الأربعاء، 18 مارس، 2009

عن الجلباب والزواج والعلاقة بينهما

من الأوّل: أؤكد على احترامي لكل فتاة سواء كانت ترتدي الجلباب؛ النقاب أو الخمار؛ أو حتّى لا ترتدي الحجاب من الأساس

لم يعد من المستغرب مؤخرا؛ أن يصر كثير من العرسان المتقدمين لخطبة فتيات كثر؛ سواء كان ذلك عن طريق الزواج التقليدي المتعارف عليه؛ أو حتّى المتقدمين عن سابق معرفة – أو عن حب بالمعنى الدارج – على ارتداء الجلباب كشرط مسبق لإتمام الزواج.

وأنا هنا أتحدث عن تجربتي الشخصية في هذا المجال؛ اشترط عدد لا بأس به ممن تقدموا إلي هذا الشرط مسبقا؛ ربما كان ذلك لأن بعضهم كان متدينا بشكل شخصي – بمعنى أن يكون من عائلة معتدلة إيمانيا؛ ولكنه قد اختار طريق الالتزام كخيار يخصه وحده- وأما البعض الآخر؛ فكان منحدرا من عائلة متدينة جدا بالأساس-وهي العائلة التي تعتبر الجلباب مرحلة دنيا من الالتزام؛ وتكون قمتها في الخمار كاملا.

في إحدى المرّات؛ وقف ارتداء الجلباب عائقا أمام أحدهم حتى في موضوع مفاتحتي بالارتباط أصلا؛ فقد افترض الشاب عدم موافقتي المبدئية على ارتدائه؛ ومن ثم لم يتقدم خطوة واحدة؛ وعلمت أنا بالموضوع بعد فترة بطريق الصدفـة؛ أريد هنا فقط أن أنوه إلى أن الخبرات قد تختلف في هذا الموضوع؛ لي صديقة ترتدي الجلباب؛ ومع ذلك تفاجأ أن معظم خطابها يطلبون منها خلعه!!!

ووجهت بهذا الشرط كثيرا؛ مما دفعني إلى التفكير في هذا الموضوع مطولا وفي البحث عن الدوافع والأسباب لهذه الظاهرة؛ خاصة أني قد عرفت الكير من الفتيات ممن اخترن ارتداء الجلباب "لعيون الزواج فقط"؛ اعتاد والدي مؤخرا على التلميح بأن "الجلباب كمال للمرأة أصلا"؛ يؤيده في ذلك إخواني الشباب؛ مع أني أعلم حق العلم أن الجلباب في مجتمعنا الأردني يعتبر ظاهرة جديدة نسبيا؛ كان الجلباب في مضى مقتصرا على الفئات المتدينة فعلا؛ منهم من كان يتبع أحزابا ذات توجهات دينية – خذ عندك الإخوان المسلمين مثلا – ومنهم من كان يتبع حزب التقوى فقط؛ ولكن الناظر الآن؛ يستطيع أن يلمح أن الجلباب صار كما الحجاب تماما؛ موضة متاحة للجميع.

لا أتقبل أن يقول لي والدي أن الجلباب "كمال للمرأة"؛ وأنا أعلم جيّدا أن غرضه من هذه الحكاية هو فقط "رفع أسهمي في سوق الزّواج"؛ لا أظن أن الجانب الديني هو ما يشغله بالدرجة الأولى؛ فلآن ما زلت أذكر أن ارتدائي الحجاب في سن مبكر نسبيا كان لسبب مجتمعيّ مقنع جدا في المقام الأول: "شو الناس بدها تحكي علينا؟!!!"؛ لا مخافة الله كانت سببا لذلك؛ و لا الأسباب الدينية ولا الحلال أو الحرام كانت حججا متوفرة ومقنعة؛ يعني باختصار "اللّي ما بيحجّب بنته بيكون ما عندو ناموس وخلاص"؛ والنتيجة؟ لما يقارب الثلاثة سنوات كان حجابي "نص كم"؛ يعني من باب رفع العتب لا أكثر!!!

والآن يأتي والدي ليقول لي أن "الجلباب كمال"؛ وأنا أعرف حق المعرفة أن القصد من ورائه ليس "الكمال ولا شي"؛ هو فقط مجرد "وسيلة" لا أكثر؛ وتصرف والدي مثال بسيط لتصرفات أناس كثر في مجتمعنا؛ تصرفات تلبس "الدنيا بالدين" من باب استغلال "الفرض" الديني-على اختلافه- لأغراض دنيوية بحتة؛ تماما كمن يتصدق ثم يجاهر بصدقته رياء وهو يؤكد على كونها "مخفية"!!!

صارت مثل هذه التصرفات شائعة جدا في مجتمعنا مؤخرا؛ هذا "المجتمع المتعال" الذي يستمتع بتصنيف الناس والحكم عليهم بالظاهر فقط؛ الفتاة "المفرعة"-السّافرة- غير محترمة؛ المحجبة – نصف لا غبار عليها- أما المجلببة- التي ترتدي الجلباب- فهي ثلاثة أرباع لا غبار عليها!!!

الأسبوع الماضي؛ صادفت 3 نماذج مختلفة لمجلببات في أوضاع مختلفة؛ دفعتني إلى إعادة التفكير في صورة المجلببات النمطية؛ المشهد الأول كان لفتاة مجلببة يمرر "صاحبها" يده على ظهره مغازلا إياها في وضوح في زاوية منعزلة من مباني الجامعة؛ الثانية؛ تسلم باليد على 3 شباب كأي فتاة "شلّة" ويترافق ذلك مع الصوت العالي وحركات "التقليع" إياها؛ هنا اعتبرت أن هؤلاء لهم أن يكونوا نسبيا محارمها وإن كانوا في مثل عمرها تقريبا

أما الثالثة؛ فترتدي "جلبابا مموضا"؛ على الموضة يعني؛ يبدو الجلباب قصيرا بشكل ملحوظ بحيث تبرز قدماها وكاحلاها البيضاوان للعيان في وضوح؛ والجلباب الأسود ضيق تم "تقييفه" فقط ليتحول إلى جلباب في صورة فستان "سواريه"؛ سهرة صباحية في حرم الجامعة !!!

عن نفسي؛ لا أرتدي الجلباب؛ ولكن أعتبر أن "لبسي على الأقل مستّر"؛ في نقاش تليفوني مع خالتي نناقش فكرة تتمحور حول التصرف المناسب في حالة فرصة زواج مناسبة تستلزم شرط الجلباب الذي يعترض طريقي؛ كان من رأيها أنني " فتاة محجبة و ملتزمة" لا أضع الماكياج ومتدينة؛ فلم لا أتمم الموضوع وأرتدي الجلباب؟ ضحكت وقلت لها: "ومن قال لك بأني متدينة؟!!"؛ أنا لا أفكر بالموضوع من منظور ديني بتاتا؛ أنا أفكر به من منظور "مصلحجي" في المقام الأول كما يفعل معظم الناس؛ لا يخطر موضوع "الكمال" هذا في بالي من "أصلو" وأقولها صريحة تماما!!؛ أعقد المقارنات فأجد أن معظم الفتيات اللواتي مررن بي قد ارتدين الجلباب لمجرد إرضاء الزوج أو الخطيب؛ والحبيب لا يخرج عن هذا الإطار أيضا!! أعرف فتاة تركت الجلباب بمجرد أن قطعت علاقتها مع حبيبها مباشرة؛ أما عن كوني لا أضع الماكياج فذلك لأني لا أطيقه فقط لا أكثر؛ وللتخفيف من وجع الرأس!!!

لا أرتدي الجلباب أيضا؛ لأني أحب أن أحترم هذا الرمز الديني؛ إذا صح اعتباره رمزا؛ كل رمز ذو صبغة دينية يفرض عليك مسؤولية إضافية تجاه المجتمع-الرموز قد تشمل اللحى للرجال والنقاب للسيدات؛ تخيل مجلببة تدخن في مكان عام مثلا!!-أعلم أن الكثيرين سيقولون لي "انو هسه صار كلو بسعر بعضو"؛ ولكن هذه رؤيتي المتحجرة بعض الشيء

ثم لم يصر الشاب هذا الإصرار الفظيع على موضوع الجلباب؛ هل هو كما تقول صديقتي: "من باب ممارسة المنظور الديني على زوجته؟" بمعنى أن تصبحي داخل دائرته الدينية وموضوع "القوامة والمسؤولية" وخلافه؟

يريد بذلك أن يكون السبب في هدايتها؟ أم هل ذلك لأسباب مجتمعية تخص صورته أمام أهله؟ أم لأسباب تخص الاستعراض والتباهي بالزوجة المحتشمة المتدينة؟

لم لا يسأل العروس المرتقبة إن كانت تخاف الله أو تصلّي مثلا؟ سئلت مرة واحدة فقط عن الصلاة؛ وكانت تلك المرة اليتيمة فيما أذكر!!

لاحظت أيضا أن من يشترطون الجلباب من الذكور؛ هم في معظمهم شباب صغار؛ يعني تقريبا في أواخر العشرينيّات ويناهزون الثلاثين؛ في فئات عمرية أعلى؛ لا يتطرق الشاب إلى الموضوع أساسا-على الأقل هذا ما شهدته بعيني في زواج قريباتي- وهنا نستطيع أن نلمح الفرق الذي حدث بين جيلين تفصل بينهما سنوات قليلة في الفكر والمضمون فرضته عوامل جديدة لم تكن قبلا

الجلباب صار كأشياء أخرى في حياتنا؛ مجرد مطية لأفعالك؛ "ارتديه وافعلي ما تشائين"؛ القنوات الفضائية الدينية التي يخرج علينا شيوخها ليل نهار؛ ساهمت في تحويل الدين إلى مجرد مظاهر و"طقوس" ؛ طقوس وليس شعائر؛ الإسلام يتحول يوما بعد يوم إلى دين "كنسيّ" للأسف؛ صار مفرغا من معناه الحياتي و"الشامل"؛عن نفسي؛ بت أرى أن الموضوع صار "مختزلا" في الصلوات والصدقات واللباس؛ والذاهب إلى صلاة الجمعة كالذاهب إلى قداس الأحد؛ "يكفر" عن ما بين الجمعتين ثم يعاود اقتراف الأخطاء مجددا؛ فالكفارة موجودة وجاهزة؛ "دع ما لقيصر لقيصر وما لله لله"!!

هذه رؤية لا ألزم بها أحدا؛ وأحب أن أقول في النهاية أني لا أزكي على الله أحدا؛ لا نفسي ولا الآخرين؛ والله مطلع على ما في القلوب.

هناك 35 تعليقًا:

Qwaider قويدر يقول...

زي ما حكيت مليون مرة من قبل، اللي بدها تتحجب، احسنلها تاخد قرارها عن قناعة بدون نفاق ديني و اجتماعي. و اللي بتتحجّب علشان تتزوّج.. مبروك عليها الزوج لكن تنسى امر الثواب... لأنها ممكن تضحك على كل الناس، بس مستحيل تضحك على ربّنا
امّا الشباب السخفاء اللي "بيشترطوا" الحجاب خصوصا بعد ما يكون عامل السبعة وذمّتها، احسنلهم يرحموا حالهم.. كلّه تمثيل بتمثيل! يعني اذا بدّو ماشالله عليه و حارسو وحدة محجّبة و اللا مخمّرة، ليش ما يدوّر على وحده هيك من اصله ؟و اللا خلص لازم يكسب حسنات على اساس انّو هداها...
و بدل ما يبدوا حياتهم و العلاقة على اساس من التفاهم و المحبّة.. بيبدوها على النفاق، و التحكّم و التمثيل و الكذب على بعض..
و بعدين بنسأل، ليش نسبة الطلاق عنّا 57%

محمد العمري يقول...

صباح الورد،،
قويدر لمن رد خلط الحجاب بالجلباب واظن انك تتحدثين عن الجلباب بمعناه عندنا وليس معناه العام..
هناك عامل اخر مضاف لكل ما ذكرتي وهو عامل اقتصادي اللواتي يلبسن الجلابيب لا يعتنين بالموضة اصلا بالمطلق وهي مكلفة دائما والجلباب له اسعار متقاربة وهو في الكثير من الاحيان مناسب في غياب -الزوق - باللبس عن البعض لانه لا يحتاج لاي تنسيق وبعزقة فلوس زائدة..
اما موضوع التدين فهو شيئ اخر لان جميع المتدينات في امريكا واوروبا لا يعرفن هذا الجلباب اصلا..

Whisper يقول...

مياسي
انا بدي احكي عن نفسي وقناعاتي
انا تحجبت وانا بالفصل التاني من السنه الرابعه بالجامعه.
ومن وجه نظر اقرب الناس الي انها بكير و انها برضه بتضيع فرصه الزواج!!!
انا لما تحجب والحمد لله كنت مقتنعه فيه 100% ومن وازع ديني بحت, وهاد يمكن الاشي اللي خلاني عمري ما اندمت اني لبسته.
وانا بس يجيني عريس يحكيلي انه ما عنده مشكله اني اشلح الحجاب, هاد انسان مرفوض تماما عندي وصارت معي اكتر من مره.


ما بخفي عليكي ان فكره الجلباب خطرتلي اكتر من مره وبرضه من وازع ديني, وان شاء الله ازا ربنا كتبلي اني البسه فراح يكون بعد ما اكون 100% مقتنعه و مستحيل ابطل البسه.
بس فكره اني البسه لانه اجا شخص وطلب مني هالشي فاكيد هالموضوع مرفوض عندي.

انا مع قويدر ان البنت تتحجب او تتجلب باقتناع كامل وعلشان رب العالمين و نفسها فقط.

وبرضه تصرفات فئه معينه ما بنقدر نعممها على الكل, همه فقط بمثلو نفسهم.

بعرف كتاب طويل, مش تعليق :")

خالد السعود يقول...

الحجاب .. الجلباب ..
بس أعتقد انهم مش رمز وبس ..
هو بأصل العقيدة ..
على كلا لا تعليق لأني اذا حكيت ناس كتير راح تزعل مني ..
تحياتي مياسي ..
وما تنسي انو الأنسان بقيمه وأخلاقه مش بمظهروا

Sherif يقول...

مبروك النيو لوك .. والذوق الجميل أيضا

الاحتشام .. اعتقد ان هذا هو ماتعنيه وهو غير الحجاب والجلباب الذى هو ليس اكثر من زى ..

فالاحتشام موجود عند المسيحيين واليهود والبوذيين والهندوس وحتى اللادينيين ..وهذا شئ محمود ..

وانالاارى اى معنى لان نتجمد على شكل منذ اربعة عشر قرنا من الزمان تحت اى تبرير

اما مسألة المتقدمين الجدد فهذا الطلب يعكس عدم القدرة على مواجهة اقرانه وافراد عائلته وزوجته أو خطيبته خارج هذا القالب

فاذا جئنا لحجة القوامة .. فنحن فهمناها منقوصة لأن بقية الآية تقول " بما فضل الله بعضهم على بعض وبما انفقوا"

والمعروف ان نبينا عليه السلام تزوج من خديجة التى كان يعمل لديها وتعطيه أجرا على هذا .. وإذا فالانفاق هنا خارج المعادلة

لكن الحقيقة أن شئون المرأة كلها بما فيها مالها وأولادها وأمانهم جميعا لايقوم به الا رجل .. هذا مافضل الله به الرجل لمواصفات تهيئه لهذا الدور ..
فاذا فهمنا القوامة بمعنى الحماية .. صح المفهوم واستقام ..

لكى فى النهاية ان تختارى من يحمى سلامك النفسى وشئونك بالشكل الذى تحبيه .. سواء بجلباب او باى شئ آخر

هذا رأيى الشخصى .. وتحياتى مرة أخرى لموضوع هام جدا

vagueraz يقول...

مرحبا .. كيفك مياسي ؟؟

ال new theme كتيير حلوو :) ...
مم ، هلأ الواحد لما بدو يتحجب أو يتجلبب لازم يكون عشان رب العالمين مش عشان فلان أو علان ,, أو عشان فرصتها بالزواج بتزيد أو بتنقص ,,,
إلي إلو نصيب بشي بياخدوا و كل شي مكتوب عند الله ...
لا .. في عرسان بيطلبوا إنو تكون البنت فايعة و صارت معي !!!!
شو مفهوم البنت الفايعة أو البنت إلي مش فايعة ,,,
بدل ما الواحد يدور على إنسانة تشاركه مؤسسة الزواج على أسس من التفاهم و الثقة و الإحترام المتبادل و الدين .. و الأخلاق و التعامل ...
الدين مش بمفهوم هاي الأيام إلي ماسكين الدين من ديله زي ما بيحكوا ,,,
الين معاملة ,,, إلي بدو يتدين و هيك ..يبلش بنفسه و أخلاه و تعامله و علاقته مع رب العالمين ,,,
الدين ما في أمر .... و ترهيب ,,,
ياما كتييير بنات إستتروا بصورة الجلباب أو الحجاب .. و أساؤا لمفهوم الحجاب ,,و حجاب الموضة هاي الأيام إلي ضيع الوقار تبع الحجاب .,,,,
الشي بيرجع للإنسان ,,و لازم يكون مقتنع و الكل بيعرف إنه الحجاب فرض زيو زي الصلاة و الصيام ... ...

ممم .. طولت صح ,,,.,,
إن شاء الله ما أكون طلعت برة الموضوع بس عشان في نقاط بالبوست قهرتني وهيي واقعية ,, إيش يعني كوني مجلببة ,و لا إلي حكت عنه همسة .. ما عندي مشكله إنك تبطلي محجبة ,,, هوة لعبة ,,,!!!!

نهارك سعيد :)

nana يقول...

كيفك؟
شكرا لطرحك هذا الموضوع

انا من الناس اللي اجاني عريس وكان شرطه ان اتحجب وامه لزقت فيي وبدها اياني غصب عني وعلى قولها حبتين وظلت تترجاني ان البس الحجاب
بس انا ما رضيت مش عشان ما بدي البس الحجاب بس من مبدا انه انا لما بدي البس الحجاب فهو عشان ديني وربي مش عشان اتزوج
يعني انا بستغرب بيجي الشب بشرط على الحجاب وما بسأل عن اشياء اهم
مثلا البنت بتصلي وايمانها قوي وبتقدر تربي هل الاولاد
يعني بدو الظاهر قدام الاهل والاحباب انه مرتي متحجبة

طيب اسال اذا الفرائض التانية بتعملها

شو بعرفني عن هل الموضة الجديدة بصراحة هيك صرت اعتبرها موضة جديدة

Khalid يقول...

Mayyasi

This blond girl picture you have; following every move one makes, make reading your blog very annoying. I can’t continue reading your words from under this picture as it keeps moving as I read.
The rest of the so called new look means nothing to me. When reading someone blog, it’s what is written that count not the pictures and colors. I do enjoy reading your blog, when I am in the mood to be annoyed 
Have a great day. And please get rid of the picture, or post it elsewhere so it does not follow as one is reading your thoughts, which I hope it’s more important to you than showing the picture.

Hatem Abunimeh يقول...

في رأي المشكله ألأساسيه هيه مش في ألحجاب ولا في الجلباب ولا في عريس الزين وشروطه التعجيزيه، المشكله في حرية ألأختيار، وأتباع نمط حياه معين يخص الشخص نفسه في جو ملأم بدون تدخل لا اب او اخ او عم او خال، ففي ظل إنعدام حرية ألأختيار والتي في اعتقادي الشخصي يجب ان تكون حرية مطلقه مئه بلمئه، سوف تظل ألأمور تدور في حلقة مفرغه، وتفسر مره من ناحيه دينيه، ومره من ناحيه مجتمعيه، ومره من ناحية اصول المهنه وهلم جر٠٠٠٠ ولكن ولا مره من هذه المرات من الممكن ان تفسر ألأمور من ناحية حريه شخصيه. يا عمي انا شو دخلني بشو صار مع فلان وعلتان من الناس، لا يوجد اي اوجه تقارب ما بين شخص وشخص ثاني كل واحد في هذي الدنيا شخصيه مستقله بحالها، لها تطلعاتها ومفهومها لذا الكون المعقد. والله بمجرد انه انا امشي في نفس النمط الي الناس في الحاره ماشيين عليه وكل شي بسير تمام معناته هادا مفهوم مغلوط.

سارة نجاتى يقول...

ازيك يا مياسى

مبدئيا كده أنتوا ايه اللى حصل عندكوا فى الأردن ؟؟
أنا صاحبتى راحت من خمس سنين بتقولى معظم الستات مش محجبات
أنا مش قصدى حاجة طبعا بس دى نقلة كبيرة اوى من عدم حجاب لجلباب و خمار.

طبعا اعملى اللى أنتى من جواكى عايزاه عشان مش تفضلى طول عمرك ندمانة على حاجة و عشان ربنا يتقبلها منك
لكن موضوع شروط العرسان ده كلها بتتركز فى أن مفهومهم عن الرجولة مغلوط و ذكورة معظمهم تؤرقهم و بيحاول يثبت رجولته بكام شرط خايب.

أعرف واحدة جوزها مش بيفوق من المخدرات و شرط عليها النقاب قبل الزواج

واحدة تانية أبوها قالها قبل ما يروحوا المصيف " لو زمايل الشغل طالعين معايا ح تلبسى مايوه شرعى , لو مفيش حد نعرفه فى المصيف البسى المايوه اللى انتى عايزاه "

واحدة تانية تقدم لها عريس اشترط أن تتحجب فتحجبت , ثم انفصلوا , و تقدم لها اخر اشترط أن تخلعه , فخلعته , و بعد انفصالهم جاء الثالث يطلب منها الحجاب فتحجبت

و هكذا , تقريبا معظمه للأسف لقيصر يا مياسى

بيعجبنى اختيار مواضيعك مووووت

تحياتى

مصراوي أوي يقول...

انا يشرفني ان تكون هذه الزيارة الأولي لمدونتك

بصراحة انت صادقةجدا مع نفسك وهذا شئ رائع ان يكون الانسان صادقا مع نفسه

وعجبني أوي احترامك للجميع في بداية البوست حتي لا يفهم احد الموضوع بطريقة خطأ

بالنسبة بس لجزئية الرجال الذي يفضلون المجبة او المجلببه هناك بعض الرجال خصوصا ونحن شرقيون يشعرون بالغيرة الشديدة حتي ولو لم يكن متدينا ولا يحب ان يري الاخرين جمال ومفاتن زوجته

شئ بيؤلمني جدا من يتخفون وراء الحجاب لفعل اشياء سلبية هذا شئ مؤسف

بوست رائع حتي وان اختلفت في بعض جزئياته

سلام الله عليكم

loolt يقول...

sorry, i dont have an arabic keyboard, but in my opinion this issue of men controlling what women wear has to do with fear and lack of control. There is little security and choice (they feel) so they use women as the target for their pent up frustration.

really it is the womens choice to wear hijab or jilbaab.

great post btw

allouh يقول...

سلام
الموضوع لا يقتصر على الانثى ، كثير في شباب بس يخطبوا بتشترط عليه الخطيبة انه يصير يصلي ، طيب اذا الواحد صار يصلي لأنها هيك طلبت منه شو فايدة صلاته؟
و كمان البنت شو فايدة الجلباب اذا مش لابسته عن قناعة؟
ياما كنا نشوف بنات بطلعوا من بيوتهم بجلباب و بالجامعة على اخر طرز

someone in life يقول...

مياسي
صباح الخير ,
الله يسامحك علي الشكل الجديد مش عارفه اقرا منه اي حاجه خصوصا الكلام المكتوب علي صورة البنت و كمان الكلام صغير يا اما تغيريه ي اما تشتري لي معزة تجرني هههههه

انا عاوزة اسال حاجه ليه كل حاجه في حياتنا بقت ظاهريه الدين يعني حجاب و جلباب و دقن الحب يعني ورود حمرا و قلوب في الفالنتين الام يعني عيد ام و بس

الجوهر يساوي زيرو يعني واحد بدقن وواحدة بجلباب و لسانهم مشاء الله و اذيتهم اكثر من البشر العاديين و كمان معظمهم مش اسوياء يعني هاقولها بصراحه وسطهم شواذ كتير بس المهم المظهر

الحب بقي ورد و بس فين التضحيه او الوقوف بجانب الحبيب او التعاون او المساندة
الام هديه واحدة بس يوم عيد الام و باقي السنه ممكن ما فيش حد بيسأل عنها و فيه ناس عاق كتير

البس حجاب علشان اتجوز عامله زي اللي غير دينه علشان يتجوز واحدة و هنا ربنا قال التغيير لنيته مش لوجه الله

العريس الطالب حجاب مائه مائه هو نفسه ملتزم هايتقي ربنا فيها و لا يحطها في البيت كدة و يقعد يتفرج علي صور فاضحه علي النت

احنا شعوب متناقضه ماله الستر و ماله الحشمه ليه العقد ؟
خمس سنين كمان ويلبسوا المرأة كفن احسن
و لا يقتلوها من يوم ولادتها

الناس دي بتخلي الواحد يهرب من دينه لانهم التشدد بعينه حسبي الله و نعم الوكيل

nana يقول...

http://kharabeshsister.blogspot.com/

Sherif يقول...

مش عارف ازاى .. لكن كان لايمكن الا ارسل لك دعوة

يشرفنى ان ادعوك لحضور حفل توقيع أول كتاب لى فى عالم الادب " لست الا بعض الاوراق" والذى يقام باذن الله يوم الاحد 5 ابريل 2009

المكان : مكتبة ديوان بمصر الجديدة
العنوان : 105 شارع ابو بكر الصديق مصر الجديدة – مقابل نادى ضباط الجلاء بمصر الجديدة
التاريخ : الاحد 5 ابريل 2009
الميعاد : 7 مساءا

فى انتظار تشريفك

maroo يقول...

موضوع مهم و مميز ..
صراحة يا مياسي انا برأيي انو اللي بدو يبدا بخطوة لازم يكملها لللآخر , يعني اللي بدو يتحجب لازم يحترم الحجاب اللي حاطه و ما يتنازل عنه لو شو ما صار .. و الأشكال العجيبة و الغريبة اللي عم بنشوفها من بعض النماذج + اللبس الضيق و حتلى مرة قويدر حكى عن وحده حاطه تاتو على ضهرها اول ما نزلت شوي بين وهي محجبه !! هاد اسمه مسخرة و اساءة لسمعة المحجبات بشكل عام ..

الناس قدامها الشي الواضح الصريح و عم تعمى عنو يعني ربنا وضح شروط الحجاب واللباس بشكل عام ليش الناس بتتفلسف ..

انا متلك مو شيخة بس بعرف ربي منيح و بسعى قد ما بقدر اني اتحسن و اصير احسن و احسن و عندي النية و ربنا انشالله بيأجرني عليها ..
وبالنسبة للجلباب انا لبسته من فترة و بصراحه هو شي كتير رائع و لكل حد بيحكي انو احيانا البنات بلبسوه لأنو ماديا اوفر بقله كلامك غلط مليون بالمية .. أقل واحد تركي بحوالي 60 دينار هاد غير اللبسه اللي تحته و الأكسسوارات !!

المهم انك تكوني مقتنعة ما تقومي بأي خطوه بدون اقتناع لأنها ما حتكمل .. وازا على الزواج ملكه جمال البيكيني بتتزوج وااللي لابسه خمار بتتزوج هاد نصيب :)

الله يقدرنا نكون ناس مناح و نقوي بعض :)

سراج الماضي يقول...

مياسي ...

أعتقد ان التعليق على مدونتك المتميزة قد اصبح واجبا وطنيا... وخيارا لا يمكن تجاهله أبدا ...

فقلمك يتميز برشاقة بلا حدود .. وواقعية رائعة تجذب القاريء وتدفعه إلى قلب الحياة اليومية لفتاة أردنية ترصد الحياة من منظورها الشخصي وتسجل بيراعها الفتي مشاهد أجتماعية مختلفة تكون كشاهد على مرحلة حساسة من تاريخ أمتنا.. حيث أصبح الصراع صراع هوية وثقافة ....

طبعا أنا اشعر انك تريدي أن تضربيني بعد هذه المقدمة التي لا داعي لها :)... ولكن لابأس ببعض الثرثرة في أول تعليق لي هنا ....

الموضوع رائع جدا ويمس نظرة اجتماعية سائدة مغلوطة للدين ... حيث يظن الأغلبية ان الدين هو عبارة عن ملابس يرتديها الشخص كرجل أو مراءة ...

نقطة الجلباب هو فرض أم لا ... هي نقطة فقهية بحتة لا مجال للنقاش بها هنا.. ولكن اللباس الإسلامي الصحيح هو جزء لا يتجزأ من الشريعة وكل من ينكره فهو ينكر شيء أساسي في الدين ... ولكن أيضا اللباس ليس هو كل الشيء....

الدين الإسلامي الحنيف هو شقان لا تصلح الحياة بدونهم ... عبادات ( والحجاب شيءأساسي فيها) ... والتعامل ... لا عبادة بدون تعامل ... ولا تعامل بدون عبادة ...

ومشكلة أمتنا المعاصرة في التعامل فالعبادات طريقها واضح ومحدد ... ولكن التعامل شيء مختلف تماما....

ترتدي الفتاة الحجاب فتظن انه انتهى العبء الديني المطلوب منها ... تغطي خصلة أو خصلتين من الشعر (الذي طبعا ليس هو اساس الإثارة) فتتصرف كما تريد فهي أدت فروضها الدينية...

الحجاب ليس فقط ربع متر قماش يغطي الشعر.. وإلا لسقط الحجاب شرعا عن الصلعاء... الحجاب منهاج حياة وتصرف كامل متكامل... الحجاب عفة وحياء وخجل .. الحجاب ذوق واخلاق و اقتناع ... الحجاب ليس قيد بل هو حماية وصيانة وحفظ... الحجاب يدعوا من ترتديه ان تتذكر انها مسلمة وأن تعتز بذلك ...

نأتي للجلباب وعلاقته بالزواج.. أكيد ان أي رجل شرقي أصيل غيور يحب ان تلتزم زوجته بالزي المحتشم والساتر لها... ولكن قبل ان يطلب ذلك اليس من باب أولى ان يكون قدوة لزوجته كي تتعلم منه الدين؟؟ كما انه اشتراطه لهذا الموضوع اليس غريبا؟؟ إذا تريد واحدة ترتدي الجلباب لماذا لم تختار واحدة اصلا ترتديه؟؟ أم انك تريد ان تجمع بين كل الميزات على مزاجك؟؟ كما أن هذا الطلب اليس أولى ان يكون بعد أقتناع بالشخص أولا ...

ببساطة مطلقة هذه النقطة تثبت كما قلتي كم نحن نعيش في مجتمع متناقض حتى النخاع

leeno يقول...

شيء خانق فعلا ان تختصر اخلاقيات البنت بقطع القماش و صلاحيتها للزواج من عدمه بتغطيتها بكمية أكبر من القماش

من قال انه المحجبة متدينة ؟ و المجلببة اكثر تدينا؟؟


المشكلة اننا بنسطح الأمور جدااااا
و بنختصر من تفاصيل مهمة و اكبر قيمة من قطع القماش

jafra يقول...

موضوع كتير حلو
لبس الحجاب و خاصة في هاي الايام بدو كتير اقتناع خاصة بعد اللي عم نشوفوا من لبس نص نص للمحجبات
هو عقيدة مفروضه على كل مسلمة ما في نقاش بس بحس انها كمان مسؤولية او لاكون صريحة مسؤولية الحجاب عم باخدها حجة لانو مو قادرة لهلا البسوا
اللي صار معي افظع من هيك تقدمت لشغل و عملت المقابلة و الاختبارات و نجحت و لما المدير قابلني قال المشكلة الوحيدة انو انا مو محجبة وهاي مؤسسة دينية ما بتوظف غير المحجبات - يعني جرجروني اسبوع كامل من غير ما يحكولي شي
فرديت عليه و قلت انو انا مش محجبة زي ما انت شايف - قال لي اتحجبي و بناخد فيكي ثواب بصراحة ما رديت عليه و قمت فعرض علي ععرض احلى
قال لي البسي على راسك بالشغل بس اذا بتحبي

تخيلي لوين القصة صارت مسخرة و الحجاب عندهم مجرد مظهر
انا ما بغيظني غير الناس اللي بتقدموا و هم عارفين اني مو متحجبة و بقولوا بس في شرط انه تتحجب
؟
؟
؟
طيب ليش اصلا اجيتوا ؟ و الا جيزة و ثواب كمان ؟؟؟؟؟؟؟؟؟
مع احترامي لكتير محجبات ملتزمات بس في كتير كمان حجابهم ملفت كتير للنظر و لا يعتبر حجاب ممكن سترة بس حجاب ما اظن

اسفة للاطالة

sozan يقول...

مرحبا ميسو
انا مريت بالتجربه لما كنت في الجامعه وشفت اللي بتحكي عنه
وانا باحكي انه الزواج لازم يكون مبني على اسس اهم من هالشي المبني على المظهر لانه المظهر خداع مو حقيقي
يمكن لازمني احكي عن هاي التجربه واحكي عن اهميه الاهتمام بامور اهم من المظهر الخارجي لانه كثير من الفتيات تورطت باسم المطهر الخارجي ودائما حاولي تعملي شي مقتنعه فيه لانه في النهايه تتحملي مسؤوليته بسبيئاته وحسناته وصدقيني انه الناس تحكي على لابسه الجلباب متل اللي مش لابسه
حاسه حالي بتفلسف كثير اليوم يلا تحملي صاحبتك :)

غير معرف يقول...

حطيت ايدك عالوجع و المشكله و الطامه الكبرى انه بكون يحب وحده و بتكون مش محجبه و مش مجلببه عادي لما بده يرتبط فيها بشترط الحجاب و الجلباب!!! انت كنت معجب فيها متل ما كانت ليه تغير ما داو موعاجبك ليه تبدا الموضوع من اول و كتير من البنات اسالي ليه تحجبتي هيك اهلي بدهم اول ما يصير عمر البنت كزا في العيله لازم تتحجب!!!!! اي شي غااااد

مياسي يقول...

قويدر

بالآخر صدق كل ما تتعمق بعلاقات الزواج خصوصا بتكتشف انها كذبه كبيره جدا والطرفين بيلعبوها على بعض؛ وكل يوم بتتعمق أفكار الكذب أكتر من الأفكار الصح عند الناس

وبتعرف الانسان طماع؛ بدو كل شي مره واحده وما يروحش عليه اشي

بس نسبة الطلاق هاي فعلا عاليه جدا!! أكيد في مشكله!!!

محمد

يمكن فكرة الجلباب الاقتصادي هاي قديمه شوي؛ هلأ بأكد لك انو الجلباب المنيح بيكلف وبيكلف كتير كمان؛ وغير الشغلات اللي بتلزمه بعدين؛ يعني الجانب الاقتصادي بدك تحطه على جنب

موضوع الجلباب بره بقدرش أحكم عليه بصراحه فما بعرف شو رأيك بالموضوع؟

مياسي يقول...

همسه

انتي تعلقي على كيفك ولا يهمك:)

شيء جميل يا همسه انو الواحد يعمل الاشي وهو مقتنع فيه؛ بيكون ايمانه فيه أقوى وأحسن؛ ويمكن لأنك جربتي فبتحسي انو هيك الصح
هلأ موضوع انك تلبسي حجاب في مجتمع ما بيتقبل بتخيل انه صعب جدا زي ما تكوني مش لابسه في مجتمع بيقبلش الاشي هاد

هلأ الحجاب فرض؛ بس البنات مش عم يتشجعوا برضو لأسباب مجتمعيه وكمان مش عم يترسخ عنا الوازع الديني صح اللي بيخلي الواحده تتحجب من راسها


خـالد

اذا لاحظت انا حكيت انو اذا صح اعتبارهم رموزا؛ يعني المحجبه مباشره بترمز لكونها مسلمه هيك قصدي

هلأ الحجاب بأصل العقيده أنا معك؛ بس الجلباب عليه خلاف شوي؛ لأنه وصف اللباس الساتر شامل اكتر منه

خالد
اذا بدك تحكي شي احكيه؛ وما يهمك زعل حدا؛ اللي عندك احكيه

الانسان بأخلاقه؟ والله يا خالد مؤخرا صرت أشك انو الانسان أي شيء إلا اللي بنعرفه!!!

مياسي يقول...

شريف

الله يبارك فيك؛ هو فعلا الاحتشام هو الهدف مش شي تاني

والحياه فيها مظاهر كتير؛ اذا ما كانت مؤخرا كلها هيك أصلا

"لكى فى النهاية ان تختارى من يحمى سلامك النفسى وشئونك بالشكل الذى تحبيه .. سواء بجلباب او باى شئ آخر"

مش ممكن تتخيل قديه هاي الجملة أثرت في؛ جد لمستني؛ شكرا الك


رزان
أنا بحكيلك شو مفهوم الفايعه؛ هي اللي بيتباهو فيها قدام الناس؛ هاي الشغله صارت مع قريبتي؛ هي لابسه حجاب ويوم عرسها دار حماها كانو بدهم يفرجوها للعالم بلا حجاب لأنها حلوه!!!

طولي زي مابدك:) نسيتي تحكي عالبنات اللي بيفكوا الحجاب في أعراس ما بتخصهم ولا بشهر العسل؛ هادلاك قصص تانيه!!

مياسي يقول...

نـانا

ممم؛ مش عارفه انا كنت بحكي عن موضة الجلباب نفسها؛ باعتبار انو الحجاب اساسي اصلا!!

ما حدش بيسألك عن أي شي تاني؛ لأنه الناس الها بالظاهر؛ والكل بالآخر حيحكيلك انو الزواج بسعر بعضه؛ فالمهم الواحد يطلع كسبان الشكل قدام الناس!!

Khaled

well thanks for ur continous visit,it seems that this girl made u so nervous that u did not even comment on the main post:)

any way, i am working on fixing the picture, after all i am concerned of keeping my readers

welcome khaled, waiting for more comments of u

مياسي يقول...

حاتم

معك حق؛ كل شخص شخصيه مستقلة تماما؛ هيك المفروض؛ بس في مجتعاتنا؛ الاستقلال عباره عن وهم؛ انت مربّط ب مليون شغله ما الهم داعي

سارة
يا ساره احنا عنا محجبات بنسبه كويسه؛ بيجوز صاحبتك كانت بتحكي عن مناطق معينه في الأردن؛ بس المناطق المحافظه الحجاب عندهم مهم

والله يا ستي نفسي حد يفهمني انا كمان شو القصه؛ يمكن انو الناس عم تفيع زياده؛ فردة الفعل بتكون شوية حبتين

يسلموا يا ساره:)

مياسي يقول...

مصراوي

الشرقيه جزئيه ما فكرت فيها؛ بس بتوقع انها وجهة نظر صحيحه الى حد بعيد

شرفت:)

loolt

thanx:) it is part of controlling process, yea i agree with u somehow but i think that it is bcoz it concerns outer shapes other than inside

مياسي يقول...

allouh

صح معاك حق بهاي؛ حتى اتخيل انو مرات العالم بيعتبروا الشب اللي ما بيدخن محترم مع اني مش عارفه شو وجه الشبه صراحه!!!

مظاهر وبس هالحياه للأسف الشديد

وحده

والله نفسي حد يجاوبني على نفس الأسئله؛ وعلى قولتك هي البنت ما تجيش أحسن؛ بتريّج وبترتاح بس شو بدك تعملي بهالكتبه؟

الحياه فيها كذب كتير للأسف والصدق فيها صار شبه معدوم!! اذا انوجد اساسا

مياسي يقول...

نانا

زرناكم:) ومبروك البلوج الجديد

شريف

شكرا على الدعوة الكريمه؛ وقد لبيتها جزئيا فقد وصلني الكتاب والتوقيع معا؛ ألف مبروك لك مره أخرى وعقبال التوقيع القادم ان شاءالله

مياسي يقول...

مارو

أحلى شي ملكة جمال البكيني؛ ضحكتني من قلبي:)

وان معك انو الجلباب الكويس بيكلف فلوس وبدو؛ ومش زي اللي بيحكوا عالرخص

وكل اللي حكيتيه يا مروة أنا موافقه عليه تماما:)

سـراج الماضي
أخيرا شرفتنا بتعليقك فأهلا بك
المقدمة الطويله أحرجتني جدا فشكرا لك على هذا الاطراء الذي لا استحقه

ما قلته صحيح؛ الأصل في الحجاب هو الستر والحشمه؛ ولكن مجتمعاتناالتي تختزل كل شيء بالمظهر دونا عن الداخل؛ صارت تختزل الفتاة في مظاهر كذابة؛ وأظن بأنك سيد العارفين

الحجاب أساسي يا سراج؛ ولكن كما قلت قبلا؛ التربيه الصحيحه والتأسيس لمجتمع صادق ليس صحيحا؛ فكيف تنتظر من الناس أن يكونوا أصحاء نفسيا في خياراتهم وعلاقاتهم؟

مياسي يقول...

leelo

لأن المظاهر كالعاده هي الفيصل مش أي شيء ثاني

جفرا

بحييكي على صراحتك لما تحكي انو مسؤولية الحجاب عامليتها حجه
انا بالنسبه للجلباب مرات بحس حالي زيك بالزبط؛ بس عامليتها حجه عشان ما أغلب حالي
قصتك جديدة بصراحه انا بسمع حكايات معاكسه للي بتحكيه؛ بس يعني كل يوم بيصير شي جديد

هلأ ليش اجو العرسان مش غلط؛ شو عليه اذا كسبوا بالمش محجبه ثواب وكمان شافوها من غير رتوش وبيكفي؛ صار لازم الباقي يصير الهم لحالهم:)

مياسي يقول...

سوزان

المظهر المظهر المظهر

هاي الكلمه مؤخرا داوشيتني

ومعاكي حق كل الناس بينحكى عليهم وما حدش موفّر حدا

احكي على راحتك هون؛ واتفلسفي بكيفك؛ وبستنى منك تحكي عن المظهر

غير معرّف

الحب اله حساباته والزواج الو حسابات تانيه

لما يكون بيحب اللي مش محجبه بيكون يحبها بينه وبينها؛ بس لما بدو يتجوزها كل شي بيفوت بالحسابات

على فكرة عيلتنا من النوع الثاني:)

محمد العمري يقول...

صباح الخير،،
عجبني الجلبا الاقتصادي..بس ظل جلباب _قلة الذوق- !
المتدينات في امريكا مثلا ، يبلسن الحجاب التركي البلوز والبنطلون تكون البلوز طويلة بعض الشيئ قريبا من الركبتين..

مياسي يقول...

محمد العمري

قلنا قبل هيك؛ انو ما في جلباب اقتصادي هالأيام؛ كل أسعار الجلابيب بالطالع؛ عالأقل كل البنات اللي بعرفهم بيدفعوا 50 دينار وطالع في الجلباب؛ وأنا ما بتفق معاك؛ في جلابيب كتير حلوة ومزوقة؛ اشي مرتب جدا

فهمت عليك شو هو الجلباب اللي بتحكي عنه؛ هاد شوي شبه ترواك الشّوام:)

أهلين محمد