

عموما مبروك الشغل ... وربنا معاكي :)

تحياتي

مياسي يقول...

قويدر

بالعكس انا متفاهمه جدا مع وجهة نظرك ولولا هيك ما كنت شفتني من حالي مزعت الطلب

انا كنت اروح بس لأنو الناس حكولي روحي مش أكتر بس من جوا كنت مبسوطة انو بالمرتين عم يصير هيك

مع انو عرفت بعدين انو الجامعه كاينه تعين مؤهلات اعلى وبطلت عشان التوفير

فهيك انتا بتشوف انو احنا مش مختلفين، كمان هاد البوست قديم، هلأ لما أتطلع بحمد الله انو ما زبطت، بالاخر تاخد فلوس مش إلك مشكله عظيمه:)



نيسان

مساء الخير:)

وجهة نظرك جديده:) صراحه مش عارفه وين الغلط اذا بحملة الشهادات الكتير ولا انو ما في وظايف تكفي
بيكون هم الواحد مرات عالـ 400 ليره بس صدقي لما تكوني بشغل ما بيناسبك بتزعلي كتير!!

مياسي يقول...

Palestinian Princess

(صديقة صديقة صديقة مدونتي)
حسيتها اشي متل بنت بنت عمي او هيك شي:)

لا تطفل ولا شي بالعكس، اهلا وسهلا فيكي باول مره ودايما:)

شوفي
هلأ المشكله بالشغل اللي ما بيناسبك انو حتى لو فيه راتب كويس بيضل ما بيناسبك بعد فتره احتمال كتير تملي منو وخلاص

ما بقدر احكيلك انو ما تقبلي غير كتير وتضلي قاعده/ بس اذا اشتغلتي بشي اقل عالاقل حاولي تكوني واثقه انو حتقدري تتركيه بسهوله لما مؤهلاتك الحقيقية تلاقي مطرح

متل ما حكيت لقويدر الموضوع بالنسبه للجامعه مش مؤهلات، هو بس ترشيد انفاق مش اكتر!!

واهلا وسهلا فيكي كمان مره:)

Jarat

قصه اختك بتحصل كل يوم
فعلا السيستم ضارب وبيوصل الواحد مرات لمراحل انو بيكون لا بدو الشغل ولا ما يجزنون

يا ستي اليوم تركنا الشغل، الله اعلم شو رح يصير بعدين بس انو دايما الله بيسرها:)

مياسي يقول...

رشـا

فعلا ما في شي بيبرر مرات وانا معك الرزق على رب العالمين

بالله ادعي وكتير منها هاي، لأني مليت من الشغل غير المناسب بصراحه واخرها اني اليوم استقلت!!



فتاة من الصعيد

ههه عجبتني بلد شهادات هاي! تبرير رهيب جد:)
يا عزيزتي الواسطه بتعين الأمي مكان الوزير :)

أي شغل قصدك عليه؟ هاد بوست قديم انا حتى الكليه تركتها :)

Whisper يقول...

المهم انك انتي مرتاحه و الحمد لله لقيتي شغل حتى ولو شي مؤقت وربنا بعوضك خير

الموضوع اعتقد توفير فلوس الراتب

اللي بواجهو انا و انا بدور على شغل بخبرة 9 سنوات بالبرمجه و اني رئيسة قسم فبالعادة بحكولي احنا ما بنعترف بخبرتك القديمة و بدك تبدي براتب موظف مبتدأ يعني ما يتجاوز ال 300 :$

مياسي يقول...

Whisper

والله يا ستي لقينا شغل وتركناه امبارح ولا أسوأ من هيك!! ربنا بيعوّض

بس وضعك غريب!! يعني شو قصدهم انو خبرة القطاع العام مش معترف فيها؟ جد ناس غريبه!! بس على فكره القطاع العام كمان بيعامل اللي جايين من الخاص بنفس الطريقة أظن هيك سمعت أنا!!

يعني الشغلة متبادلة يمكن!! على كل الله يسيرلك يا ويسبر والله هالشغل بيحيّر وقليل ما تلاقي حد مرتاح!!

Haitham هيثم Al-Sheeshany الشيشاني يقول...

و الله متفق مع ما تحسّين به تماما ً، لسببيْن:
الأول: معاناتي من نفس المشكلة عند بداية تخرجي من مرحلة الماجستير.
الثاني: اضطراري لرفض بعض الطلبات لأنها مستواها "أعلى من المطلوب" و ذلك عندما عملت في مجال التوظيف و التعيين.

لست مقتنعا ً بوضع حدود عليا و دنيا كأسس للقبول؛ لكل حالة خصوصيتها و يجب النظر في ذلك عند تقديم الطلب و/أو التقدّم لأي شاغر ما.

الله بعين يا ميّاسي! دنيا غير عادلة :((

مياسي يقول...

هيثم

شكرا لتفهمك، برجع وبحكي انو هاي القصه قديمه وكنت زمان كتبت التدوينه بعدي حسيت انو هسه وقتها مناسب نوعا ما لظروف مررت بها

المهم نكون مبسوطين بخياراتنا بي للاسف مرات الحياه هي بتختارلنا وما بتترك مجال للواحد

يمكن متل متل ما حكيت انتا مافي عداله للاسف!!

jafra يقول...

لنحكي شوي بصراحة مؤلمة
انا خريجة تحاليل طبية و مختبرات و علقت كل الخبرة و الشهادة على الحيط و اشتغلت مدرسة ابتدائي
بالاول حبيت اني اشتغل بمهنتي و اكمل ماستر وراثة لكن للاسف لما اشتغلت كسلت كتير و التخصص ما كان متوفر بسهولة او الشروط كانت صعبة
المهم اني هلا عم اشتغل بشي ما الو دخل بدراشتي بس حبيتو و لو لفترة و حسيت اني عم اعطي فيه اكتر من وقفتي بالمختبر نايت شيفت لاحلل دم لواحد سكران و التاني بدو فحص ايدز

يمكن انا هيك و تفكيري هيك و لو انو العالم بتقولي غلط بس شغلة التدريس لو كانت بظروف احسن و بمرتب احسن كانت رح تكون مميزة بالنسبة الي و لغيري
و مع شهادات الكمبيوتر و القصص اللي بطور حالي فيها الناس كلهم حتى مديرتي بالمدرسة عم تقولي حرام عليكي
حاولت اغير بس ما اقتنعت اني اشتغل سكرتيرة بشركة بس تودي فاكسات و تستقبل يعني ما عم اعمل شي متل ما انا هلا عم طور و عم حسن من مستوى تعليمي حتى لو بمنطقة ضيقة و او بصف معين
يمكن غلط و عم استنى فرصة احسن لهلا ما اجت و يمكن ما رح تيجي
لهيك ما عم شجعك انك تتمسكي بالماستر اذا لقيتي شي بتلاقي حالك فيه ليش لا و ما بشجع موضوع 400 و لا القعدة هادا اذا ما في التزامات بتجبرك
و حاولي و رح تلاقي اللي بدك اياه

:)

بعرف انو القصة قديمة

مياسي يقول...

جفرا

شكرا انك شاركتينا بقصتك جد اتأثرت!!
هلأ معضلة الشهادة والشغل شكلها مستمرة عند كتير ناس
انا قابلت في لبنان مجموعة كبيرة دارسين أشياء وبيشتغلو بأشياء مغايرة تماما

على فكره انا وقت كتابة هاد البوست كنت متمسكة بشهادتي نوعا ما، وبعدين تخليت عنها وجربت بشيء ما بيخص الشهاده بس في مجالي
وشو كانت النتيجه؟ استقلت بعد مشكله كبيره!!

هلأ مش عارفه اذا اتندم على فرصة تدريس بالماستر ضيعتها ولا على الوقت اللي راح عالفاضي

حتى هلأ قدمت على شغل جديد مالو علاقه بالماستر!! ما بعرف اذا هذا الموضوع بيرد على تعليقك وحكايتك!!

ملاحظه على جنب: بحب لما تيجي وتكتبيلي تعليقات طويله:)

Rula A. يقول...

أول مره أعرف بهيك وضع.. عاد أنا كنت أفكر إنو هيك بكون الك فرص أكبر إنو انتي إلي تاخدي الوظيفة..

مياسي يقول...

Rula

لا صدقي الموضوع مش هيك
لسا اليوم سمعت قصه مشابهه عن واحد برضو "مؤهل زياده" والشركات كانو مش قادرين يدفعولو راتب ع حسب مؤهلاته!!