الثلاثاء، 10 مارس، 2009

حتّى لا أنسى


أيّـام دراستي بفترة البكالوريوس؛ كنت مقتنعه أن الدكاترة "ما بيعملو اللي عليهم كلّه"
كنت دايما أسمع عن انجازات "الدّكتور فلان" وعن "أبحاث علاّن" وبالمقابل كان مستوى التدريس سيء جدا
كنت بحس أنهم بيشرحوا بس للي فاهم عليهم "النخبة ذوي الدماء الزرقاء" مش لكل "الشعب" زي ما هو مفروض
كنت دايما بستنى "فرصة" أثبت فيها حالي وللأسف قليلا ما جاءت!!!
كانت الامتحانات دايما من "سنة زبّود" يعني من "سنة جد جدّي الله يرحم ترابه"؛ حتّى الامتحان اللي صار له 50 سنه ما حد كان يعرف كيف بينحلّ!!!
كنت بكره المحاضرات تاعت الدكتور "المهرّج"؛ كان يبدو كأحد الممثلين؛ بجسمه الجميل و عينيه الملونتين وشعره الأشيب -حقيقة هذا وليس استهزاء- كان يضيع وقت المحاضره في رسم العلاقة بين المحورين والحديث عن "الحفرة" اللي حفروها لأساسات بيته الجديد!!!
كنت دايمن بحس كل شي صعب ومستحيل وكانت المغامره بالنسبه الي - مستحيلة بأي شيء!!!
كنت بحس طلبات الدكاتره - تعجيزيه - هم في وادي وإحنا في وادي ثاني تماما
كنت بحس في فجوة كبيرة بين اللي هم بيشرحوه في الكتب وبين الحكي اللي بيصير برّه؛ في مجال الشغل يعني
كان نفسي دايما "العلامات" تكون كويسة؛ بس منيحة؛ أنو أحصّل الثمانين من غير ما عيني تطلع أو أحس الحياة دمار أو ألعن "حرم الفاينل" لأنه اجى تعجيزي!!
كنت بتمنى الدكتور يعطينا بس فرصة صغيرة نتواصل فيها معاه كإنسان مش كإله؛ أنا فعلا كنت بشوف دكاترتنا "أنصاف آلهه" ممنوع تراجعهم أو تناقشهم أو تحكي معاهم زياده
كنت بتمنى يخففوا عنا "التعجيز" شوي ويفهمونا أكتر شو بيصير بعالم "الكورس أو المادّه"
كان نفسي سكرتيرة قسمنا تكون زي العالم والناس وترد عليك من غير "قرف ونفتره" دونا عن باقي أقسام الكلية
كان نفسي "أطخ" الدكتور اللي عوّفني أنا وصاحبتي عمرنا بتقرير التدريب؛ وشبّعنا حكي عن "التقرير" الصح وكيف أنو مش لازم يكون منسوخ ولا منقول؛ وبالآخر كل الشعب جاب "تسعينات" واحنا حطلنا بأول التمانين؛ أعلى من "فادي" الطنط بشي علامتين!!! ولما إجى بلجنة المناقشة عمل نفس الحركة وخسفنا!!!
كان نفسي يكونو شوي أرحم معانا ؛ كان نفسي يكون لي شوية "حظ" زي هالعالم بها الكلية!!!

كل شي طلعوه علينا "عامص"؛ وكرهونا حالنا؛ مش عارفه إذا أحكي الله يسامحهم أو لأ

طبعا كل الحكي السّابق كان إله استثناءات بس للأسف قليلة جدا؛ بس الواحد بيحاول يكون موضوعي شوي

كمان لازم أشكرهم الدكاتره؛ لأنو من "جورهم" في البكالوريوس؛ لما رحت عالماستر؛ ما عانيتش من فارق ضغط كبير زي باقي الناس؛ من كتر القرف اللي كنت شايفته كانت المسائل بالنسبه الي تمام تمام!!!

الماستر هلأ؛ معوفني حالي رسمي؛ ومدمر الذاكره والاجتماعيّات والابداع وملكة الكتابة وكل شي!!!

هاي الكتابه بس عشان أذكّر حالي بعدين؛ وما أصيرش "نص إله"؛ مع أنه هيك شي أكيد حيكون تحصيل حاصل؛ ويا ريت اللي مرّ علينا ما نمارسهوش على غيرنا ونطلع عليهم عقدنا السودا

وبالآخر؛ كان الله بالعون!!!

هناك 40 تعليقًا:

77Math. يقول...

لأ انت أكيد حتكوني دكتورة بتجنن !

زي ما أنيس منصور كان بيحكي إن الطلبة بتيجي تحضر له لأنه كان بيشرح الفلسفة بشكل ممكن يفهمه أي واحد، مع إنه بيقول عمره ما أحد من الطلاب سأله عن كتاب أو مسرحية ..

بحس إن معاناة الطلبة واحدة في كل الأجيال، شكاويهم من الدكاترة أو العكس متكررة ..


يعني لو ما اشتكينا نفس الشكوى حيكون الكون مش الكون !!

لازم توحيد القوى وتدشين الجهود لأجل رفع راية الشكاوى الأزلية !

وياما فـ الحبس مظاليم .. ويا ما فـ الكليّة برضه..

وياما خارجها مظاليم بحملهم شهادات لعلم لا يعرفون عنه شيئًا..

مش بقول لك .. لازم نفس الشكوى نكررها؟

هذه الأوطان ليست لنا !

eNAS يقول...

:D
مياسي سامحيني ... وانا أقرأ كنت بضحك .. بس مش عارفه ليش
D:

امممممم ... بوافقك 30% والباقي مخالفات

اكيد انو كل مكان وزمان اله شخوصة ... يمكن اللي بدرسونا هسا .. عانو من قسوة الشريرين ... مشان هيك راحمينا هالايام شوي

يعني تقريبا هاي السنة الثالثة الي ومش ضايلي غير صيفي ونص الاول .. بس الدكتاتورية اللي بتحكي عنها ... وااللي حكيتيها بنفسك .. هي أغلبها لمصلحة الطالب بالاخر .. يعني شو في بين الدكتور او الاستاذ والمفعوس الطالب ,مشان يحط ضدة أو يشيب شعر راسة ... المشكلة هي هي .. انو الطلاب بحبو يتدللو
D:
وما في حد بحب يتعب .. وكمان ما بدو اي شي يجي على الجاهز .. مشان ما يحكو .. هاااا شوفو فلان .. والله شو وين ما يروح الو واسطة :زي فادي الطنط:P:
الله وكيلك الجامعة صايرة كلها طنطات واشي بقرف .. انسي الجنس الناعم طبعا


بس جد .. مغامرات بتجننD:
شكلك سهرانة للصبح لانه هاد مش من زمان مكتوب وهلا الساعة ستة وربع الصبح

واليوم من أحلى ايام اذار من حيث الجو
يا رب يكون يومك وايامنا منيحة وحلوة
:)

وسلامووو احلى مياسي^_^

:X
بدي خبرك بلشنا فيرست من الاحد الجاي
:'(
هاا شايفة شو بحبونا بحبو يتفقدو مستوانا بالامتحانات التكنووارية ;)

Qwaider قويدر يقول...

الله يسامحك... هلق حرام عليكي .. مش كل الدكاترة هيك..
يالله بالتوفيق انشالله
والله ما كنت عارف انّو فادي طنط! و لا انّه كان معك بالجامعة.. يالله معلش هو شب مقطقط بس :)

Whisper يقول...

انا معك 100%
للاسف كانو دكاترتنا زي ما بتحكي بالزبط
ودكتور ال OS كان يبني بيت جديد وكل يوم يحكيلنا وين وصلو و كنا نتمنى الامتحانات تكون عن البنايه تاعته لانا بنعرف فيها اكتر من الماده :$

اما دكتور ال C++ الله يسهل عليه كان يقعد عالطاوله و يقرأ الماده قرأه وكان نفسنا نطبق ولو لوووب زغنوغه عالجهاز :"(

غير ان معظمهم كانو يحبطونا خصوصا بسنه رابعه انه مش تفكرو حالكم صرتو اشي انتو بكالوريوس واحنا دكااااتتتتترررره

انا حاليا بشتغل باوراكل واللي هي دوره اخدتها بسنه رابعه علشان مشروع التخرج :$ ما بنكر ان اكيد استفدت من الدراسه بس برضه بتضلها غير عن الاشي الفعلي اللي بنستخدمه بالشغل.

اما بالنسبه للذاكره فبطمنك مش من الماستر...كلنا بنعاني من هالمشكله زه8ايمر بعيد عنك :)

و برضه بطمنك...راح تكوني اكتر دكتوره بتسكر شعبتها بسرعه وقت التسجيل لان الكل بدو ياخد المواد عندك :)

77Math. يقول...

بصراحة احنا دكاترتنا ملائكة !

مش كلهم يعني ..

في قليل جدا جدا شياطين !

والأغلب السواد الأعظم .. بني آدمين :D


بس بتكلم عن القسم بتاعي تحديدًا .. يعني كسر من مائة من الكلّ !


تحياتي

غير معرف يقول...

بصراحة الطلاب كمان بيزيدوها شويتين.
يعني انا درست او اعطيت محاضرات في جامعات وطلبة جامعيين. لا ثقافة ولا متابعة ولا هم.
في اليرموك سألت طلاب الاعلام عن اسم وزير الاعلام السابق، قبل التعديل، طلع معهم اسمه عيد الفايز. بربك بعد هيك جواب من طلاب صحافة بظل في نفس للتدريس. طيب بلاش يسألوا عن كتاب او مسرحية على رأي انيس منصور. اقلها يحضروا دروسهم..
دمتي
محمد عمر

Sherif يقول...

فى الحقيقة .. سوف ننسى ..

ليس لتعالى او غرور او تقمص نصف اله لاسمح الله ..

بل لاننا سوف نرى الامور من منظور آخر تماما .. بدليل ان كل الدكاترة مع تعاقب الاجيال لايتغيرون كثيرا ..

وقديما كانوا يطلبون منا فى اعدادى كلية ان نقيس صالة بابرة الخياطة .. وبمنتهى الجدية .. والا عوقبنا عقابا شديدا .. وكنا نعتبر ذلك سخفا وتحقيرا زائد عن الحد ..

وحين كبرنا واصبحنا ضباطا .. فهمنا ان النظام العسكرى يقوم فلسفيا على قاعدةالقهر الفكرى .. إذ انه من غير المعقول بعد ان تعطى امرا ان تقنع من هو امامك وخصوصا فى وقت الحرب .. مهما بدا الأمر غير معقول ..

فليس المطلوب ان تفهم كل شئ .. على حساب ثقتك المطلقة فيمن يعطى الأمر ..

صحيح ستصبحين دكتورة جميلة ناجحة .. لكنك ستقتنعى بمعظم ما يفعلون

مياسي يقول...

77Math
يمكن قصدك الدكتوره اللي مش داريه عن حالها بيجوز هيك أزبط!!!

هي الشكوى هاي أزليه؛ زي حكاية الدجاجة والبيضة تماما يعني على مين الحق؟ صعب تعرفي!!

يعني اختصرت بكلمه واحده: نهاجر وخليهم يدبروا حالهم مالنا خص احنا:)


eNAS
الحمدلله اللي شفتك هون وبتضحكي كمان:)
يعني يا نوسا كل زمن إلو دولة ورجال كمان أنا كنت بالبكالوريوس من شي 8 سنين- ختياره أنا يعني:)

برضو هاي مشاهدات واقعيه جدا؛ يعني كل واحد بيحكي عن تجربته؛ وهيك كانت تجربتي

هلأ أنا معك انو الطلاب بتحبش تغلب حالها وانو هم مش دايمن ملائكه؛ بس زي ما حكيت بالأول ما حدش عنده استعداد يغلّب حاله عليكي

وما تقارنيش الهندسه بالسي إس رجاء -مع احترامي التام الكم- الهندسه متشعبه اكتر

كل يوم أنا سهرانه للصبح:( وآذار بسطني بس يوم الجمعه الماضيه وبعدين غدر في؛ صار كلو غبره:)

ادرسي منيح اجاكي الريح- بكره الامتحانات:)

مياسي يقول...

قـويدر
بعرف مش كلهم هيك؛ هلأ شكله ما حد قرأ آخر ملاحظه تاعت الاستثناءات!! أنا كنت بحكي عن تجربتي أنا ومش ضروري نعممها أكيد بس كليتي كانت معروفه قديش هي صعبه

لا اوعك؛ رجاء ما تفتن لفادي!! مش ناقصني دخلك:)

الله يسلمك:)

همسه

هاي في حد من "ربعنا" بيتضامن معي؛ الحمدلله!!!

ذكرتيني بوحده صاحبتي عادت ماده شي 3 مرات؛ كانت بدها تطالب الدكتور بغرفه في بيته الجديد قال هادول من مصاريها:)
برأيي الدراسه بتعلمك "منهجية التفكير" خصوصا بالهندسه؛ بس انا مقتنعه انو الدورات احسن من مليون شهاده؛ العملي بينفعك أكتر صراحه

بكره بشوف إذا ربنا كرمني ودرست طلاب وبخبركم عن بلاويي أنا كمان:)

مياسي يقول...

77Math
أيوه بتزبطي الوضع انتي آه؟

يا ستي دايمن في دكاتره مناح وكويسين؛ بس يعني للأسف السيئه بتعم والحسنه بتخص زي ما بيقولوا

سيّد محمّد

أنا معك انو الطلاب بيزيدوها والاستهتار "أوفر"
بس أنا كنت بحكي عن العالم اللي بيحاولوا وما بيزبط معاهم؛ يعني لما تتعب وما تلاقي زي ما بدك

بعدين احنا طلاب هندسه؛ يعني اللي بيقروا كتب برانيه يا دوب ينعدوا عالاصابع؛ والهندسه بحد ذاتها تعجيز

المشكله شوي متبادله؛ يعني الدكاتره همهم الترفيع الا قله؛ والقلّه اللي بتفهم بتتحارب على فكره وبظن انك في مدونه سابقه حكيت عن دكاترة الجامعات عنا في البلد؛ والطلاب همهم هالكرتونه وخلاص؛ لأنو المجتمع فهمهم انو المهم تخلص التوجيهي وبالجامعه ضل قد ما بدك-غرّز يعني:)

بتعرف سيّد محمد العلم عنا ما لو فايده؛ ما بيهذّب بس هو عباره عن وسيله للترفع الوظيفي فقط

تحيّاتي لك

مياسي يقول...

شريف

وأنا هيك رأيي انو التغيير حاصل حاصل؛ وانا ما حكيت غير هيك

هاي بس محاولة من باب أضعف الايمان؛ انو نحاول نتذكر شو كنا زمان؛ فيك تعتبرها محاولة لتحري الإنصاف من جهتي

أكيد لما المكان اللي بنتطلع منه يتغير بنتغير معاه احنا؛ زي لما اتحول من بنت لأم مثلا بصير أمارس نفس الاشياء اللي أهلي مارسوها علي وبقتنع فيها جدا كمان

القصه اللي حكيتها كتير عجبتني؛ مبدأ نفّذ ثم ناقش مش هيك؟

maroo يقول...

هاهاهاها والله انك نهفة يا بنتي ..
انا معاكي على طول الخط و يمكن حتى اكتر لأنه معظم الدكاترة اللي درسوني عنجد مـــــــن الاخــــر .. والله طلعوي براسي حديقة طيور يابنت الحلال و يا ريت كانوا يقدروا تعبنا او يعطونا علامات !!!
بتصدقي دكتور محاسنة الله يزكروا بالخير كان يدرسنا مايكروبيولوجي اول يوم فات علينا (القاعة فيها حوالي 120 طالب) اول كلمة قالها قبل السلام حتى "انتوا سبب انحدار الأمة " !!!!! والله العظيم وقتها من حم الصدمة غميت من الضحك !!! انو يرحم حالوا ..الله يزكرهم بالخير .. و برضوا الا ما يطلعلك دكتور هيك ابن حلال مصفى يخفف عنك الصورة المأساوية اللي رسمها غيرو .. و الحياة بتمشيييييييي
موفقة :)

مياسي يقول...

مارو

شوفتي كيف؟ الله يسعدك:) هاي في حد زيي:)

هاي قصه دكتوركم من الآخر؛ على أساس هم اللي رجعوا فلسطين؛ نص النكبات كانت على أيامهم الحلوه:)

يلا الله يرحم هاد بس تفريغ ضروري؛ بتعرفي لما تيجي سيرة كليتنا بنمغص!!! بكون بس بدي أمشي السيره:)

تسلمي عيني:)

Che يقول...

و النبى يا مياسى يا اختى ماتخلنيش افتح فى الكلام عن الدكاترة لانى معبى منهم
على العموم البوست الجاى بتاعى هيكون عن شويه منهم ... يا رب يعجبك

مياسي يقول...

Che

مين اللي مش معبى منهم؟
انت ملك في الكتابه عن الدكاتره والكليات
متذكر كل شي بالميللي اسم الله عليك:)
بستنى البوست القادم بفارغ الصبر وأكيد حيعجبني

ٌرحيـــــــــــــــــــــــل يقول...

خخخخ ذكرتيني بأيام الجامعة والدراسة...

ماشالله عليج، عقبال الدكتوراة :)

هدي أعصاااااابج وخذي المسائل وحده وحده وسوي اللي عليج وخلي الباقي على الله... أنا شو كنت أسوي، كنت أطنش الدكاترة و أذاكر بنفسي و أحل المسائل بنفسي والدكتور اللي ما يعجبني أروح لغيره وأسأله...

انتي كول و قوية و عقبال ما نفرح بالشهادة!

Ashwaq يقول...

و الله يا مياسي يعني أنا لسه سنه أولى في الجامعه بس يعني مر عليّ تشكيلة من الدكاترة .. و مشان أكون موضوعية متل ما بتقولي في منهم العاطل كتييييييير كتيير عاطل و في منهم الرائع, اكتشفت من خلال الملاحظة إنو الشغلة مجرد علاقة الطالب بالدكتور !! فقط لا غير يعني الواحد بيقدر يقلب الدكتور يا لصالحه يا لضده !!

أنا مشكلتي الفصل الأول كانت إني ما بقدر أجامل أو إني أجبر حالي أطيق حدا و هو مش نازلي من زور !! بس هيك الأمور ما راح تمشي أبدا حسب ما جربت للأسف !! أخخخخخخخ أخخخخ صدقي كمان أيام المدرسة كنت أعاني من بعض المعلمات,يلي من النوعية اللي بتحب تعمل صداقات مع طالبات بيجو قد بناتها !!!

jumana يقول...

lah yah lah
allah ekon m3kon, 3njad sar 3nde fekra 3n dakatret el ordon :D

Tawle balekkkk
bs lei ma fekon t7ko m3on wala tna2shohon ??? lei??

m32oleeeeee?? shu hadd!!!!! 3m tmza7i ma!??

reem يقول...

عزيزتي مياسي
والله نفس الي بصير معي بجد في الماجستير الصحيح مش فاكره البكالوريس المهم فعلا هالدكاتره مش كلهم للامانه متحيزين والله وكيلك ليل نهار انا وزميلاتي بسيرة هالدكتور ليه ؟؟ لان العلامه عنده والتعامل حسب وجهة نظره بالبني ادم يعني رايه هو مقياس العلامه انسي لا امتحانات ولا ابحاث بنات مما بيفهموا اشي بس بياخدوا علامات عاليه وما بتعبوا معاه احنا مجموعه مش معبين مزاجه يا دوب ينجحنا
المهم بعد ما اكلت مقلب اول ماده عنده وانهلكت دراسه وتحضير وبحث وما حصلت شي محرز في الماده الثانيه محسوبتك ما فتحتلوا دوسيه او كتاب وتصدقي اخدت اعلى من الماده الاولى ... شي بضحك بس هالمره ما زعلت للامانه لاني يا دوب استحق هالنتيجه ههه
خليها على الله يا بنتي وسيبك من كل هالغم الي ما تخلصي بخير انا وانتي ونطلع عينين الطلاب الي حندرسهم بجوز يكونوا اولادهم للدكاتره وشوفي على الي حيحصل
دمتي بحب

eNAS يقول...

D:
انا مش سي اس >>>>>سي أأي أس P:

يمكن معك حق ... بس المهم الواحد يكون مبسوط بتخصصة والاهم انو ما في شي يقدر يوقفه من انه يتابع المجال اللي دخلة .. بغظ النظر عن البيئة واللي حوليه

وكمان شغلة ... انتي جربتي الجامعتين ... يعني غير الزمان
المكان صفى الاهم
يلا قلبت دندرة ... الصراع اللي عم بشوفو والي عمري ما خضت فيه
بين طلاب الحاسوب و هـ.حاسوب
واللي مرات جد بضحك

بس التخصص ما دخل
يعني هلا الدكاترة اللي بتحكي عنهم اكيد درسو هون وهناك ...وطبيعة المادة شو من كانت بتعتمد على طريقة القائها من قبل المدرس .. يعني شو من كان تربة ومياه وابيار ... ولا طب معماري ... بالاول وبالاخر بتعتمد على اسولب الدكتور .. نفسيتة ... نضج الطالب .. وانو يعرف مصلحتة هو الاهم

بس اكيد في استثناءات .. ومن خلال تجربتي الفسفوسة .. ما شفتها

بس ان شاء الله بعيش وبشوف :)

سوزان يقول...

من احلى البوستات ميسو
هو الدكاتره تبعينا جايين من المريج اللي جنب لبتون مش اللي بعمان
لما حكيت لزوجي عن ذكرياتي مع الدكاتره المش محترمين كان قاعد يضحك علي ويحكي هاد بيفسر كل شي ناظر حضرة جنابه
أأأأأأأأأأأأااااخ يا ميسو ليش قلبتي المواجع انا يمكن تكون هاي احد الاسباب اللي مصبرتني على العيشه هون هو انه اولادي رح يتعلموا في جامعات انوجدت للتعليم مش للتعذيب

EmY يقول...

انا عندي كره للدراسه في الجامعه
بحس بحالة ملل و زهق غريبه
و الدكاتره معمهم يستاهلوا الاعدام في ميدان عام بس ميزتهم انهم بيشجعوا علي النوم من كتر ما هم مملين
نادرآ لما افهم كلام دكتور في محاضره

اوعي تعملي زيهم

مياسي يقول...

رحيـــل

الله يسعدك:)
خلاص ما ظلّ كورسات نراجع فيها الدكاتره؛ هلأ رساله وبس والله يستر

عجبتني كوول هاي:)

Ashwaq
على فكره موضوع العلاقات صح جدا جدا!!!
أنا كنت بدي أكتب عنه وأنا بعمل في البوست بس زي ما تحكي ما عرفتش أعبّر فنسيت الموضوع

أيام المدرسه كانت المسائل أخف بس أنا كنت أكرهها عشان الأوامر وهيك؛ الجامعه أحسن بكتير:)

بس بدك نصيحتي: إذا بتقدري تحسني من علاقاتك من غير ما تفوتي بمتاهات ثانيه-انتي فاهمه عليّ طبعا- بستفيدي أكثر وبتمشي أمورك إن شاءالله

مياسي يقول...

jumana
hek o afza3 kaman!!!
mush 3arfeh lesh hek, bs enti shufti el ta3legat kef, fe nas kter 3m be2aydo eli ba7keh

reem
أحسن شي؛ فعلا التطنيش بهيك وضع أحسن سياسه بس حلو برضو تطلعي بإشي منيح:)

الله يوفّق الطلاب على قولة جدّتي والله مش عارفه شو أصعب الدراسه ولا الشغل ولا الحياه؟

مياسي يقول...

eNAS
آسفين صح انتي سي أي أس بتعرفي العتب عالكبر:)
فعلا المكان اتغير بس صعب أحكم يا ايناس بتعرفي ليش؟ لأنو الماستر بيرفعك درجه عند الدكاتره فبيخليك أقرب منهم ؛ فما بتعرفي اذا همّا مناح أو الماستر هو السبب

وزي ما حكيت لك التجارب بتختلف؛ وكل واحد لازم يدير باله ع مصلحته معك حق بهاي بس شو قصدك يعني إنو أنا مش شاطره؟!!

هلأ بدي أشتغل فيكي شغل الهندسه بالسي أي إس:)

هلا أنوستي:)

سوزان
الله يسعدك:) على فكره سوزان كليتنا مشتركه مع القانون باليرموك؛ أكيد بتعرفي هاد الشيء

دكاتركم على فكره ولا بيروحوا من بالي؛ مره بالثالث القاعه المشتركه بينا وبينكم- أكيد بتعرفيها- البنات بيحكوا طلع من عندكم دكتور وسب تا داخ "يا بنات الكلب"!!! هيك بالزبط؛ بتعرفنش تسكتن؟؟!!

هاد جوزك بعدين معاه؟ ماسك كل شغله بعدسه مضخمه!!!

الناس اللي راحوا ع أمريكا حكولي الدراسه هناك فعلا ممتعه وحلوه؛ الله يوعدنا ونزورها:)

Emy
يالله في محاضرات شو ممله ودكاتره مملين كمان
بتعرفي أنا بحكي انو الدكاتره لازم ياخدو مساقات تدريس زياده على مساقات دراستهم؛ لأنو أنا برأيي مش كل مهندس شاطر دكتور شاطر
حاضر رح أحاول أكون دكتوره محترمه وديموقراطيه:)

Bongo يقول...

بوست واقعي جدااا

و لو اننا ظلمنا نسبة بس لأنهم اقلية فهم لا يذكروا تقريبا للأسف !

اعتقد السبب في الاسلوب الآلي في التعامل هو الروتين
لأن كل دكتور فيهم بيتعامل مع الروتين في حياته و نفس النظام كل يوم

فطبعا اول يوم دراسة مش هيبقي زي تاني يوم او زي السنة اللي بعدها و هكذا ..

عموما الأمل في الجيل الجديد اللي فاهم مشاكلنا فعلا , لانه مستوعب المشكلة و ممكن يبتدي مع المشكلة بواقعيه اكتر

يعني الأمل معقود عليكي :D
ارفعي راسنا هههههه

تحياتي ليكي في اول زيارة و نايس بلوج .

مياسي يقول...

Bongo

أعتقد كمان انو المشكله في انو الدكتور بيجي-خاصه دكاترة بره- وفي باله انو يغير ويقيم ويحط بيلاقي انو في ناس كتير ضده؛ وانو حكي أمريكا بينفعش عنا؛ وكمان الدكتور المنيح بيتحارب-يمكن غيره يمكن شلليه مش عارفه والله- فكل هاي الأشياء بستهلك من وقته وانتاجه وبتضيع أشياء كتير نفسه يعملها

رح أحاول مع اني ما بوعد حدا:)

أهلين فيك وشكرا لك:)

خالد السعود يقول...

لا لا نفسيتك مش تمام بالمرة ...
صباح الخير ..

صاحب المضيفة يقول...

لا بجد

مدونة رقيقة واسلوبها رقيق فعلا

للاسف اننا كتير بننتقد اللي حوالينا لانهم زودوها ودي حقيقة بجد

لكن لما ساعات بنكون في نفس مكانهم بنعذرهم على فعلهم لكن برضو مش بيكون لهم كل العذر لانهم كان ممكن يكون اخف وطأة مما كانوا عليه


ربنا يسعدك وسعيد بزيارتي هنا بالفعل

Isam يقول...

حجاوي ؟

سارة نجاتى يقول...

مياسى


ده وباء ماشى فيهم كلهم ؟؟
للأنعرة المبالغ فيها دى ؟؟

الانسان يجعل من نفسه الها - فى رأيى يعنى - عندما يشعر فى أعماق نفسه أنه حد قليل أوى
أو
عندما يكون سقف طموحاته منخفض جدا و يتعامل مع ما وصل اليه من مكانة باعتباره منتهى أمله و ان هذا أقصى ما يحققه انسان , و غالبا ما تكون نظرة قصيرة المدى أوى

تحياتى يا جميلة

سارة نجاتى يقول...

أغنية العسيلى و بشرى حلوة أوى
بس متداخلة مع أغنية تانية
تقريبا فى لخبطة عندك

بس جميلة بجد

hasona يقول...

السلام عليكم

يمكن ليست المشكلة كلها في المدرس ( الدكتور ) بعضها يقع علي عاتق الطالب نفسه

محمد العمري يقول...

مياسي العظيمة..
كأني قرأت بين السطور انك كنت تجيبي معدل بالثمانين..بالثمانين وبكلية الهندسة..يعني والله انك فطحل او بالاربداوي كنا نقول اخو اخته اللي بنجح..مش بجيب بالثمانيين..
صحيح معروف وانا زوجتي خريجة هندسة العمارة ..اساتذة العمارة بالاردنية كانوا نص نص - وسلامة فهمك -..
وحياتي لكل لقطاتك الجميلة..

elsha3er يقول...

مدونتك جميلة بجد

تسلم يمناك

تحياتى

احمد الشاعر

مياسي يقول...

خالد
لو تشوف نفسيتي هسه
فعلا مش تمام بالمرّه!!
صباح النورّ

صاحب المضيفة
شكرا على الإطراء الرقيق الذي لا أستحقه

فعلا؛ يمكن لو كل انسان اتطلع بس شوي لورا واتذكر شو كان قبل ما يوصل لمكانه الحالي كانت اتصلحت أوضاع كتير

بس مع الأسف؛ النسيان طبع الإنسان كما يقولون

مرحبا بك في زبارتك الأولى وأتمنى ما تكون الأخيرة:)

مياسي يقول...

Isma
:P
سارة نجاتي

كلامك صحيح با عزيزتي

يمكن هو نوع من النفخه الكدابه اللي بنتخبى وراها

بس ع قولة صاحبتي: اللي عنده شي بيطلعه؛ يعني الانسان اللي عنده ابداع معين بيطلع للناس مهما كان؛ واللي ما عندوش بيضل مداريه

بالنسبه للأغنيه؛: في فيديو لوائل كفوري هو اللي عامل كل اللخبطه؛ لو طفيتيه حتسمعي الأغنيه اللي عاجباني جدا جدا ع راحتك

تحياتي إلك:)

مياسي يقول...

hasona

ممكن برضو المشكله مشتركه؛ بس الرحمه حلوه

محمد العمري
مش رح أعلق على نقطة التمانين كتير:) بس هي صحيحه!!!

وزوجتك الفاضلة زميله على هيك؟ يا أهلا يا أهلا

كلية الهندسه كليه فضائيه من الصعوبة صراحه

شكرا يا محمد؛ أسعد الله صباحك:)

الشـاعر
شكرا لك

الله يسلمك؛

نورتنا:)

Isam يقول...

دفعة أي سنة ؟ ليكون بنعرف بعض ... ما تخافي مش محاولة تعرف هاي :) انا الفين

مياسي يقول...

Isam

No comment:)