الاثنين، 26 يوليو، 2010

فتاة الخس على الطريقة الأردنية

ما فعلته فتاة الخس البارحة كان استثنائيا إلى حد كبير...



الفتاة رفعت لافتة تدعو إلى زيادة التخضير وهي ترتدي فستانا مصنوعا من الخس، تم إيقافها من قبل الأمن "وسحبها" على حد قول المواقع الالكترونية إلى أقرب مطعم ومن ثم جرى توقيفها في مركز الشرطة بحجة عدم الحصول على ترخيص مسبق .. إضافة إلى إحداث تجمهر كبير مما تسبب في أزمة مرورية خانقة في منطقة الدوار الأول المزدحمة أصلا..



هذا التجمهر في رأيي تسببت به صحافتنا الالكترونية الموقرة والمهنية جدا، لا أظن بأن أحدا سيطالع مواقعنا في العاشرة صباحا ليجد عنوانا يقول: "امرأة عارية ترتدي فستانا من الخس في شارع الرينبو" ولن يعمل خياله جيدا في هذه الحالة!! حتى أنا كنت لأذهب لو توفرت لي الفرصة بما أنه من غير المحتمل أن تتكرر ظاهرة "امرأة عارية مع فستان من الخس" في الأردن مجددا.

ولكن وللأسف الشديد، تبين أن الفتاة لم تكن عارية بل على العكس، اتضح أنها محجبة ونوعا ما محتشمة !!!

أجمل ما في الموضوع هو التعليقات على الخبر سواء في المواقع الالكترونية أو على تويتر!!

يتأكد لي كل يوم مدى "حس النكتة" الذي يتمتع بها شعبنا العزيز، توالت تعليقات مثل: "إيش يا خسه"، "إيش يا بطاطا"، "معلش أنا راس الخروف عالمنسف بستغنيش عنو"، "شكلو الخس جايبينو من جرش"، "هو حد طايل الخس ما هو غالي"

وأطرف تعليق كان من تويتر: 



BREAKING: Jordan's Government adds a 'Lettuce Tax' on vegetarian Jordanians & accused the Lettuce Lady of shaking the Mansaf stability in JO



هناك طبعا من أشبع الفتاة تقريعا: "مجنونة"، "هاد اللي ناقص" وهناك من دافع عنها قائلا: " على الأقل دافعت عن ما تؤمن به، وهذا يكفي بغض النظر عن اقتناعي به من عدمه"

أتساءل لو كانت فتى هل كان الهجوم سيكون بنفس الحدة؟!

أحد المواقع كتب بأنها في النهاية كانت مجرد فتاة تحمل لافتة في النهاية وكان من الممكن أن  يكون الأمن أكثر مرونة ليستغل الحدث فيروج للشارع كمنطقة سياحية دون الحاجة لكل ما حدث.

شخصيا، لا يمكنني أن أتفق مع فتاة الخس في موضوع التظاهر ذلك لأننا لسنا من "ربع" هذه الثقافة، وليس كل ما يصلح في أوروبا يصلح في بلادنا .. إلى جانب أن موضوع التخضير ومقاطعة اللحوم ومنتجات الألبان أمر غير مقبول بتاتا في ثقافتنا التي تحتفي "بالمنسف ع لحمة" وتتغنى بأن "المنسف بالجاج ما ينفع أردنيه"!!، ع أساس كل الشعب عايش عاللحمه لحد ما صابو نقرس من البطر!!

مع ذلك فإني أحترمها لأنها دافعت عن ما تؤمن به وهو أمر يفتقده المعظم إن لم يكن الكل، وثانيا لأن ظرف الأردن قد تمت مراعاته فكانت أول فتاة خس "محجبة" على حد علمي

أود أن أشكر فتاة الخس من كل قلبي لأني ضحكت كثيرا
You really made my day !!



واحد مطلع خسه من البكم!!

الصور من موقع خبرني
فيديو عرمرم الخسه عالدوار 

هناك 11 تعليقًا:

قط البكتريا يقول...

الموضوع بسيط , بس المواقع الالكترونية الي هيه عبارة عن مكاره صحفية هيه الي عملت الشوشرة
يعني فتاة عارية ؟؟؟ من وين جبتوها عارية ؟؟ تاني صارو يحكو عن الشرف شو المشكله مش فاهم لابس اوعي وعليهم خس طيب هي ناس كتتير لابسين اوعي عليها وسخ وتراب وطين وخس وملوخيه ليش هاي وقفتوها ؟؟؟
عارفين ليش ؟؟ عشان جابتهم عشارع الرينبو وطلعت لابسه :P
شوفي هاي المظاهرة الظريفة لشباب اردنين ما غطتهاش الصحافة الالكترونية القميئة

http://ar.ammannet.net/?p=54050

ملاحظه : الشباب مش يسار اجتماعي بس اليسار اتسلبط عليهم ونسبها الو

البنفسج الحزين يقول...

هههههههه
والله بنت جدعه...
انا مش شايفه اي مشكله البنت كانت محتشمه وزي الفل ومتبنيه فكرة بتدافع عنها ...
بس انا عايزة أعرف هي كانت
مخيطه بلوزة الخس دي ازاي ؟؟؟
تحياتي

Ahmad Hamdan يقول...

بالنسبة إلي القصة مو أنو البنت بتدافع عن اللي بتؤمن فيه وهاد حقها , القصة بالبطر اللي في العالم اللي زيها و الأمور التافهة اللي بطلعو عليها, شو يعني أنو كم حيوان نذبح عشان يشبع بطون جائعة , في عالم ساكنة بخيمة ليه هالبنت ما تظاهرت عشانهم ولا التفكير المخملي تبعها ما بسمحلها, في ناس نفسها تشم ريحة اللحمة أقولك بلاش ريحة اللحمة بدها تشم ريحة الخسة اللي هاي بتدافع عنها ومش قادرة.

حق الحيوان علينا ما نأذيه ونطعموا و نسقيه أما نحرم حالنا من أكلو عشان حضرتهم اللي ميتين عحقوق الحيوان ومو زعلانين عحقوق البشر فهاي شي صراحة لا أقبلو.

بس منيح أنها تظاهرت في مكان زي شارع الرينبو ولا لو في أماكن أخرى كان الله أعلم ما سوو منها سيخ كباب و أعذريني على الإطالة

sozan يقول...

سبقتيني!!
كنت بتابع الاخبار حول فتاة الخس والصور التي تم نشرها على مواقع تدعي انها تتمتع بمصداقيه وكانت الصور المحطوطه مقرفه ومثيره!!
التخلف الموجود عنا نابع من تخلف اصحاب الشهادات من المفروض ان يكونوا اصحاب عقول لكن للاسف العقل ضايع والفهم يبعت الله
انا بصراحه احترمت الفتاة واعتبرت التصرف ضدها بهاي الطريقه مغرض هي عملت شي آمنت فيه وبنظري كانت ارجل من كل اللي تجمع حولها لانهم جاءوا لغاية الفرجه ببلاش بس فقستهم :)

فتاه من الصعيد يقول...

ما البنت محتشمه اهو.... سبحان الله

بس عموما انا موش بحب الخس :)

تحياتي

Dr.Mohammed يقول...

عن الجد المواقع الالكترونية شوهت الصورة تماما ، يعني انا شفت بموقع من هالمواقع اياهم ، حاطيين صورة لوحده عن جد عارية و لابسة بس خس عليها ، طبعا اللي شاف الصورة و قرأ الخبر أكيد اخذ مغادرة ساعتين عشان يروح "يشتري خس" !!!

jafra يقول...

كيفك مياسي
الخبر نزل بالمواقع بهاي الطريقة
فتاة عارية الا من الخس في شارع الرينبو و اللي قرا العنوان ركض هناك من غير ما يكمل و طلعت البنت مسترة فهيك بتكون ضحكت على العالم
اذا مواقعنا و محررين و صحافة عبرت عن الموضوع بصفاقة ؟؟؟ كيف الشباب تبعون الشوارع اللي بقراوا " لا تقربوا الصلاة " و خلص بكفي .....\

فكرة البنت حلوة و الاتجاه هادا عالمي مش بس لانو اذية الحيوانات و هاي القصص لا لانهم اكتشفوا انو هاي المخلفات تبعت المسالخ لما نتخلص منها بالطمر بتضر بالارض و التربة و غيروا كتير و انها بتخلي البكتيريا الضارة تتكاثر بشكل مضاعف لهيك التوجه للاغذية النباتية
و كمان الصحة و الامراض العصرية
الضغط
السكر
الكليسترول
و هاي كلها سببها تناول الدهون اللي بتقضي عليها الياف النباتات
بس هي للاسف " مع انها حرة " اختارت المكان الخطا عند الناس الغلط
هم ما اجو الا ليشوفوا اللي تحت الخس
لانهم مش اكتر من خرفان
عن جد ردة فعل مقرفة

Whisper يقول...

ول ول ول كل هاد صاير وانا مش عارفه

معظم اللي راحو و اجتمعو هناك ما قرأو كل الخبر, همه وصلو على كلمة عاريه دورو على العنوان اللي موجوده فيه و طيران هناك, يعني للاسف هالمسكينه مش بس صار اللي صار فيها لأ و نص هالعالم ما فهمت ليش هي عملت هيك :$

الله يستر ما نسمع بكره بجريمه شرف...لانه ابن عم خالة ابوها شك انها كانت عاريه طبعا بدون ما يعرف الموضوع بالزبط....بتكون كملت :(

حياة تستحق الانقاذ يقول...

عنججججد مش عارفة شو احكي
انتهت المواضيع ولا القضايا ولا اشييي لنوصل لمرحلة انه نلاحق كلنا بنت طلع معها تعبر عن اللي براسها بهالطريقة لا والاحلى انه نحن نحترف التبهير والتطوير والتغيير في الحقائق
محتاجين شوية وعي
مع هيك كتييير ضحكت وانا بقرا البوست
يسلمو يا مياسي

مثلية فقط يقول...

بشوف في الحدائق العامة بالإمارات عائلات كاملة كبار و أطفال يجلسون للأكل كالحيوانات ثم يغادرون تاركين ورائهم مزابل , شباب ينظفون سياراتهم برمي مخلفاتهم في الشارع , اشخاص يشترون الشقق و الأثاث الفاخر دون أن يفكروا في وضع نبتة واحدة داخل بيوتهم ...ليس هنالك احترام للطبيعة و لا ثقافة بيئية و ربما أكثر ما يشغل العرب هو الأكل و ارتفع سعر اللحم و لا أدري كيف خطر لهذه البنت المسكينة أن تحاول لفت الأنظار إلى موضوع غير مدرج في ثقافة الناس ...

Rula A. يقول...

إبصر شو وضعها هلأ.. عجبني تعليق وسبر..