الاثنين، 15 مارس، 2010

كرت العرس واسم المره


تزوجت ابنة عمي الأسبوع الفائت وكما جرت العادة أرسلت إلينا ببطاقات الدعوة لزفافها.

كما جرت العادة أيضـا، تضمنت بطاقة الدعوة اسم العريس تحت اسم والده في حين اكتفت الدعوة بالإشارة إلى العروس بـ "كريمته" تحت اسم والدها.

ابن عمي اتصل بصهره لينبهه إلى أهمية وضع اسم العروس في المكان المخصص لذلك ليكون جواب العريس الشاب المتعلم: "عيب يا عمي!".

أصر والد العروس على رأيه وذلك لأن خلفيته الدينية تقول بأن: "الأصل في الزواج هو الإشهار؛ لا بد أن يعرف الجميع اسم العروس بالنص وإلا كيف سنعرف أن فلانة قد أصبحت زوجة فلان؟"

انطلق ابن عمي أيضا من واقعة حدثت لابنة أخيه عند زواجها، ذلك أن العروس حين تزوجت كانت هي الثانية بين أخواتها مما أدى إلى أن يحدث نوع من "الخربطة" في العروس التي تزوجت ذلك أن استخدام لفظ "كريمته" أدى إلى أن الناس اعتقدت تلقائيا أن الفتاة التي تزوجت هي الكبرى لا الصغرى مما سبب نوعا من الإحراج!.

ما زلنا للآن ننظر لإسم المرأة بنوع من العورة؛ فلا أعرف ما الداعي لإخفاء اسم الزوجة في مجتمع قروي صغير نسبيا مقارنة بالمدينة حيث يعرف الناس بعضهم بعضا ومن السهولة بمكان تحديد الإسم كاملا دون مشقة تذكر!. المضحك أحيانا أن هناك رجالا في قريتي ينسبون إلى أمهاتهم وليس آبائهم وذلك بسبب كون الأم "ذات شخصية قوية جدا" في حين أن الأب "بيكون على باب الله"!. أولاد "فايقه" هم "زلم بشوارب" وللآن لا أعرف ما اسم والدهم فكل واحد منهم يدعى باسمه الأول متبوعا "بابن فايقه"!.

أذكر مرة أن شقيقي الصغير ذكر اسم والدتي أمام أصدقائه في حديث ما فانهال عليه شقيقي الأكبر منه مباشرة لوما وتقريعا وذلك لأنه من العيب أن يعرف الشباب اسم والدته! "انتا واحد ما بتستحي، هيك بتحكي اسم أمك للشباب؟!!" ليجاوبه الأصغر في حدة: "انتا واحد متخلف!! شو فيها؟"

الواقع أن غضب شقيقي غير مبرر أبدا؛ ذلك أن والدتي تعمل معلمة في مدرسة ثانوية في مجمع سكني صغير ولذا فتلقائيا لا بد أن نفترض أن المعظم سيكونون على علم بإسمها دون بحث مستفيض!.

ما زلت للآن أذكر صديقتي المهندسة من أيام الدراسة التي تحدثت يوما بنوع من المرارة عن أن "الميم" التي نحصل عليها كمهندسات قد تفيدنا فقط في حالة تم وضعها قبل اسم العروس في بطاقة الزفاف؛ ذلك على حد قولها إن لم يكن العريس أقل من العروس مرتبة فتضطر إلى إزالتها حفاظا على مشاعره. "النهفه" أن صديقتنا تزوجت "بفنّي" من عائلتها وليس بمهندس ولم أستلم بطاقة دعوة لأعرف إن كانت قد وضعت حرف الميم أم لا قبل اسمها مع أني ذهبت إلى الزفاف بدعوة على الهاتف.

وماذا عن الخلويات؟ حين يشير الشاب إلى اسم أخته باسم مذكر غالبا، وإذا ما تنازل قليلا سجله باسم "Sis" وذلك حتى "يسكّر باب" أن يحصل أحد من أصدقائه الذين لا بد سيتفقد جهازه الخلوي يوما على رقم أخته.

الإشارة إلى الزوجة بأسماء منها: :"أم العيال"، "المرة"، "الحرمة"، "العيله" وغيرها أمر ما زال شائعا جدا في مجتمعاتنا، كلمة "الحرمة" جاءت من الخليج حيث بالمناسبة تنتحل الفتيات لنفسهن أسماء وهمية مثل "أسيرة الأحزان" و "شمعة الوله" أو الأكثر شيوعا هو "أم فلان" فستجدهن معظم الوقت يتصلن بالبرامج الإذاعية ليجبن على السؤال الأزلي: "مين معاي؟" ليكون الجواب : "معاج أم عبدلله".

عندما أفكر في موضوع "تخباية" الإسم هذا، يخطر لي أن السبب قد يكون خوف الرجل من "الحجابات" بما أن اسم الأم هو ركن أساسي في عمل "السحوره" و"فتاحة الأبراج" أيضا. حسنا السبب الأعنف هو "الشتائم والمسبّات الحلوه" التي نسمعها يوميا والتي تتعلق بشرف الأم والأخت وأشياء أخرى لا يصح ذكرها هنا.

حين أفكر أن بعض الرجال في الأردن لا زالوا يخجلون بأسماء أمهاتهم أتذكر تلقائيا حين كان يطلب من العربي القديم أن "ينتسب" فكان ينسب نفسه إلى أبيه وأمه معا.

نحن في الألفية الثالثة ولا زلنا نخجل بأسماء "نسائنا" في عالم يتسارع كل يوم ويركز على الهوية الفردية. لم أسمع يوما أن اسم المرأة عورة في الإسلام وإلا لما عرفنا عن سيدتنا "عائشة" وسيدتنا "خديجة"- رضي الله عنهما. ولربما لما كنا سمعنا "بمريم العذراء" حتى وهي من كرمها القرآن فسمى سورة باسمها ونسب ابنها إليها فسماه "المسيح ابن مريم"! لربما يأتي يوم ونكف فيه عن الخجل بهن!!

ملاحظة: بمناسبة الأعراس،أحب أن أبارك لـ eNAS بزفافها؛ أعرف أن التهنئة جاءت متأخرة قرابة الـ10 أيام ولكن "هسه أحسن من بعدين غير هيك في عروس بتكون واقفه عالمصمد وبتحكي نزليلي بوست؟!!" . كان العرس جميلا ورائقا واسمتعنا به. تتهني عزيزتي J

كان من المفروض أن تكون هذه هي التدوينة الأساسية الخاصة بيوم التدوين عن الأردن ولكن حصل أن نشرتها الآن.

هناك 37 تعليقًا:

قويدر ابن سميرة يقول...

مأساة التخلف في بلادنا! يعني شيء مؤسف بالفعل ان نختزل الأم بـ "المرأة" كأنّها عورة و نكرة
شيء غبي و متخلّف و لا يمت لا للدين و لا للشرف بصلة

Qwaider قويدر يقول...

صحيح، الف مبرك لأحلى عروس و كل عام و هية بخير

مياسي يقول...

ابن سميره

يعني شو بدك تعمل؟ ما في فايده شكلو :(

بالنيابه عن ايناس بحكيلك الله يبارك فيك :)

فتاه من الصعيد يقول...

المشكله موجوده عندنا لحد ما

بس خفيفه تدريجيا ... معظم الناس بتكتب اسم العروسه عادي

اصلا انا موش شايفه ايه المشكله في اسم الست ... وزي ما قلتي كل الصحابيات كنا بنعرف اسمهم

ولو كان عوره كانت تمت الاشاره ليهم باسماء اباءهم او ازواجهم

تحياتي للبوست الرائع

بسمة فتحي يقول...

مياسي
موتيني ضحك، وعمّمت تدوينتك على (الولايا) اللي معي بالمكتب، يعني كفيتي ووفيتي وما قصّرتي :)

قط البكتريا يقول...

منيح منيح احكووعبرو ... يعني لولا المدونات كان ضليتو كاتمين بقلوبكم ... ماشي يا مياسي يا بنت اربد :D

عفكرة هو فيه نوع من الغباء بتفكرينا ... تاني اشي بخصوص العريس المتعلم مش قصة تعليم هاي قصة ثقافة وتطور
متعلم صح بس لسه بتفكير غريب يعني لو الواحد عرف اسم العروس شو يعني او انو عرف اسمو امو ... بس برضو وجهة نظر بلكي واحد عرف اسم امي وسحرني ضفدع
بديش حد يعرف الاسم :D

leeno يقول...

الله على الأردن !!!
من سمات المجتمع الأردني الغير موجودة في اي مجتمع سواه كريمته في كرت الدعوة !!!

من يومين زميلي بالشغل بيحكيلي كريمة رجت اتزوجت و انتي قاعدة هههههههه كوشت على كل شباب البلد هالكريمة !

لعل و عسى ان شاء الله تسير الأنثى بتستاهل ينذكر اسمها صراحة

Che يقول...

والله يا مياسى الموضوع ده موجود عندنا بس بشكل اقل من زمان كتير ... موجود بشكل واضح فى الارياف و فى الصعيد على حد السواء بنفس الاعتبارات اللى انتى ذكرتيها

Sh3rawi يقول...

للأسف مع كل التطور و "الانفتاح" الموجود عنا الا انه اجا نتيجة طفرة سريعة لا نتيجة ثقافة مجتمعية..
لكن برضو في سبب آخر, الناس بطلت توثق بحدا.
يعني الشب ما بثق بصاحبه, لانه لو سصاحبه عرف اسم اخته مثلا, ما بعرف شو ممكن يساوي,
ما احنا كلنا عارفين انواع النفسيات المريضة عنا في الأردن..
لكي كل التحية والاحترام

نادر احمد يقول...

مسا الخير مياسي

انا بعرف واحد اجتو بنت سماها "كريمة"
اختصر الطريق من اولها

nido يقول...

my mom used to teach computer at an elementary school. One day she asked the little kids to make tables and add their family members' names. she noticed that all of the kids were trying to cover the screens by their little hands. it was then when she knew that this "problem" exists in life, even among kids. I was still young when my mom came back home and told us what happened...growing up I noticed that a lot of people are acting exactly like those little kids. what a shame!

مياسي يقول...

مروه

اتوقع المشكله خاصه بالريف إجمالا في بلادنا
لدرجة انو لما أشوف كرت مكتوب فيه اسم العروس بستغرب

شكرا :)


بسمه

التدوينة صارت عند الولايا؟ ممتاز كتير هاد اللي بدنا ياه

مبسوطه اللي ضحكتك عالصبح مع اني مش فاهمه لهلأ ليش ضحكتي بس مش مشكله
المهم انك انبسطتي
زمان عنك بسمه :)

مياسي يقول...

بكتيري

بدي احكي وغصبن عن شواربك :) الله يخلينا البلوج سبوت واربد حبيبة قلبي :)

هو صح مثل ما حكيت الموضوع ثقافه اول على اخر ومرات بحس الشباب "ختياريه" بالتفكير اكتر من الختياريه نفسهم

بس تصير ضفدع دورلك على أميره تمشيك وتوكل عالله:) خبرني شو بيصير معاك



لينو

كريمه ما خلت لحدا مجال؛ لازم نشوف حل مع هالكريمه:) زكرتيني بابن خالي صف أول بيحكي لعمتو ليش بعدك لهسه بلا جوز اطلعي دوري لك على واحد!!

حكم!!

أهلا فيكي :) بحب تزوريني دايما

Whisper يقول...

ههههههههههه
زكرتيني وانا صغيرة كنت بحضر مباراة بين الوحدات والفيصلي و فجأة الجمهور صار يصرخ و يحكي "جميلة...جميلة" بسأل اخوي مين جميلة؟؟؟ بحكيلي انهم بدهم يقهرو "جمال ابو عابد" فشكلهم متوقعين اسم والدته او اخته جميله و بدهم يتوتر :)

قبل كم يوم انسألت عن اسم ماما علشان الدعاء يكمل,و جاوبت بدون تفكير, تخيلي لو حكيت اسم تاني كان راح الدعاء علي :)

مشكلتنا ان في ناس عندهم تفسير خاص وخاطئ لمعاني الرجولة والشرف

مياسي يقول...

عمرو

واضح انو الموضوع مرتبط بالأرياف كمان مره
زمان عنك يا عمرو:)


Sh3rawi

مزبوط كلامك؛ احنا انجبرنا عالتطور جبر ومنشان هيك لسا عايشين بعقول قديمه
وبالنسبه للنفوس المريضه
للأسف ثقافة النفوس المريضه صارت حاكميتنا في كل شي لدرجه انو بتصير تحس الحياه بشعه

شرفتني بأول مره :)

SimSim يقول...

اذا بدي أحكيلك عن المواقف اللي عندي ما بخلص هههه بس أكتر شغلة بتغيظني شغلة كريمته هاي !!!

اليوم بسأل ولد بصف رابع شو اسم أختك كنت بدي أحكيلها اشي بحكيلي لا يا مس عيب أحكي اسمها قدام الاولاد طبعا لانه مر علي اكتر من مرة هيك اشي ضحكت ولما تذكرت اسمها ما حبيت أحكي كمان احتراما اله ههههه

حتى في بيانات لازم يكتبوها اول السنة ومن ضمنها اسم الام معظمهم بكتبوا ام محمد أو ام رأفت ههههههههههههههه انا هددتهم اللي ما بكتب اسم امه بجيبه من الملف وبصير اناديه يا ابن فلانه لآخر السنة والله صاروا زي البسس واستخدمت التهديد لمناسبات أخرى كمان ودائما تزبط ههههه

عقلية متأصلة فينا كيف بدها تتغير ؟؟

مياسي يقول...

نادر

هههههه:) حلوه وفر على حاله حبر بطباعة الكرت بالمرّه

يا هلا فيك :)


nido

1st of all welcome to my blog :)
2nd, thanks 4 the lovely story, it is v true what u had said, my brothers were young when the story in the post happened that I felt surprised where did the eldest got such an idea!!

it is a bad habit which i don't believe it is gonna be ended soon

Welcome :)

مياسي يقول...

Whisper

انا هاي القصه بتزكرها على فكره مع اني خلفيتي عن شغلات بالاردن مش كتير!!

وكأنو كمان كانو ينادوه باسم اخته؟

حلوه شغلة الدعا هاي؛ على فكره مرات لما حدا يسأل عن اسم امي بتوجس!!
بخاف الشغله يكون فيها شي مش مزبوط!!

بتعرفي أشياء مجتمعيه الشغله!!

أي شرف يا بنت الحلال؟ صلاة النبي أحسن !!



SimSim

عن جد تحفه:)
ضحكتيني من قلبي جد خاصة شغلة البسس!!!
يعني شفتي كيف؟ خلص شي بيتربوا عليه من صغر وعشان هيك مش عم يخلص بالعكس مستمر

لا بس جد شريره!! عم تهدديدهم بأسماء أمهاتهم أما تهديد:)

هلا سمسم

همسة يقول...

اسم المرأة عورة :(

تروح تدفن حالها وترتاح !

مياسي يقول...

همسه

:) لا ما بدنا تدفن حالها

قاعدين على قلوبهم الله عطاني حق وما حد اله حق ياخده :)

زمان عن هالطله شكلها المدرسه شاغليتك كتير :)

قط البكتريا يقول...

عادي عادي انتو اهل اربد ما بتاخد على كلامكو :D
واذا لقيت اميرة وصارت هيه كمان ضفدعه ؟؟ شو حستفيد
بجد بستفيد من البلوج كتتير يعني
انو مرات الواحد بكنش مقدر قديش هل مواضيع بكون حازز بنفس البنت

يبي شو قلوبكم سودا

مياسي يقول...

قط البكتيريا

شو قصدك يعني؟ أهل اربد بنص عقل؟ له له هيك لكان؟ :)

والله اذا صارت ضفدعه خير وبركه شو عليه؟ عالأقل بيصير فيها تكافؤ الشغله :)

قلوبنا سودا؟ حرام عليك احنا لبن حليب

جرب بس تصير بنت ساعة زمن وشوف العجايب
الله يخلينا المدونات وجوجل:)

أشرف محيي الدين يقول...

مرحبا مياسي

يعني أعتقد أن المعلقين كفو ووفو في الموضوع بس عن جد في عندي تساؤل صغير وهو اللي بخلي المجتمع وأصحاب العقول المتحجرة يضلوا يدورو ويرجعو لنفس المكان حتى لو بعد مئات السنين وهو ليش مفهوم العيب دائما ملتصق بالفتاة وبطاردها حتى في اسمها ؟

تحياتي .

مياسي يقول...

أشرف

هو الصحيح ما شالله كل واحد طلعت عنده قصه بتخص الموضوع

مفهوم العيب ملتصق بالفتاة لانها اضعف عنصر ولأنو مع احترامي احنا في عصر آخر الرجال المحترمين

أخسن مسلسل ناقش فكرة العار هو زمن العار؛ أتوقع انو لخص فكرة العار المرتبط بالمرأة بطريقه ممتازه

jafra يقول...

يعني شو بدي احكي اكتر من اللي حكوا
مممممم
مش قصة تعليم هاي القصة يا ستي قصة ترباية و بيئة و طريقة تفكير
يعني ما الها كمان بالدين
و القصة متكررة بعدة بلدان مش عنا بس
( حتى هاي ما تميزنا فيها )
الشغلة كمان بتتعلق باحترام هادا الشخص للمراة بعيلتوا
و طريقة تعاملهم و تعاطيهم معاها على اساس ادمي او غيروا
و الله اعلم :)

مياسي يقول...

jafra

ما شالله كفيتي ووفيتي :)
مش عارفه شو قصة التعليقات هون
المعظم بيحكي انو انحكى كل شي:)

هي مسألة ثقافه قبل كل شي فعلا

nrjordan يقول...

mar7ba maysee
this is the first i comment here i like your blog by the way.i have the same problem and i hated my husband always says in front his friends for example 5alne as2al almara or almara k3da janbee .i hate that world it sounds so sokia e55 i was like why cant you just say my name ya3nee maloo asmee noor tyb balsh twrha shwia a7kee almadam mathaln s7?
lol ana 3arfa i think our middle Eastern men will never yatwaroo.

مياسي يقول...

nrjordan

1st of all welcome to my blog i used to read ur comments on Ashraf's blog and thanks 4 liking my blog :D

u made me think about it again, yea why not to use the word "el madam"? I think this one could be much gentle and nicer even to our ears

journey to change seems 2 b long enough :-S

happy by ur comment, really i am :)

سراج الماضي يقول...

طبعا أن تأتي متأخرا أفضل من أن لا تاتي بالمرة :) مثل برحاوي قديم :)

والله يا مياسي كلامك على الجرح ... أنا واحد مثلا عاش واتربى في الأردن ، طول عمرنا وأحنا صغار أتعلمنا عيب الواحد يحكي أسم اخته أو أسم امه وعيب الناس تعرفه بدون ما نعرف السبب أو نفكر فيه ، بذكر مرة ابن جيرانا نادى على أخته الصغيرة من تحت عشان تجيبله مفتاح البيت كان ناسيه ، أكل يومها قتلة نصها موت من ابوه ، كيف ينادي على اخته من تحت ، رغم ان البنت عمرها كان وقتها ما بتجاوز ال 11 سنة !!!!

لو نظرنا بصدق وسألنا أنفسنا، لماذا يعتبر عيب لو عرف الناس أسم والدتك؟؟ أو أسم زوجتك ؟؟ هل هذا يعتبر قلة حيا؟؟ أو قلة شهامة أو مروءة مثلا؟؟

التقليد الأردني الدارج مع بداية كل دوري ممتاز ومع إنضمام لاعب جديد لأي فريق خصوصا فريقي الوحدات و الفصيلي ، وهو البحث عن أسماء أمهات و أخوات اللاعبين لإستخدامها في التشجيع و الشتائم إذا لزم ...

لماذا يعتبر ذكر أسم الأم و الأخت عار على الرجل؟؟؟ هل لأن الرجل الشرقي يعتبر شرفه وعرضه اغلى ما يملك دائما ، وتحت هذا التفكير نراه يضع معرفة اسم الأخت و الأم تحت محاولة لخدش هذا الشرف؟؟؟!!!
هل المشكلة فينا أم في الناس أم الزمن؟؟
هل الخوف من الأستخدام السيء من قبل الناس عديمة الشرف هو ما جعل معرفة الأسم مسألة حساسة؟؟ الإسلام حث على الغيرة المحمودة والشرف والمروءة. ولكن هل مايحدث من الإسلام في شيء؟؟!!!

هذه هيا مجتمعاتنا و تفرض علينا الكثير و الكثير من العادات و التصرفات الغير مقبولة ، في النهاية كل فرد هو حر بالتصرف كيفما يريد ولكن هل سيرحمه سكين المجتمع؟؟؟

آسف طولت :)

سراج الماضي يقول...

وصحيح
ألف مبارك لصاحبتك و ربنا يرزقها الذرية الصالحة :) لازم تسميها
Miss Post :D

jehan يقول...

Well Jehan bent 7anan :P
1st time to post a comment here !
3njad ana ma b3raf lesh hal-t5lof !
y3ni hl2 anti 3rfy asmi ana b6l 3endy sharaf hl2 ! wela y3nni alasem 3awra w ana ma b3rf !
ya 7 BTW when I was young kent daymn b8r2 krot al3ros famra bs2al mama hay kreemteh km mara tzwjat
& your blog is on of my fav :)

Ola يقول...

شكراً عالبوست مياسي، من زمان لازم حدا يحكي هالحكي، البنت لازم تعتز باسمها وشخصيتها مش تخبيها وتستحي منها

قبل فترة كان خالي في اليمن في شغل وكانوا بعبوا نماذج وهيك إشي فطلب من واحد من المتدربين يكتب اسم أمه، قام اتطلع عليه وضحك ضحكة معناها في أحلامك! ولما سأل خالي واحد تاني عن الموضوع قال له: منيح اللي ما طخك، المهم لما كان في جلسةالتدريب سأل المتدربين: مين أعظم شخصية في العالم؟ قالوا له: سيدنا محمد صلى الله عليه وسلم، قام قال لهم: في حدا فيكم ما بيعرف اسم أمه؟

مياسي يقول...

سراج

طول على كيفك

يعني ما شالله كفيت ووفيت
في أشياء بحياتنا خلاص مسلمات بلا تفكير

الله يبارك بعمرك ان شالله


jehan
i don't know ya Jehan, but it seems this habit is wide spread :-S

lool sheklo "karemeh" m7ayreh el kol ma3aha :D
shu had el post 3emel 3amayel!! kol hal nas eli 3algo kayneen secret readers :)

welcome Jehan i really appreciate ur comment :-)
keep commenting plz


Ola

فعلا لازم نبطل نستحي بحق رباني وماشيين هيك تطبيش!

هههههه حلوه هالقصه من خالك فعلا شيء غريب وتناقضات اغرب

يا هلا فيكي بأول زياره :)

Amjad Wadiِ يقول...

من أجمل المواضيع اللي بقرأها بالمدونات

من اول يون نزل الموضوع وانا بدي أكتب تعليق بس ما صار مجال

و هسا صار متأخر كثير

مياسي يقول...

أمجد

لا متأخر ولا شي
شكرا على ردك، دايما في وقت :)

Amjad Wadiِ يقول...

والله انا هاي قصة الاسم عالكرت حيرتني من وانا عمري 10 سنين يمكن
و لما عرفت ليش ما بحطوا اسم البنت استغربت و كنت أقول لحالي طيب ما احنا عارفين اسم العروس و ين المشكله.

و بالمناسبة عندنا زي عندكوا بالزبط .. فيه دار معروفة باسم المرأه .. الزوجه لانه شخصيتها كثير قوية و حتى اولادها بتسموا باسمها مرات
:) يعني تناقض شديد

بس الوضع صار يتغير شوي شوي مؤخرا و فيه ناس صارت تنتبة انه الصح هو كتابة الاسمو انه لا اسم البنت ولا صوتها و لا وجودها عورة .. بس برضه مش معناه ندبك حبل مودع :)

مياسي يقول...

أمجد

أتوقع معظم القرى فيها نموذج الأم هاد :)

ولا إحنا بدنا ياه حبل مودّع أكيد:) بس يعني شي ومنو