الجمعة، 10 يوليو، 2009

الجـلايّه اللي عليها رساله!!

هاد اللقب اللي طلعت فيه تقريبا من أسبوع؛ من وقت ما اجو أهلي بالزبـط-مع انو انا جلايه من زماااااااااااااان

ناس فايته وناس طالعه؛ قرود بتنطط وعفاريت صغار بتعيّط

ضيافه رايحه وضيافه جايّه؛ اعملي شاي؛ حلي عصير؛ شقحي بطيخ؛ طبعا غير الجلي والناس والصياح-أختي بتساعدني والله كتير اذا مش عم تبلش اكثر؛ بس هي بتطلع من حصتها الضيافه أكثر شي؛ غير هيك وراها امتحانات فيرست والثانيه مش ملحقه دراسه من هالميمعه!!

احنا مشكلتنا الرئيسيه بتتركز في العدد؛ يعني ممكن تطلعي شي 20-25 كاسة شاي عالوقعه- وعلى فكره هاظول مش دايمن بيكونوا ناس جاي تزور-لا يابا ممكن يكونوا اولاد عمامي بس حابين يسهروا للساعه واحده ثنتين تحت الداليه ويا حرام بدهم حد يسليهم!!!

طبعا من أسبوع وانا بس عالسيناريو التالي:

اجلي جلي الفطور؛ حطيلنا غدا مش عارف شو في وراهم؛ بيرجعوا نص العيله من الجامعه برجع بحط أكل كمان مره؛ وبجلي؛ بالليل بيجو ضيوف جداد بنرجع بنعمل شاي وبنحط عصير وبنركب قهوه تكمالة السهره

بتودي الصغار يعدولك البشر اللي قاعده برّه؛ بتحطي شي 10 كاسات؛ بتيجي الوالده: شو هاظ؟ زيدوهم صاروا شي 15!! وبعدين؟!!!

بفوت عالمطبخ مره كل ساعه او نص ساعه بكتشف أنو كأنك يا ابو زيد ما غزيت!!!

المطبخ متروس ترس وبرجع بجلي كمان مره؛ هديك المره جليت يمكن الساعه 4 الصبح!!

أمي العزيزه عندها مفهوم واحد عن كونا انا واختي معدلات وشاطرات؛ لازم تظلي بالمطبخ واقفه؛ يا بتحطي ضيافه يا بتجلي؛ ودايمن اذا ما طلعت الضيافه بعد شي 10-15 دقيقه عالاكثر بتيجي تبهدل؛ غلبت وانا بفهمها انو عادي والمسائل ممكن تمشي اسلس من هيك بس مشان الله تقعد مطرحها وتتركنا ندبر المسائل بس وين تا تقتنع!!!

اليوم حكيتلها مشان الله؛ الشغاله اللي موصين عليها من المكتب مش ناوييين تجبيوها؟(بتخوت طبعا) ولا الشغاله اللي حاطه بلاشر-كريم اساس يعني- خلاص بتكفي؟ (قصدي عن حالي أكيد)

بتذكر مره كنت انا واختي قاعدين بنتفرج على مسلسل سوري؛ بما أنو الشوام بيضيفوا دايمن قهوه-مش شاي على طول زي الأردنيه- البنت فاتت يا دوب؛ ركبت القهوه هوب صارت خالصه-شغل مسلسلات يا عمي- بحكي لأختي أيواااااااااا؛ زي هيك أمي لازمها بنات؛ بس تركب القهوه تنزل مباشره!!!

طبعا هاظ كمان غير كونك بشتغلي سكرتيره؛ وكوّايه ومستشاره وترجمان لأخوانك الصغار-لسه عنا اعمار 15 و 11 و4 سنين حتى؛ عيله ممتده اسم الله عليهم؛ بيحبوا يجيبوا ميداليات ويتسلوا فيهم (أو بالأحرى يلهدوهم على آخر عمرهم السعيد كأنو الكبار مش كفايه!!!)؛ هاد مش عاجبو؛ وهاداك بيقاهر بالثاني؛ والفيلم الفلاني بسألوكي عنه؛ وبيزعلوا بس تطنشيهم؛ وبيتأففوا من العيشه ومش عاجبهم إشي؛ وشو هاد الأردن بتخزي وبتملل وحـاله!!!

النوم؛ انسى غرامك راح؛ من الصبح بيقعد ابوي وعمي بالبلكونه؛ وانا غرفتي عالبلكونه وهات يا حكي ومناقشات-صارلي من أول ما وعيت بسمعها؛ انا على فكره اكره ما علي حد يحكي فوق راسي وانا نايمه؛ راسي خفيفه كتير؛ عشان هيك حاطه جنبي مسجل؛ مباشره بولع الراديو على فن اف ام يا أيام اف ام وعالصوت العالي بكمل نوم اذا كمل

الرساله؛ ما بعرف والله ايمت رح تكمل مع هالوضع؛ صعب الواحد يركز بهيك اجواء؛ وعنا مناسبه وعم بلفلف بالسوق وبحمحومة الشوب صارلي اسبوع من مطرح لمطرح ويادوب ألحق؛ وبس اروح عالمشرف عالرساله ويسألني: ليش متأخره لهسه؟!!! بكون نفسي أجاوبه: والله اجتماعيّـات يا دكتور!!!

بتهون وبطلعلهـا قرون!!! وبعدين بيسألوكي ليش بعدك ما خلصتي؟!! أنا عارفه والله شكلو بتدلع!!!

ملاحظه: العنوان تسماية أخوي-15 سنه- كل مايفوت عالمطبخ ويشوفني بجلي بيحكي لي:"شو أخبارك يا جلايه عليها رساله؟!!!"

هناك 25 تعليقًا:

eNAS يقول...

D:
مياسي .. حاسك بهالبوست فرغتي كل الشحنات اللي قاهريتك ... فعلا اشي بجنن (وبفقع كمان).

على قولتك بتهون وبطلعلها ذيل وقرون :)

طبعا لو واحد من اخوانك الشباب .. ما بهكلو هم, على اساس انو الضيافة, الجلي , والتعزيل , والركض ورا الصغار , هي مسئلة تتعلق بكونك أنثى , وانو لاااااااا شووووووو عيب أنا اعزل واجلي , انتي بنت لانوو ف عااادي , فكرك حدا بقدر هالمسائلة, لو واحد من الشباب مد ايده وساعد, بتضل امك تحكي ما شاء الله عليه فلان والله انو بمد ايده بهيك وقت.. انسي ما بدي ازيد همك لانه بهالصيف هيك شغلات دايما موجودة , والقرايب بحبو يجو مع بعضهم
D:

ممكن تحكيله هي صارت رسالة عليها جلاية

والله لساتني بضحك على وصفك . متخيلك هيك بالمطبخ مع خواتك وبتجلو ومعجوقين
وبتشقحوووو بطيخ
=)

يلا ميسوووو شدي حيلك شدي , بدي اعمل حفلة بالجامعة بس تخلصي من همها للرسالة
انا لساتني بمرحلة التطبيش .. ولا حتى عارفه أطلع منها. فكرت الوضع اسهل من هيك :(

الله يستر من يلي رح يجي


دمتي بخير وهنا وصحى احلى ميسو :)

Che يقول...

ضحكتينى كتير يا مياسى و اتا بقرا البوست ده .. بس معلش ... هانت

Whisper يقول...

هههههههه
الله يعطيكي العافيه يا رب
يلاا الحمد لله ان في حد بساعد
انا بس يجو خواني من السفر بكون لحالي رايحه جاي, و مع كل الضيافه والجلي لازم تقومي بدورك الاجتماعي و تحكي وتتحدثي و تضحكي وانت مش شايفه الضو وبتفكري ايمتا يروحو بدي انام بكره في عندي دوااااااااااااام

وماما مش راضيه تجيب شغاله ال ايش ...ما بحب ادخل جسم غريب عالبيت, و بتسألني وين بدنا نحطها عنا شباب بالبيت
حكيتلها بنيمها عتختي وبنام عالارض...بحطها عراسي بس جيبوها :$

فتحتي جروحي انت,ونسيت حالي ونسيت ان الموضوع عنك انت
هههههههه
الله يعطيكي العافيه والحمد لله على سلامه الاهل وان شاء الله دايما بيتكم عامر بالافراح :)

sozan يقول...

والله العظيم ضحكتيني وذكرتيني بحالي لكن هه عندك اللهم صلي ع النبي اخت تساعدك انا اختي تحكي انا عندي توجيهي وهي راسبه مرتين وكانت تحكي انا بادرس وتطلع من راسي غير انه لازم اجامل واحكي واضحك وانا مش جاي ع بالي اشوف حدا
حلو كتير على الرغم من القهر اللي حاسيته اللي عندك حس فكاهي حلو

77Math. يقول...

قلت لك نجيب شقة وننفصل عنهم ما وافقتِ :p:p

ميسم يقول...

يعطيك ألف عافيه مياسي بتعرفي شو الحال من بعضه بتكوني ضايعه ما بين المطبخ والضيوف والمجاملات الفاضيه والصغار الي بنطوا هون وهون وفوق كل هاد امي بكونش عاجبها اشي روحي وتعالي وبالأخير كله عالفاضي لا حمدا ولا شكورا

AnGeL يقول...

مرحبا

بتعرفي والله كنت ابكي انا فاهمة تماما بشو عم تحكي

بجد مرت علي فترة زي هيك واكثر

مابشوفوني الا عالمجلى للحظه حسيت حالي انو انا عاملة عقد
ابدي مع المجلى مافي غير بجلي فوج رايح وفوج جاي

من وقتها لهلاء كل مااسمع انو في حدا بدو يزورنا صرت احس بإحباط
هههههههههههه


صحيح ماعلق بس
بقرأ مدونتك دايما وموضوعاتك مهضومة
بالاخص عن العرسان ولاد العالم :D

ارق تحية لإلك مياسي

بسمة يقول...

مياسي والله إني حبيتك
بتعرفي اني ضحكت بأعلى صوتي عند نهاية تدوينتك.

هيك الصيف، مرات كتير بحكي الناس بالصيف بتنبسط، احنا العكس.
الحمد الله احنا الوضع على أخف شوي.
معلش كله شهر ونتوفة ويبدأ رمضان، صحيح جلي رمضان أضعاف جلي باقي الاشهر بس بسيطة، يعني كلها 3 اشهر وبتهون

محمد حسن العمري يقول...

مياسي مساء الورد..
باقراء في السوسنة انه تلاكو فيه عزومة مطنطة لنائب في البرلمان..!!
على كل حال الشاي والعشاء عندكو من بعضه - يعني نفس الحال وانا اقضي الايام القلية بين الاهل..
بس انت تمتلكين الجراءة للتعبير عن الزهق والروح الطالعة.. احنا لا نجرأ على ذلك ولا بقولوا فلان ابن فلان متثقل من الضيوف وبشهر فينا على النت..
بكون كثير وضعك احسن اذا العائلة الكريمة ما بعرفوا انه مياسي هي فلانة بنت فلان وحفية فلانه..
سلامي لك شخصيا ولقلمك الرائع اكثر..

همسة يقول...

اييييييييه اللي بشوف بلاوي الناس بتهون عليه بلاوية
انا لحالي ما عندي خوات (مزوجين )
انا الغسالة والكناسة والجلاية والطباخة full option ولله الحمد
ولسه يا ريت طالعين ببياض الوجه !! اللي زعلان ليش الغدا تأخر واللي زعلان ليش وانا بجلي طلعت صوت فهو ما عرف ينام !! واللي واللي ..

وهلأ الحمدلله عطلة .. وانا معلمة مدرسة جنان بالمدرسة وجنان بالبيت

بصراحة لما اتعب و يبطل فيي حيل بقلهم معلش يا جماعة سامحونا الخدمة اليوم سيئة .. ما في مجال تشوفو فندق تاني !

قلبتي عالواحد مواجعو

Mohammad B. Irshid يقول...

LOOOOOOOOOOOOOOOOOOOOOOOOOOOOL
well kinda funny but i think it's a women's issue which no male can discuss it.
You can't say NO? tell them about your current situation, i guess they will understand.
Good luck mayyasi

Amjad Wadiِ يقول...

Salam kifik mayyasy

Sorry for not being active ehre lately, i just dont get online much .. I hope soon I will be able to read and comment normally.

jafra يقول...

هادا هو الصيف بالاردن
بتذكر لما كنت اجي اجازة بقضيها بالمطبخ لا وكنا كمان احنا اللي جايين من السفر
بس هاي الايام حلوة بكرا رح تفتقديلها اسالي مجرب
دوشة و جلي و حالة
وولاد و الختمة دايما بسدر كنافة شو السر ما بعرف
يعطيكي العافية
و لحقي رسالتك قبل ما تملي
اللي بضل ياجل بمل و ما بيقدم التميز اللي بحلم فيه

jumana يقول...

saba7o mesoo kefooo???
hek lakan besoooo2 m'7tfeeh :)

ya setti malla inti ana hala2 ma 3ad jeb wlad :s W ana 3m ba2ra tel3et el song w na2azet mn el na`3ameh,, inno ana l7ali w el sa3a 2:00 am tab fe 7ad bel bait w mobilo 3m yrnnn :S :s Mskwni ME :(

zkrteni lama knt be Amman.. el zyarat wl 3alam wl sahrat zate l she.. bs ana ma knt ajli.. mrt bayee w neswan '7wati bejlo w be7dro :) ana b7eb ashtof :D

bnsa7kon la tjebo san3a.. lano mara san3et bait ahli harbet el mskeneh, harbet mn ghair 7ata ma takhd msari :D :D

A7SN SHE jebo jalaeeh w hee btjli l7ala :S 7aram el amar edal 3l majla.. w resali.. 2oli lel doctor ta3al '7edlak shoot she leleh 3l mjla :D

V NICE POST ;) yala bdal ayam 7lwi bokra bs ttzawji inchallah bttzkreha

bi bi =) habibi mwa ;)

مجموعة حياة يقول...

ما بتسمعي بمثل بيحكيلك العمر بيخلص والجلي ما بيخلص ؟؟؟
ع اساس اني بجلي كاسة يعني او بضيف حد P:
بدي احكيلك شي كتييير رح يساعدك " هناك متسع من الوقت لكل شيء" فكري بايجابية و ركزي على انهاء اكبر عدد من الاشياء مثلا مش لازم تغلي قهوة كل شوي اعمليلك براد قهوة وبراد شاي وبصير بدك دخلتين عالمطبخ بدل كل شوي
كيف انا معك مياسي؟؟؟


أم المييس

مياسي يقول...

إينـاس

والله شكلو انتي اللي لازمك بوست هون!!!
هاد كش تعليق هاد مجلد ماشالله!!

فعلا الام بتلاقيها بتشبر بالشب اذا قام كاسه من مكانها ما هو على قولة اخواني: انتي ليش بنت هون؟

عجبتني رساله عليهـا جلايه حلوه:)

ما تتخيلي شكلي أحسن والرساله الله بيعين عليها:)

هلا أنووس



عمرو

يلا عيش؛ الضحك ببلاش ان شالله تكون هانت لأنو جد بيكفّي!!!

مياسي يقول...

همسه

يا سلاااااااااام؛ لا أنا الحمدلله اللي بدو يحكي معي بيجي عالمطبخ انا ما بطلع لبرّه:)

ذكرتيني بجدتي: وين بدنا نحطها الشغاله؟ ونفس الاسباب عنا شباب كثير بالدار!!

يعني فكرك أحطها على راسي أنا كمان؟ فكره

تسلمي يا همسه ويخليلك احبابك انتي كمان:)



سـوزان

لا والله انتي اللي ضحكتيني على اختك؛ جد نهفه:))
ما بتسمعي شر البليه ما يضحك؟ أنا هيك ما بعرف أقلب حزايني!!

مياسي يقول...

77Math

الا مالك قلتيلي!!! فرصه افكر بالموضوع كمان مره:)



ميسم

الله يعافيكي:) هو فعلا بتكوني موزعه حالك بألف مطرح؛ بالأخير ببطل اركز شو بدهم مني!!

يلا بتهـون!!

مياسي يقول...

انجل

اتفاجأت بوجودك بس انبسطت بنفس الوقت:)

وعقد أبدي مع المجلي جد عجبتني كثييييييير:)

العرسان خليهم على الله لسا في قصص جايه عالطريق!!

تحياتي الك كمان يا انجل؛ ابقي ضلي طلطلي هون:)


بسمه

:) وبصوت عالي كمان؟ هاي مش تدوينه مع اني كتبتها مره وحده وبسرعه من قهري!!!

لا رمضان الجلي فيه "دوبل" وما تزكريني فيه رجاء!! لسا ما بلخق ارتاح الا هو مبلّش!!

اهلا بسمه :)

مياسي يقول...

محمد

اكيد الحال من بعضه بس دخلك انتا بتوقف على مجلى شي؟

منك على فكره عرفت انو في عنا عزومه يسلموا عالخبريه:)

بدك ياني اكتب باسمي الصريح؟ لا دخيلك خليني هيك احسن طبعا مستحسن ما حد يعرف عني شي بالمره؛ انا هيك ومش خالصه!!!

شكرا يا محمد:)



همسه(بالعربي)

اسفه على تقليب المواجع-شفتي طلعوا كل الصبايا عندهم مواجع كمان!!!

هاي ياحبيبتي انتي لازمك راتب شغاله عهالوضع؛ وبعدين أسوأ شي تخدمي الشباب دايمن مش عاجبهم شو ما عملتي!!!

زكرتيني بحالي بس اخوي ما يعجبو؛ بحكيلو اخصم من راتب الشغاله اللي جايبها وحل عني!!!

مياسي يقول...

M. Irsheed

yea it is a women issue, but sometimes u have to participate in house work, especially when number of girls is few, n other option lel asaf :-S

Amjad

welcome, long time not hearing from u, how is Canada?

i am waiting for ur comment, so do not be late plz!!!

مياسي يقول...

jafra

يعني الحال كاين من بعضو!! بتعرفي هلأ لسا اخف من عجقة زمان؛ هديك الايام الله يرحم لازم ينكتب عنها بوست لحالها

ما في عنا صدر كنافه للأسف؛ وليش لللأسف صح انا ما بحبها كتير اصلا!!!

والله انا مليت وخلصت!!! وجزئية التميز الله يستر منها!!!


Jumana

bedna nghayer el ughneh o nu76lek 7azaini :)

ana el sha6ef bakraho, o la b7iaty 3erft azabe6 la sha6ef o la mase7 shababeek!!!

mnee7 eli fe 7ad yedayef 3anek, enty y3ni shughol mujamalat!!!

yeslamoo honey, kol el zulom lazem yakhdoo dawrah 3al majla 3shan ye3refo en allah 7ag!!!


أم الميييييييس

هلا يا بنتي؟ وين هالغيبه؟!!!

والله انا بسمع بالعمر بيخلص والشغل ما بيخلص!! زي ما تحكي نسخة المثل تاعتي أعم!!!

والله مع انو بدارنا صعب أفكر بايجابيه؛ لأنو ما حد رح يقبل الفكره من الشباب الطيبه!!! بس بشوف شو بيطلع معي!!

Princess N يقول...

WOW..

God be with you.. I can never do it.. although I never yelled at my mother by I would have gone crazy if they threw all of this on me..
be strong..

Husam يقول...

هذا تعذيب مش شغل بالبيت
هيك والدنيا صيف بس، كيف بعد شهر رح يكون صيف ورمضان....!
:)

مياسي يقول...

Princess N

:)
well u will be yelling for sure believe me, it is not easy to handle :D
thanks for the advice :)

Hussam

لكان شو مفكر؟ الشباب بيفكرو شغل البيت سهل وما فيو غلبه بس وين؟

ما تزكرني برمضان رجاء؛ هاداك هم لحاله بتوقع السنه رح اكتب عنو بوست بوقته

أهلا حسام:)