الأربعاء، 5 أغسطس 2009

الحلـوان .. أخيـرا!!!


اليوم شفت ايناس واخدت حصتي من الحلوان
مـا طلع كعك عيد زي ما كنت مفكره؛ اشي زاكي كتير وطعمه هيل :)

طبعا بلشنا لقاء القمه "بالنميمة على الشعب البلوجري" لازم دايمـا هيك بنعمل بس نشوف يعض

قعدنا بره وفي "عشيرة" نحلات "قززوا" ايناس بحياتها؛ وانا احكيلها يا بنتي طنشي ما بيعملولك شي بس ولا حدا هون!!! كان لازم صورتهم هم كمـان

اليوم نار الله الموقده جد؛ الشوب والرطوبه فظيعه؛ ايناس عزمتني على كوكا كولا مع الحلوان؛ قلتلها صحيح يا ايناس انا ما بحب الكوكا كولا بالمره بس هاي ازكى كوك شربتها بحياتي!!!

السفن دايت لايناس والكوك إلي؛ والصوره بناء على طلبها قال بدها إثبات إنها حلتني؛ هاي يا عمو اثبات وما تخافي ايناس ما رح انشر الصوره التانيه:)

وطبعا لانو ختامها مسك رحت على القسم واكتشفت انو السكرتيره مروحه قبل نهاية الدوام بشي ساعة ومش مسلمه رئيس القسم نموذج تحديد موعد المناقشة!!! مع اني سلمتها ياه من يوم الاثنين والمفروض المناقشة الأحد!! طبعا بلاش احكيلكم شو صار فيي!! وسحبت حالي انا وايناس وروحنـا

وعلى هيك في بكره كمان مشوار من صباحية ربنا علشان نموذج !!! والله المستعان!!!

ملاحظة: عاجبيتني الصورة كتير!!! مش مصدقه انو أنا صورتها!!!

هناك 34 تعليقًا:

غير معرف يقول...

يا عم الحلوان لناس و ناس
انا خلص بدي اسحب صوتي :)

مبروك مرة ثانية و صحتين

Dreamy Villager يقول...

يا إلهي...طلعت العلبة البيضاء إلك كلها؟! ولا خلت حدا يقرب عليها...وكل اللي صحللي حبة :/
بس شو انت جايبيتلها هدية من مجوهرات النوخذة علشان الفوز.. وأنا رحت بدون اشي ؛)

بعدين يا محمد..وين الفطور اللي وعدتنا فيه :(

Unknown يقول...

@ allouh

بس بلاش:) اللي سحب سحب :)

على قلبك


@ Dreamy Villager

لوول:) صحتين؛ بتحكيلي ايناس انو العلبه طلعت نصيبي بالآخر:)

انا مش جايبه هديه يا دريمي؛ العلبه البيضا كانت محطوطه بالكيس وصارت ايناس تتخوت على الكيس انو مجوهرات ومش عارفه شو:)

غير معرف يقول...

دريمي
انا ما نسيت :)
و انا جاهز بأي وقت بدكم اياه

Whisper يقول...

لااا ابدا مش زعلانه بالمررررررررررره ولا متدايقه ولا انو عيوني طلعو عالحلوان
انا بكره رايحه عاربد خلص :(

ضلكم اقهرونا احنا البلوجرجيات اللي بعمان و بالخارج :"(

صحه وهنا يا رب...بس ما حكيتولي شو نميتو علي :)

الله بعينك يلااا علشان تكسبو شوفه بعض مره تانيه :)

Unknown يقول...

@ Whisper

مـا في اربد ما في حلوان:) يا ختي تعالي واتحلي قد ما بدك:)

نمينا الا مالنا؛ بعدين بحكيلك :)

هو هيك النيه نشوف بعض كمان مره:) اذا صحيت بدري لاني هاد الاسبيوع كله مسطله!!

Whisper يقول...

يا ريييييييييييت تزبط :$
تتهنو يا رب
و سلميلي على ايناس كتير وعلى دريمي حاسستها راح تيجي بكره كمان :)

Unknown يقول...

@ Whisper

تعالي الاحد؛ بكره ان شالله ببعتلك ايميل تأكيد وفيه الموعد والمكان؛ حاولي تيجي ماشي؟

Whisper يقول...

خلص بستنى التفاصيل و جد جد بدي احاول اجي...مع ان مميتو ما تشجعت لموضوع الروحه لاربد لما حكيتلها :$ بس انا شطوره بالنق و الالحاح..بشوف بركي ركزت بالنق هالمره :)

غير معرف يقول...

waw so cuteeeeeeeeeee Enaso el m'7tfeeeh yslamooo.. kayni tol hal modeh bt3mli bel ka3kat :D

3njd sabaya e3malolkoun lameh eli be Irbd e2t3 nos el tare2 la Amman , w yali B Amman y2ta3 nos el taree2 la Irbed.. w keek elta2o benosssssssss :)

bcharafkoun enti w yaha ma 2lto Jumana bt7ki kteeer :D

sozan يقول...

وبعدين مع الخيانات المستمره هايييي هه انا بدي حلوان ما راح اسكت رح اشكيكم للمجتمع البلوجري خلص هه



صحه وعافيه ميسو لا تزعلي مش احنا هيك الشغله عنا بدها طلعت روح قصدي طولت روح :)
وان شاء الله تخلصي من الهم عن قريب بس بيني وبينك بس تخلصي رح تحكي والله ايام حلوة ما احنا هيك البشر كل الماضي بيصير حلو حتى بسواده يلا بدنا نحكي مبروك

غير معرف يقول...

ويلي ويلي
شو هاد ميسوو
D:
كلهم 12 ساعة ما كنت فيهم اون لاين بتصير كل هاد وانا نايمة
:)
يا ستي جد كان يوم من الاخر .. ولا احلى كمان
واليوم ان شاء الله عازمك على الفطور ميسو ;)
اسفة يا جماعة بس والله ميسة تعبت برسالتها ولازم أدللها بتعرفو كيف يعني
D:, حلو الدلال بمكانه

ياااي ياااي والاحد كمانه مع ميسة.. بس هداك ان شاء الله يوم غير شكل
;)
النحلات .. وما أدراكم ما النحلات
X:
يا جماعة وحيات الله بحياتو ما تجمعو عللي هيك كومة. طبعا بلشنا بوحدة .. ما وعينا ولا عشيرة ابو النحل كلها بتحوم حولينا... طبعا ميسو بتعرف انا شو عملت فيها ... ظلت تلف تلف حول علبة السفن لحد ما دخلت فيها , بهديك اللحظة اخدت الكوكا تاعت مياسي ,وسكرت عليها .. ورحت كبيتهم. بس الحمدلله كانو خالصين
;)
طبعا كان عندي خطة مسبقة منشان يحلوووو عنا النحلات .. رحت كبيت شوية سفن على الارض على اساس انو خلص روحو لهناك واشربو .. بس ابدا نحللات غبيات كانو..ضلو عنا ولا راحو S:

دريمي,ويسبر سوزان والله العظيم صار نفسي اشوفكم :(

محمد
:D
الله يبارك فيك ... شو اعمل هيك القسمة
دريمي

لووول .. شفتي دريمي مهو انا كنت جايبتها احتياط معي منشان اذا خلصت الكبيرة ... بس مش عارف ليش كمان طلعو الكوكيز الي بالعلبة الصغيرة اطيب من المرة الماضية مع انهم صرلهم فيها 4 ايام
:)
ويسبر اذا امك ما رضيت بالزن بس احكيلي انا بزززززن معك قصدي بودي النحلات يززززنوو كمان ;)


سوزان
D:
والله اه صح معك حق تعتبر خيانة .. بس شو اعمل يا عمي هم بس دريمي وميسو اللي طلعلم الحلة تاعتهم
لا سوسي بعرفك حنونة ما رح تمرمطينا بينهم
D:


ميسو يا رب يهدي بالك, وتمشي الامور اليوم تمام
منيييييييح اللي ما حطيتي هديك الصورة
;)
يلا ستي اذا شديتي حيلك وصحيتي بكير.. بنفطر سوا

هاي الساعة سبعة, بدي البس واطلع
:)

غير معرف يقول...

جمانة .. فعلا معك حق .. انا والله مختفية .. :( وهاد الاشي مزعلني , بس اذا ما عملت هيك بتعرفي جيجي .. والله كل حياتي بتتدمر, من ورا هالصيفي ثقيييل الدم
S:
والله العظيم حقك عللي .. حقكو عللي يا جماعة,انا حاسة بالمسؤولية تجاه اي شي بكتبه بالمدونة,ويمكن هاد الشي خلا شويت حاجز بيني و بينها .. لحد الان مشروع التضمين لساتو قائم D:

هههههههه جمانة حرام عليكي
الله يسامحك بس.. انتي بتعرفي معزتك وجبناتك كم مقدارهم عندي
;)
جي جي لا والله ابدا ما حكينا غير انك الكيوتي تاعت البلوج سفير
:)

Naryat يقول...

:-)
2lf sa77a o hana sabaya :-)
Ana masiri mlazze2 be3amman... lamma darast bakalorios kanat 3eni r7 te6la3 3ala ma aroo7 3al techno, bs sob7an Allah, naseebi bel2ordoneyyeh... o hala2 kaman hai el master tab3i bel2ordoneyyeh :-)
Elna7el ma ba7ebbo lamma ylaze2 zay heek :-S bekarkebni... badal 2a3deh jamdeh metel el lo7 la7ata yru7u lool

maroo يقول...

alf se77a w hana :)
bsor3a ente w yaha e3tarfee sho nmeeto 3ne bsor3aaaaaaa

Unknown يقول...

@Whisper

وديت لك التفاصيل بايميل؛ شوفيه وخبريني

ونقي بتركيز رجاء عشان حابه اشوفك الاحد ان شاء الله :)


@jumanah

jad enek nahfeh:) la ma 7akena she e6amani :D

Unknown يقول...

@sozan

حطي الشكوى بصندوق الشكاوي لانهم كتروا شكلو:) هايني بستنى الايام الاخيره على اساس والله يستر من اللي جاي:(

@eNAS

يسلموا على فطور اليوم:) جد كان زاكي وحاسه خالي شبعانه عالاخر:)

هاد مش تعليق هاد بوست لحالو!!!

Unknown يقول...

@ Naryat

sheklo fe3lan maseerek marboo6 b amman, 3la kulen irbed haiha greebeh mush hal masafeh y3ni shedy 7elek o ta3ali yalla:)

ana el na7el makhdeh 3leh, o batsaraf o al k2enu mawjood 7ata es2ali enas :)

@Maroo

3la galbek, o la she enty el marah el jay benem 3leki lool :D

غير معرف يقول...

مبرووووك لأيناس
بس لازم يعني تجرو ريقي على الحاجات الحلوه دي

ربنا معاكي في الرساله ويوم الاحد
مبروووووك كمان مره

Amjad Wadi يقول...

مرحبا

ان شاء الله الأحد المناقشة ؟ بالتوفيق ان شاء الله ... و بحكيلك مبروك من اليوم ..

بعدين هاي ايناس ما جابتلك حلوان هيك لله .. هاي بتنظر لبعيد .. عارفه عندك مناقشه الأحد و أكيد الحلوان الجاي راح يكون عليكي :)

غير معرف يقول...

D:
أمجد ... الله يسامحك بس .. ضروري هيك على المكشوف يعني
ميسو ... عنجد انا هيك!!
P:

قط البكتريا يقول...

هاظ على مايبدو( المرتع ) الرئيسي للمدوينات باربد ... همممم
تاني اشي ليش الحلوان بس للبنات ؟؟
انا خلص بدي اعطي رقم حسابي لايناس تودعلي فيه نصيبي من الحلوان

صحيح مياسي ... فكرتك مفلسه طلعتي بتهادي مجوهرات
وشو كيس بلاستيك كبير يعني ابصر كم كيلو فيه

محمد حسن العمري يقول...

مرحبا مياسي ..
عندما اكون بالوطن لا امتلك اقل الوقت لقراءة شيئ جميسل كهذا ، سافرت الفجر اليوم لعلني اقراء كل ما كتبه الاصدقاء قبل ان اعود مرة اخرى الى الوطن حيث اتفرغ للوطن وانسى الكتابة والقراءة..!

محمد العمري يقول...

بالنسبة لتدوينتك عن حرب الخليج الثانية ، فهي التي احاول دائما التهرب منها ، كنت في الجامعة الاردنية التي قادت فيها الحركة الطلابية الاسلامية الاتجاه تيارا عملاقا لتأيد العراق - وكنت منهم ومعهم- وتركت الامور التي تكشفت فيما بعد غصة ، لكن الغصة الاكبر هي الشرخ النازف في عظم العراق الى اليوم ، وجعلنا نحب صدام ميتا مرة اخرى اذ تؤذي ابصارنا كل يوم وجوه مقرفة مثل الربيعي والمالكي وطالباني ، هذه التي باعت واشترت في العراق فيما باع اشترى صدام لكنه لم يبع..!

Dreamy Villager يقول...

مناقشتك يوم الأحد ؟! بصير آجي ؟

Unknown يقول...

فتاة من الصعيد

الله يبارك بعمرك يسلمو:) ادعيلنـا يوم الأحد يمر على خير


أمجد

تعرف ما حسبتها هيك؟ شكله فعلا الحلوان رح ينسد بسرعه:)

Unknown يقول...

ايناس

لا انتي مش هيك؛ يوم الأحد بيبيّن :)

قط البكتيريـا

من وين لوين؟ الحال عالله والكيس لإيناس وصغير وكانوا فيه الكوكيز؛ ما تفكر هالأمله!!!

Unknown يقول...

محمد العمري

الحمدلله عالسلامه؛ واضح انشغالك

بالنسبه لحرب الخليج لا افهم السياسه كثيرا؛ ولكني اظن أن كثيرا من الخلط-كعهدنا دوما قد حدث- والحال اليوم لا يسر أحدا

دريمي

طبعا بيصير؛ وديت لك ايميل بالتفاصيل شوفيه:)

قط البكتريا يقول...

انتو اهل اربد مخبين بقشوركم ... بس عمين يابا معناش مصاري احنا ... ماشي ماشي اصلا مش حتدين منكم ماتخافي

Unknown يقول...

قط البكتيريا

والله يمكن ما دام معظم اللي انكسروا بالبورصه كانوا من اربد :) بس بأكد لك كل اللي معي 11 ليره وطباشه:)

غير معرف يقول...

قط البكتيريا
لا هاد الكيس مش اللي . هاي ميسو جابتلي فيه خاتم :]
يعني هيك فيو حجر روبي عالمااشي
و من ابو ظبي ... مش حيلاا

بعدين البكتيريا شو بدها بالفلوس مهي مكفية حالها بتتغذى عالبني ادمين
P:

حياة تستحق الانقاذ يقول...

تب لييه ما بتعزموا يا جماااعة
يعني مو مدونة صيف 2009 وجاي هالناس ومنتخبين وزعولكم كنافة ببسي بلااااش حبة شوكلاتة :)))
تتهنوا يا رب

حياة تستحق الانقاذ يقول...

استنوا استنوا وفي مناقشة كمااان ,,, خلص كملت ع راسك ميوس :))

Unknown يقول...

أم المييس

اتورطنا:) إلك أحلى حلوان بس يا جماعه بينوا:)