حتّى لا أنسى

أيّـام دراستي بفترة البكالوريوس؛ كنت مقتنعه أن الدكاترة "ما بيعملو اللي عليهم كلّه"
كنت دايما أسمع عن انجازات "الدّكتور فلان" وعن "أبحاث علاّن" وبالمقابل كان مستوى التدريس سيء جدا
كنت بحس أنهم بيشرحوا بس للي فاهم عليهم "النخبة ذوي الدماء الزرقاء" مش لكل "الشعب" زي ما هو مفروض
كنت دايما بستنى "فرصة" أثبت فيها حالي وللأسف قليلا ما جاءت!!!
كانت الامتحانات دايما من "سنة زبّود" يعني من "سنة جد جدّي الله يرحم ترابه"؛ حتّى الامتحان اللي صار له 50 سنه ما حد كان يعرف كيف بينحلّ!!!
كنت بكره المحاضرات تاعت الدكتور "المهرّج"؛ كان يبدو كأحد الممثلين؛ بجسمه الجميل و عينيه الملونتين وشعره الأشيب -حقيقة هذا وليس استهزاء- كان يضيع وقت المحاضره في رسم العلاقة بين المحورين والحديث عن "الحفرة" اللي حفروها لأساسات بيته الجديد!!!
كنت دايمن بحس كل شي صعب ومستحيل وكانت المغامره بالنسبه الي - مستحيلة بأي شيء!!!
كنت بحس طلبات الدكاتره - تعجيزيه - هم في وادي وإحنا في وادي ثاني تماما
كنت بحس في فجوة كبيرة بين اللي هم بيشرحوه في الكتب وبين الحكي اللي بيصير برّه؛ في مجال الشغل يعني
كان نفسي دايما "العلامات" تكون كويسة؛ بس منيحة؛ أنو أحصّل الثمانين من غير ما عيني تطلع أو أحس الحياة دمار أو ألعن "حرم الفاينل" لأنه اجى تعجيزي!!
كنت بتمنى الدكتور يعطينا بس فرصة صغيرة نتواصل فيها معاه كإنسان مش كإله؛ أنا فعلا كنت بشوف دكاترتنا "أنصاف آلهه" ممنوع تراجعهم أو تناقشهم أو تحكي معاهم زياده
كنت بتمنى يخففوا عنا "التعجيز" شوي ويفهمونا أكتر شو بيصير بعالم "الكورس أو المادّه"
كان نفسي سكرتيرة قسمنا تكون زي العالم والناس وترد عليك من غير "قرف ونفتره" دونا عن باقي أقسام الكلية
كان نفسي "أطخ" الدكتور اللي عوّفني أنا وصاحبتي عمرنا بتقرير التدريب؛ وشبّعنا حكي عن "التقرير" الصح وكيف أنو مش لازم يكون منسوخ ولا منقول؛ وبالآخر كل الشعب جاب "تسعينات" واحنا حطلنا بأول التمانين؛ أعلى من "فادي" الطنط بشي علامتين!!! ولما إجى بلجنة المناقشة عمل نفس الحركة وخسفنا!!!
كان نفسي يكونو شوي أرحم معانا ؛ كان نفسي يكون لي شوية "حظ" زي هالعالم بها الكلية!!!

كل شي طلعوه علينا "عامص"؛ وكرهونا حالنا؛ مش عارفه إذا أحكي الله يسامحهم أو لأ

طبعا كل الحكي السّابق كان إله استثناءات بس للأسف قليلة جدا؛ بس الواحد بيحاول يكون موضوعي شوي

كمان لازم أشكرهم الدكاتره؛ لأنو من "جورهم" في البكالوريوس؛ لما رحت عالماستر؛ ما عانيتش من فارق ضغط كبير زي باقي الناس؛ من كتر القرف اللي كنت شايفته كانت المسائل بالنسبه الي تمام تمام!!!

الماستر هلأ؛ معوفني حالي رسمي؛ ومدمر الذاكره والاجتماعيّات والابداع وملكة الكتابة وكل شي!!!

هاي الكتابه بس عشان أذكّر حالي بعدين؛ وما أصيرش "نص إله"؛ مع أنه هيك شي أكيد حيكون تحصيل حاصل؛ ويا ريت اللي مرّ علينا ما نمارسهوش على غيرنا ونطلع عليهم عقدنا السودا

وبالآخر؛ كان الله بالعون!!!