السبت، 31 أكتوبر 2009

البحث عن العروس الخارقة




عزيزتي الأم "الباحثة عن العروس الخارقة"؛ معلش بس ملاحظة صغيرة ولا مؤاخذه يعني؛ يعني لما يكون ابنك قاعد بالجامعه شي "عشر سنين" ما شالله وهم المفروض يكونوا "خمسة" مش أكتر

ولما يكون صار لو سنه بس بره ولا وراه ولا قدامو "يعني من الاخر مطرّق" ومش عامل اشي زياده غير حرف هالميم اللي راصو قبل اسمو

ولما تكوني ما خليتيش بنت الا وطليتي بوجهها بحثا عن المواصفات الخارقه لابنك المحترم لدرجة انو الشب زهق وصار يروح معك بس عشان تحلي عنه ومش سائل عن العروس كلها على بعضهـا

يعني رجاء هو ابنك مقطوع شكله؟!! ولا طاير بالسجاده عشان طلع لحاله مهندس بعيله ما فيهاش مهندسين؟!!

تا نشوف آخرتها مع هالعروس الخارقة اللي بدكم تجيبوها!!!

ملاحظة: اكيد مواصفات العروس الخارقة لازم تشمل كونها بيضا "بتوجّ وجّ" و"عيونها خضر" وصغيرة ويستحسن تجيب راتب – طبعا الأولوية للمعلمات- في حال في وحدة حبّت ترشح حالها "لعريس الهنا"

مستحسن أروح أنام أنا "انمغصت خلاص" والدنيا برد موووووت

تصبحوا على خير

اسمعوا صغير وملّعب


هناك 29 تعليقًا:

غير معرف يقول...

ههههههههههه

في مثل بتقوله الامهات عندنا .... تقعد ع البساط وتختار ست البنات

وللاسف كلهم قعدوا ع البساط .... بس موش عارفين يختاروا ست البنات لان ست البنات ماتستنضفش الاشكال دي :)

تحياتي

Whisper يقول...

هههههههههه اول شي من وين جبتي هالصوره اللي مناسبه 100% عالموضوع :)

ونسيتي تحكي انها ما بتعرف تحكي غير حاضر, وما بدي اشي, و الابتسامه ما تفارق وجهها لو مهما صار, وان يكون صوتها زي تغريد العصافير و اكلتها كمان زي العصافير
سنانها صف اللولو, جسمها غصن البان...

كل وحده بتيجي شايفه ابنها ومش مصدقه و لو لقت بنت بكل هالمواصفات برضه راح تستقلها على ابنها ال "م" او ال "د" اللي ما في قبله ولا بعده بهالدنيا

انا بحكي متل هالام تضب ابنها و تبروزه هو و لقبه و تخليهم عندها بالبيت :)

Shaheen يقول...

نصايح للشب الباحث عن عروس :

- اطلع بالمرايا قبل ما تنقد بنات الناس

- البنت اللي الها راتب منيحة بس مايكون راتبها اكثر من راتبك

- قبل ما تشكك بشرف البنات وماضيهم وعلاقاتهم العاطفية تذكر شو كنت تعمل بزمانك من اللف حواليين مدارس البنات لسينامات وسط والبلد للكنكنة تحت شجر الجامعة الاردنية لتشليف على شارع المطار وغمدان.

mtayseer يقول...

هههههه
يعني سبحان الله بتكون الام واجهت نفس المشكلة لما كانت صغيرة والان تقوم بنفس عمل حماتها او "اللي كانت بدها تصير حماتها"

على العموم، الله يحييني ويوريني شو راح تعملوا مع ولادتشو بس تتشبروا
وسلامتشوو

لبنــــــــــى يقول...

هههههههه شكلو الامور على الاخر معك
طولي بالك كل ام بتفكر انو المحروس ما في زيو بس لو نزلت على اقرب كافيه او نت رح تلاقي زيو متايل و يمكن تغير رايها انو يضل ابنها :))))))))

عن جد ضحكتيني

Che يقول...

طيب و اللى قعد عشر سنين فى الجامعه ز لما اتخرج مخدش الميم دى يعمل ايه يا مياسى ... يموت نفسه ؟؟

همسة يقول...

اه طبعا ولا شو مفكرة انتي !!
هاد اللي كان وهو صغير كل ما يروحوا على حدا من القرايب ينادوه يجي يغني وشوفوا ما اشطرو بدو لما يكبر يصير مهندس D:
لازم تكون صاحبة الحظ السعيد واللي امها داعيتلها توب من كل النواحي فرنسية إلا ربع و بتجيب راتب

sozan يقول...

ههههههههههه ما اخف دمك :) شو في ام طلعت روحك
يا حبيبتي يا ميسو انت ما عرفتي انه القرد في عين امه غزال
بعدين ريحي حالك من هالموضوع صدقيني لما يجي وقته من حاله رح تشوفي الامور ماشيه وبسرعه خلي ام العروس الخارقه تدور نهايتها تهدي على وحده تجننها

Amjad Wadi يقول...

القرد بعيت امه غزال
على رأي سوزان

م/ الحسيني لزومي يقول...

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست

سراج الماضي يقول...

LoooooL
Amazing post Mayysi
I'm happy that you come back to your Blog
The super Bride is a myth
but also some girls look for the Perfect Groom
every person see his son or daughter is the best

Allah y3een elnas 3la 7alha
tadweeniah gamliah
we tisb7ai 3la kheer
:)

غير معرف يقول...

احلى شي الوحدة تحكي لابنها .. روح يما الله يرضا عليك , انت درست بالجامعة وبكرا رح تشتغل وتشوف ناس وعالم اكتر من شعر راسك
انت اللي بدك تعيش معها وتحبها مش انا
ولا تعيش قريب من هون مشان القال والقيل كله ملغي من حياتي يا حياتي :)

لو تطلعي على البنات بطلعو كلهم عرايس خارقات :)

Naryat يقول...

Duh!...
انا ما بفهم هدول الستات كيف بيفكروا!!!
لأ و الله ليش الكزب؟ عندي فكرة كيف بفكروا

افففف

مرات بحس انو هدول النسوان خرج تطلعلهم بنت قد حالها و تحكي للوحدة فيهم: "ابنك اللي مكيفة عليه جاب شهادتو بعشر سنين، انا جبتها بأربعة و نص... ابنك قعد تلت سنين بدون شغل بعدما تخرج، انا اشتغلت بعد اسبوعين... ابنك الو اربع سنين بيشتغل و بعدو مكان ما هو... انا من اول سنة ترفعت... ابنك من ما اشتغل ما حوش قرش على قرش و راتبو كلو بيروح كب، انا من ما اشتغلت درست حالي دراسات عليا و درست اخواني و ساعدت اهلي بمصاريف البيت، و معي تحويشة... ابنك ازا قعد بين صحابو الروح بالروح بعرفش يحكي كلمتين عبعض وبضل يضحك زي التوتو، انا ممكن اشارك ببرنامج تلفزيوني ببساطة ما كنت اشارك بالاذاعة المدرسية...
فبقترح تروحيه عالبيت تربيلو جدايل و تعلميه طبيخ و تقعديه بالبيت يستنى نصيبو"

جد بيضغطوني هدول الناس!! بيكون نفسي الوحدة فيهم قبل ما تطلع من بيتها لبيت العالم تتفحص بناتهم انها بس تتفرج منيح بالمراية على حالها و على ابنها...
اففففففففففت

بس انتي ما عليكي من الحكي :-)

و الحمد لله على رجعتك للبلوج بالسلامة ;-)

و ضلي اكتبي يا حلوة...

singamaraja يقول...

Reading and visiting your blog

غير معرف يقول...

يعني الصراحة أنا مش فاهمكو ، يعني انت البنات كمان بدكم العريس الخارق .. صح و و لا حدا عاجبكو لا هو و لا أمه ، يا عيني عليكم ....

بس الصراحة موضوع الدراسة ، لأنه صار معي إني غيرت دراستي ثلاث مرات فالمفروض اني متخرج بس لهسه متخرجتس فالظاهر اني اضب حالي بالبيت احسن و لا أتزوج و لا أطلع في وحدة فيكم ... صح هيك .

Naryat يقول...

مياسي بعد اذنك بدي ارد عالأخ الأنونيموس...

لا يا عزيزي احنا ما بندور عالعريس الخارق... و البنت فاهمة منيح انو ما في شب كامل بالدنيا...

بس الموضوع انو الشب وأهلو لازم يكونو واقعيين و لما يروحو يدقوا باب بيت العالم يكونو عارفين منيح مين همّ و مين بنتهم، وشو انجزت بنتهم بحياتها، و بنفس الوقت يعرفوا ابنهم منيح و ما يعملولو هالة اكبر من حجمو!!

يعني بدون مؤاخذة رح احكي بصراحة و ما بدي تزعل، انا ما بجامل بهيك مواضيع...

انتا عم تحكي انك غيرت تخصصك تلات مرات، يعني باختصار لما دخلت عالجامعة ما كنت عارف شو بدك!! و معك مجال "مادياً" انك تغير تخصصك براحتك... هاد هو الانطباع اللي بتعطيه عنك هاي المعلومة!!
فلما تيجي تدور على عروس ما تروح تدق باب وحدة عارفة شو بدها من ايام المدرسة و طموحها واضح و مخلصة دراستها بتلت سنين و نص، و مشتغلة و عم تساعد اهلها بالراتب! رح تحط حالك بموقف بايخ!!

فهمت علي؟

الموضوع باختصار انو اعرف حالك منيح و اعرف شو بيناسبك... بيوت العالم مو سوق خضرة لحتى يروحو الأمهات يدقو بواب العالم و يقعدوا يتفرجوا ببناتهم و يعلقو عليهم و يطلعوا بكل بنت عيبة... عيب هاد الحكي... و الله عيب!

الشب لما بدو يتجوز لازم يكون فاهم منيح شو اللي بناسبو و شو بدو و يدور على هاد الأساس... و ما يفوت بيت بنت الا و هو سائل عنها و عارف عنها و حاطط احتمال 70% انها متل ما بدو...

الشباب لا تزعلو من الحكي...

و احمدو الله انو صار في الوم مدونات ممكن تعطيكم فكرة البنات كيف بيفكروا لحتى تتجنبوا لأغلاط اللي ممكن تخرب عليكم...

و سامحونا...

غير معرف يقول...

يعني انت برأيك إنه إذا فرضاً واحد دارس تجارة بصيرش يتقدم لوحدة درست هندسة و لا طب
و إذا دكتور بصيرش يتزوج ممرضة لأنه عيب و مشكلة فالمتزوجين ناوين يدخلو في نقاشات علمية مع بعض
صح هيك
يعني اذا كان من سنتين مش عارف يحدد أهدافه بصيرش يفكر يتزوج وحدة خلينا نحكي فاهمة و بخليش البنات فش عندهم عقد!!!!

Naryat يقول...

اشي زي هيك...
ليش الشب بيحقلو يطمح دايماً انو ياخد البنت المهندسة و الدكتورة و اللي معها ماستر و اللي معها دكتوراة حتى لو فات الجامعة دفش و هو مش عارف شو بدو و مش هامو غير يحصل هالكرتونة يعلقها عالحيط، و البنت ازا كانت تعبانة على حالها و طول عمرها مجتهدة و و بتطمع تاخد واحد -عالأقل- زيها، بتتهموها انها معقدة؟

يا اخي افهمو... الموضوع مش شوفة حال ولا اشي... الموضوع موضوع خبرة بالحياة... و الشب لازم يكون مدعوك اكتر من البنت، و عندو خبرة اكتر من البنت.. و نظرتو للحياة اوعى و انضج من البنت!
كيف بدي اقتنع انو شب اهلو عم يدفعو عدراستو و بجوز بيدرس موازي ولا بجامعة خاصة، و ما بينزل من سيارتو غير على باب محاضرتو، و ما عمرو سافر غير سياحة، و ما بيعرف اكتر من صحابو اللي بيلعب معاهم شدة بدو يقدر يرضي بنت طموحة، دارسة، معتمدة على حالها، مستقلة، واعية و عندها نظرة بالحياة؟

ازا الشب ما اندعك بحياتو و ما فهم وين الله حاطو غير على كبر، هاد مو ذنبو... بس بالمقابل لما ييجي بدو يتجوز يدور على بنت عيلة متكتكة دلوعة اهلها، ابوها كان يوصلها عجامعتها، و مصروفها بجيبتها، و ست بيت و بتوجّ وجّ شمس الضهر ما شافتها، دارسة تربية ولا ادارة اعمال...
و يتركونا من المهندسة و الدكتورة و حاملات الشهادات العليا!

الحكي مش لالك انتا اخي... الكلام للجميع...

الرجولة مش بس مصاري و راحة مادية و قوة عضلات و جسم بدي بلدينغ و فتاحة و كاريزما مع البنات...

الرجولة وعي... و طموح، و ثقافة، و خبرة بالحياة، و اعتماد عالذات، و هدف واضح، و اجتهاد... و ركازة... و وضوح بالرؤية...

الرجل الحقيقي بيعرف شو بدو... و بيعرف شو مواصفات شريكة حياتو اللي بيتمناها، و بالمناسبة بيدور عليها لحالو... مش بيترك امو تروح تدورلو شروي غروي و تفوت كل بيت و تتفحص كل بنت! بيوت الناس مش سايبة! و بنات الناس مش بكس خضرة!

غير معرف يقول...

تعرفي فكرة دق بواب البيوت انا مش معاها كثير .. بس برضوا انه البنت تتعرف على 10 -15 شب ، و نفسي الموضوع بالنسبة للشباب اللي شفتهم بحكي و بطلع وراح جاي مع البنات و بعدين و لا اشي ... سلامة تسلمك ، فمرات الروحة على البيوت و دق البواب أسلم

موضوع انه ما بصير البنت يكون عندها طموح لأ طبعاً لازم يكون عندها طموح و هي حرة لأنها قبل ما تكون بنت هي انسان

بس ليش العنصرية اتجاه كلية ادارة الاعمال (مع انه دخلهم من ناحية عملية أكثر من الطب و الهندسة) و لا التربية ، يعني طلاب الطب بعجبهمش طلاب الهندسة و الهندسة عندم مشكلة مع تبعين التجارة اللي عندهم مشكلة مع تبعين التربية و الآداب ....... و الموازي و العادي

الموضوع الدراسة في الجامعة في البلد أصلاً النظام كله غلط بغلط .

Naryat يقول...

:-)

انتا زعلت من العنصرية ضد ادارة الأعمال؟

خلص يا عمي ولا يهمك طلاب ادارة الاعمال احسن ناس...

مش القصد لا هو عنصرية ولا اشي... بس معروف انو في تخصصات بدها تعب و تخصصات اسهل... في ناس بتتجنب الصعب و بتسمي اللي بيروحو للتخصصات الصعبة باجريهم معقدين، و في ناس بتختار الصعب و بتسمي اللي بيختارو التخصصات السهلة دلوعين... و كل واحد الو الحق يختار... و اللي بيتعب مو متل اللي ما بيتعب!! و كمان بنفس الوقت اللي بيختار الصعب بدو يعرف انو ما بيصحلو يلعب و يتلهى زي غيرو!

و انا معك مية بالمية انو لا الشب ولا البنت بصير يعرفوا 10-15 واحد\وحدة... مو هيك القصد... بس في الف طريقة مشان الشب قبل ما يفوت بيت البنت يعرف عنها و يسأل عنها و ياخد فكرة عن حياتها و عن شخصيتها، و مش غلط يخترعلو شي فنتيكة مشان يشوفها عن قريب و يكون عالأقل عارف انها مرشحة قوية!
مش يفوت بيت العالم و يستقبلو و يدفعولهم عكل جاتوية نص ليرة و عكل قنينة بيبسي 75 قرش، و بالآخر تطلع مش عاجبيتو و أمو ما توصل باب الدرج الا و هي ناجريتها مش مخلية فيها اشي ما حكت عليه!!

فُهِم صديقي؟ :-)



(مياسي ببرطلك بعدين مشانك سمحتيلنا نتهاوش هون بحوش بيتك، اوكي؟)

غير معرف يقول...

يلا كويس انه اتفقنا على اشي :)
لولا انك في الاول اعطيني شعور انه البنت مغلوبة على امرها وا للي بجيها لو كان على رايك ضايع لازم توافق

بس اللي مش قادر افهمه هو انتم ليش بدكم الوحدة تيجي و تحكي عن ابنها حكي مش بزيادة، زي هو كان لازم يخلص الجامعة بخمس سنين بص خلصها بستة و نص، هو صحيح لسه ما كون حاله ، و لا قدامه و لا وراه شو رأيكم تعطونا ؟؟؟!!! هالكلام كويس ..

قط البكتريا يقول...

Naryat

عفكرة انا صار الي فترة بتدخلش وبعلقش ومبتدخلش ولا بسوي مشاكل بالحياة الانطرنطيه مكفيتيني الحياة العملياتيه
بس اسلوبك انو البنت الي عارفة والشب الي مو عارف والشهادة والمستوي العلمي عفكرة
كلامك ببساطه لايعدو كونو كومة من الخزعبلات الي ما بتطعمي خبز ( بالفلاحي حشي فاضي )
المقياس مش الشهادة لانو 90 بالمية من المخلصين دكتورة وماستر ما بتشتريهم بسوق الزلام بفجله والبنات كمان
وعفكرة بالغالبيه الكبرى منهم جاهلين وماعندهم ثقافة
اهم اشي الشخصية وانو يكون رجل بمعني الكلمة ويكون عندو شخصية واهم اشي يكون بينهم قواسم مشتركة واهتمامات مشتركة
يعني اشي يبقي الاهتمام بين الشخصين مستمر وما يتسلل الملل والروتين بينهم لانو هو سبب قتل العلاقة وفشلها

Naryat يقول...

Anonymous,

Walla ya sadiqi el benet aktar shi bet7ebbo el sara7a... o abya5 eshi enno el shab yet2addam 3ala enno eshi kteeeer fa5em o kteeeer wow o tbalesh el benet tektashef shwai shwai enno mesh heek!!
lamma el shab yru7 ye5tob benet, mafrood ywarjiha 7alo bel zabt metel ma hu, o heye tqarrer! welbenet elli ma bte3jebha metel ma enta bebasa6a ma btestahalak sadiqi :-)

Qe6 El Bakteria,

Erja3 2e2ra shu katabet kaman marra

o 5alas jad bekaffi 2allalna zoo2 3albenet bema feeh el kefayeh!!

Mayyasi 3yuni sorry kteer, hai la 2elek: http://pixdaus.com/pics/1216941470gmZr5me.jpg

سراج الماضي يقول...

نقاش جميل و ممتع من الجميع ....
لا مشكلة دائما من النقاش طالما الحوار موضوعي و هادف و بشكل مؤدب ومهذب كما حدث هنا ....
الصراحة أن موضوع الزواج و طريقة الزواج التقليدي وإعجاب أهل العريس بإبنهم أو أهل العروس بإبنتهم وفخرهم بهم شيء طبيعي جدا

المشكلة الوحيدة هيا المبالغة، وعدم دراسة أهل الطرف الآخر قبل التقدم للخطبة

فالبعض لا يلجأ للمنطق أبدا ، فيجب البحث عن التوافق الإجتماعي والثقافي والأسري لا أن نذهب لزيارة الناس بدون تخطيط فنحرج الناس ونحرج أنفسنا

Ehab يقول...

ههههههههههههههههههههه
هههههههههههههههههههههههه


طيب احنا في مصر وفي الأرياف بالذات موضوع انها تبقى مدرسه ده مهم جدا لأنها بتجيب دخل من وظيفه بيفضلوها قوي للبنات

غريب ان عندكم نفس المبدأ


سلااااااااااااااااااااااام

Amjad Wadi يقول...

قط البكتريا

عزيزي .. ممكن بس تورجينا من وين جبت الاحصائية تبعتك ؟

يا ريت الواحد يحاسب على كلامة قبل ما يكتبه

احترامي

غير معرف يقول...

Naryat
بصراحة مفمهتش كثير يعني انجليزي معرب و انتي بتحكي عن الثقافة يعني !!!

مين قال بدناش توافق اجتماعي و لا ثقافي نفسي افهم

Naryat يقول...

غير معروف،
مهو المشكلة انوكمبيوتر الشغل عندي ما بيكتب غير انجليزي
ما فيو حرف عربي
المهم، كنت بحكي انو اهم اشي الشب لما يروح يخطب بنت يحكي اللي عندو بصراحة... و يحكي للبنت وضعو متل ما هو، لأنو ابشع اشي انو الشب يتقدم لبنت على أساس انو هو الخيار المثالي و انو ما في منّو (سواء لأنو كزب أو لأنو خبّى اشياء معينة) و بعدين تبدا البنت تكتشف شوي شوي انو كان -سواء هو او اهلو- معطي عن حالو صورة اكبر من حجمو...
صدقوني وقتيها بينزل من عينها و عمرها ما بترجع تحترمو...

هلأ الشب عليه انو يحكي عن حالو للبنت بصراحة، و البنت بتقرر ازا بيناسبها ولا لأ... ازا كانت البنت مقنزعة و منافسها حامضة و ما رضيت برادة منها، فوقتيها بتكون ما بتستاهلك!

بعدين يا جماعة انا ما حكيت انو البنات هم اللي فهمانين و الشباب مو نافعين! حدا يحطلي خط تحت جملة انا حكيتها و هيك معناها!!

انا حكيت انو لازم يكون في توافق... و التوافق بيتضمن انو الشب يكون سابق البنت عالأقل بخطوة! يعني ما بينفع بنت طموحة و جدعة و مجتهدة و ذكية تاخد واحد عادي... لأنو رح يوقعوا باشكالية من تنتين:
-يا اما البنت بتهدّي اللعب شوي مشان جوزها يبين جنبها و ما تصفّي هي ماخدة كل الأضواء، و بالنهاية بتنخنق لأنها ما عم تعيش بكل طاقتها، و عند اقلّ هوشة "ممكن تكون اقل من عادية بين زوجين تانيين" رح تسير تعيد النظر و تندم و تقول: "هاد هو الزلمة اللي انا حرمت حالي من نجاحي مشانو؟"... و اظن هاي نهاية خطيرة!
-يا اما الزلمة بيضل بينو و بين حالو يحس بتفوق مرتو عليه و يكبت، و يكبت... و يكبت... بس بالآخر ممكن يوصل لحد ما يستحملو. الاشي الخطير مو هون، الاشي الخطير انو هاد يتحول لدافع خفي عند الزلمة و هو مش عارف يخليه يظلم مرتو، او ينعكس على تصرفات سلبية عندو، زي انو مثلاً يقيد بناتو و يمنعهم من انهم يطورو حالهم كنوع من الانتقام الغير واعي من أمهم، اللي عملت عندو بدون ما هو يحس نوع من عقدة النقص.

بعيد و بكرر، لا البنات احسن، ولا الشباب اسوأ... بس التوافق مهم كتير...

و سامحونا...

Unknown يقول...

هههههههههههه
جد شي بمغص وبطلع المرارة من مكانها

يختي خليها تعمل إبنها مخلل وتخلله عندها احسنلها من هالعجئة يلي مغصتنا فيها

عادي هالشي مشترك بين بلاد الجرب كتير

عجبتني المدونة... متابعة