الاثنين، 15 سبتمبر 2008

الله لا يقيمهم!

الصحيح إني شمتانه؛ و شمتانه كتير مش شوي بحضرة رجل الأعمال الشاب الفذ؛ اللي عمره لسا ما صارش 25 سنه؛ و دوشونا فيه لحد ما صار كمان شوي بدو ينزل لنا من الحنفيه؛ و الجرايد طبلونا بسيرته وإعلانات شركاته

الجنطات سكرت خيّو؛ و وكالة السيارات سلامتك؛ و الله يعينك عاللي جاي
مراقب الشركات يحيل اوراق قضية شركة عامر بني هاني في اربد الى النائب العام لمحاكمته امام "امن الدولة"
الناس في اربد التمت عند مكتب شركة الأخ؛ لحد"الختيايريه" با"لبواكير" ؛ كانو موجودين؛ أخوي بيحكي انهم زكو "صيامهم" عالمزبوط قد ما سبّو و شتمو في الشركه النصّابه!!!! يعني شو بدهم يستفيدو ؟؟ العوض بسلامتهم!!!

و تكماله لنفس الموضوع؛ و بما أنو قاعدين "بنسولف" عن كسفة الشعب الأردني في "البورصه" و المصاري اللي راحت على الناس؛ اشي بايع أرضه؛ و اشي بايع "ذهبات" مرته و الكل مستعد بدو ال20% ربح؛ و بيمني حاله بمصاري عالجاهز المستريح؛ جبتلكم هاي الصوره اللي صار لها قاهريتني شهر من اربد
يعني حتى هون استغلال للدين بشع جدا؛من متى صارت هالتعاملات حلال نفسي أفهم!!!
أنا توقعت يكونو شايلينها بس لساتها موجوده و بيحكولي انها معبيّه السوق!!
و هون كمان موضوع في جريدة الغد بيحكي عن انهيار الشركات في اربد
الناس صار همها بس تجيب مصاري لحد ما اجت على راسهم؛ واصلين مواصيل بتخوّف و صاير عنّا استعداد لأي شيء عشان نجيب فلوس وبس؛ الله يجيرنا من الأعظم!!!




هناك 10 تعليقات:

Anas يقول...

قريبا بالأردن...

أهبر واهرب..
وخدها مقاطعه عسويسرا.!!

بزوق و أدب لو سمحت لوووووووول ميسو اسمها بذوق.. لانو في بجم بتفسرها بمعنى تاني

غير معرف يقول...

طول عمري ما بآمن في هاي الشغلات لا بورصة ولا اسهم و لا تشغيل الاموال ولا اي شي من هاد البطيخ.
وكمان يمكن انو سمعتي بقصة شركة "ماتركس" اللي عبت اخبار النصابين فيها كل الجرايد،،ما بمسك جريدة و الا و اقل شيئ 3 او 4 مقالات عن اخبارها وشو صار فيهم.

المشكلة مش في هاي الشركات،المشكلة في المواطن الاردني اللي ينام وياكل منسف،وامواله عم تكبر تكبر..
بس للاسف اجو على راسهم طب..
خرجهم الله لا يقيمهم عنجد

الطائر الحزين يقول...

ربا خفى

وما آتيتم من ربا ليربو في أموال الناس فلا يربو عند الله

=======
الفساد فى كل مكان الله استعملنا ولا تستبدلنا

Unknown يقول...

♠ anas

أنا كمان بدي أهرب؛ بينفع؟؟

يخرب شيطانك!! طيب شو هو الإشي التاني اللي البجم بيفسروه ممكن أعرف؟؟

♠ mohammad

طبعا سمعت بشركة ماتريكس ما هاي كانت أول الخير

المشكله انو في ناس لسا بتدافع عن هيك شركات و أصحابها

أهلا و سهلا فيك:)

♠ الطائر الحزين
هو ربا صحيح؛ بس زي ما حكيت مقنع؛ و الناس عاملين حالهم مش شايفين عشان الفلوس

أهلا بك:)

غير معرف يقول...

لا لا مش اشي يا مياسي
هاد صاحبي حكالي نكته مره
قال واحد حفرتلي حب وحده لبنانيه .فراح جابلها ورده راح زاتها بوجهها وبحكيلها خوذي هالورده الك
حكتلي ثانكس بس بزوق بليز
فقلها: من عيوني.. تفو عليكي...
p:
بس هاد هو قصدي ... خلص طنشي التعليق :)

غير معرف يقول...

وين ما كان الطمع بس حلوة هاي حلال بس عادي ميسو احنا كمان شوي مع فتاوى الفضائيات رح يصير الخمر حلال اصبري ورح تشوفي

Unknown يقول...

♠ anas

خلص طنشنا:) بس النكته عجبتني حلوه!!

♠ سوزان

والله اذا طلع اللي يحكي لنا انو البوس حلال فكل شي صاير جايز فعلا؛ وينك زمان عنك يا أم عبدلله:)

miqdadi يقول...

المشكلة انو الي بعرفش يعد فلوس صار يفتح شركة و يجمع من التاس فلوس
اكثر من اربعين شركة او مكتب
و المخفي اعظم
كلها ناس بدها فلوس و عيونها فارغة
ربا خفي
ربا نسيئة
ربا عيني عينك
تجارة مال بمال
و كلها حرام

miqdadi يقول...

الفائدة وصلت الى 37 بالمية على فكرة

Unknown يقول...

♠ Miqdadi

كلها بدها تكسب و بس

37% ؟؟!! معقول؟