الخميس، 18 فبراير، 2010

قاعدة ربط الحمار



في قاعده مهمه كتير طلعت فيها بعد 3 وظايف في القطاع الخاص ووظيفة تدريس في كلية خاصة

القاعدة هي : "اربط الحمار (حيشا السامعين) محل ما بدو صاحبه

على فكره هاي قاعده ذهبيه جدا؛ لأنو مهما سمعت حكي بالشركه عن التعاون وحرية الرأي وهالخرابيط هاي كلها انسى عند أول زقره بسيطه حتلاقي مديرك ( حتى لو دارس في أمريكا أو أوروبا) بيورجيك العين الحمرا وغصبن عن عين أبوك اشتغلهم من ثم ساكت

في قاعدة ثانيه مهمه انا شخصيا بتبعها؛ ما تحب شركتك زياده؛ حب شغلك آه شركتك لأ؛ لأنو رح يجي يوم يا بتستغني عنهم يا بيستغنو عنك؛ فاشتري راحة بالك من هلأ

المرّه الجاي بحكيلكم عن قاعده ذهبيه تانيه هي قاعدة المقصص والطيار

بس هلأ عن إذنكم؛ رايحه أربط الحمار

صباحكم "ربط"


هناك 19 تعليقًا:

فتاه من الصعيد يقول...

هههههههه

القواعد الملهمه في الوطن العربي

تحياتي

مياسي يقول...

مروه

ههههه
فعلا ضحكتيني على كلمة الملهمه:) أحلى تحيه

Whisper يقول...

والله يا صديقتي وين ما راح تروحي راح تلاقي هالقواعد الذهبيه لازم تطبق

عنّا بالشغل في حمله تنقلات تعسفيه كتيره هالفتره بسبب عدم التعاون و حرية الرأي, مثلا في موظف ساكن بالنزهه انتقل للشغل في الفحيص لانه ما رضي يشهد شهادة زور مع المدير :) يعني ما اتسم بالشفافيه ولا بالتعاون ولا مارس حقه بحريه ابداء رأي المدير

نفسي اعرف شو بقصدو بالشفافيه اللي بضلو يكتبوها باهداف كل شركه بروحها...

همسة يقول...

والله انا الفكرة موجودة عندي اما بصراحة ما كنت بعرف نص القاعدة
هيك الواحد صار يمشي على شي مدروس وقاعدة واضحة
وبانتظار القاعدة الثانية لانو اسمها عجبني

سراج الماضي يقول...

قاعدة ذهبية يا مياسي :)
إلها علاقة وثيقة بالحكمة التي تقول من حكم في ماله فما ظلم :)
أي مدير للاسف بيعتبر الشركة عبارة عن عزبة خاصة و الموظفين هم من السخرة و عمال التراحيل البؤساء ... وبيعتبر بما انه دفوع رواتبهم اذن له الحق بكل شيء (متى أستعبدتم الناس وقد ولدتهم أمهاتهم أحرارا)
هذا مرض إجتماعي منتشر بشدة للأسف ...

وأهم شيء ديري بالك على الحمار و أربطيه في المكان الصحيح :)

jafra يقول...

يعني لو علمونا اياها بالجامعة و المدرسة مو احسن ما نطلع هيك جيل مصدومين للابد
علق الحمار ؟؟؟
ليش هم حتى الحمار ما عطونا اياه دخيلك

بس شكلك كتير متفائلة زيي هالايام
:)

مياسي يقول...

ويسبر


ههههه تعرفي جد ضحكتيني على الشفافيه هاي:)

هاد صاحبكم ما عرف يزبط وضعه للحمار؛ فالحمار شاطه بالفحيص

انا عارفه يا ويسبر زمن مش للمناح للأسف:(



همسه

أهلا وسهلا فيكم؛ هون عنا شوية قواعد بتعجب:) كويس اللي عندك نص القاعده معناته في أمل لسا:)

المره الجاي بنحكي عن القاعده التانيه:)

مياسي يقول...

سراج

والله شكلو كل شي قالب عزبه مؤخرا:) على فكره فكرة العزبة هاي عبقريه:)

هايتني بربط بس يعني ما تفكر المسأله دايما سهله:) بدها تعب شوي


جفرا

حبيبتي انسي شو مدرسه ما مدرسه؟ مدرسه الحياه اكثر تأثيرا وبلاغه:)

شو التفاؤل عندي مؤخرا اشي "حبطرش" اكيد عارفه شو معنى الكلمه:)

الحمار ممكن يكون اي شي فديري بالك

سوزان يقول...

هههههههههههههههه حلوة وصحيحه

jafra يقول...

له يا مياسي
ممكن يكون اي شي
اكلنا هوا


شكلو لازم نعمل حرب الحبطرشية

مياسي يقول...

سوزان

مبسوطه انها عجبتك :)


جفرا

شكلو صا رلازم فعلا:) انضموا انضموا

NasEr يقول...

شكرا جزيلا، لأنو في بنت بالشغل هداك اليوم ضلت تحاول تتزكر هالمثل عن هالحمار وما حدا عرفو، بكرة بطلع أنا أبو العرّيف :p

مياسي يقول...

Naser

لوول عن جد ضحكتني:) مالي خص بد عمولتي بدل قواعد:)

شرفت ناصر بيك :)

خبرني شو بيصير معاك بكره

أشرف محيي الدين يقول...

يعني بصراحه يا مياسي عم بنحاول كتير نتعلم هادي القاعدة اللي هي بالتأكيد بتحققلنا العديد من العوائد والترقيات في مجال عملنا بس المشكله مش عارفين نطبقها .

إذا عندك دورات بتعطيها حول هذه القاعدة ارجوكي تخبريني عن الموعد عشان اسجل فيها واتعلم كيف اطبقها صح :)

مياسي يقول...

أشرف

هاي القاعده كتير مهمه صدقني

يعني بحكيلك ياها بعد 2 استقاله و واحد "ترويحه" بصراحه

ما عندي دورات؛ بيكفي تشتغل بأي مكان بالأردن بتتعلمها لحالك :)

مهندس مصري يقول...

دي القاعدة الأساسية للشغل في الخليج :)
اربط الحمار مطرح ما يعوز صاحبه

مياسي يقول...

مهندس مصري

هاي القاعده الأساسيه للشغل في كل مكان

أهلا بيك نورت :)

الشنكوتي الكبير يقول...

اه دي قاعده مصريه برده ومشتهره قوي عندنا

وبنفذها بالشغل هنا بالمضبوط الحمد لله

اصل ابويا اشتغل في الشركه دي قبل مني 30 سنه واديني شفت اللي حصله لما معجبهوش مكان الحمار القديم وراح ربطه في حته صح ضاع حقه سنين وحرقوا دمه وعقدوه لحد ما كرهنا احنا في حيانا بسبب الكبت اللي اتعرض له من شغله

يالا انا كمان هروح اربط الحمار

سلاااااااااا
اخوكي ايهاب

مياسي يقول...

شنكوتي

هاي قدامك مثال عملي
دير بالك ما تربط الحمار منيح:)