الاثنين، 9 يونيو، 2008

إنه عالم الرجال فقط!!!

انا بس مرات بيكون نفسي أوقف اي شب نار في الطريق و أسألو سؤال محيرني كتير؛ و بتمنى يجاوبني بصراحه و من غير حكي إنشا مدارس و لف و دوران:
يعني أنا بيكون نفسي أسأل :ليش برأيك انوجدت البنت بهالدنبا و شو رأيك بعقل البنات تحديدا؟؟

بتمنى انو ما حد يقول لي أختي و أمي و من هالحكي لأنو هاد جواب الإنشا اللي أنا بحكي عنو بالزبط
أنا الي واحد قريبي و هو شب يعني تقريبا شي 28 سنه كان دايمن يكرر مقولة انو النسوان ما بتفهم : و كل وظيفة النسوان في الحياه إنها تخدم الزلمه و بس ؛ يعني باختصار هي لا بتفهم و لا بستفهم زي ما بيحكو؛ مع العلم انو هاد الشب متعلم و مهندس ع أساس و كمان مقطع السمكه و ديلها من ناحية البنات اسم الله مش مخلي حدا

شب تاني دكتور خطب وحده شكلها فينا نحكي أمور مش كتير حلو يعني "زاكيه" بالتعبير الدارج؛ البنت يا حرام مكيفه عليه و هو بيحب وحده تانيه و مش قادر ينساها و لما أحكي معاه عن خطيبتو بيرد علي و بيحكيلي : "الزلمه رحمه و لو كان فحمه"!!!

نيجي هلأ لوقت ما كنا ندرس:
طبعا البنت "الذكيه" مش الشاطره هي بالنسبه للشباب اشي خارق صعب يستوعيوه و صعب أكتر يتخيلو وجوده ؛ يعني فينا نحكي "نازل من المريخ أو واقع من طياره"؛ ممكن تكون"نرده" أو "دريسه" بس بتفهم من دار أبوها "No Way" مستحيل و ألف لا؟؟ كيف بتفهم زيهم و بستوعب مواد الهندسه الخياليه؟؟

البنات "الخارقات" هادول تا يوصلو لمرحلة الاعتراف فيهم من مجتمع الشباب بدهم وقت طويل جدا إذا وصلو ؛ هاد طبعا لأنهم على اعتبار مش مارين بمرحلة "دكاترة المكاتب" و "الزيارات" اياها عشان ينجحو

أما الشغل فهون الطامه الكبرى؛ و هون أنا بحكي عن تجربه شخصيه مع المسؤول عني يعني "Team Leader"
مره البنت اللي معي بتحكي معاه عن موضوع بصراحه "قال يعني" برد عليها و بيحكيلها :"احكي ما تخافي أنا مش مره تا أحط بقلبي"!! كأنو با حرام الزلم ملائكه ما بيغلطو و لا بيحقدو و لا بيغارو

نفس البنت بتتناقش معاه هو و السكرتيره بيحكيلها : "أنا حكي النسوان ما برد عليه" يا سلام!!!

بحكيلو مره بما معناه لساتنا بنتعرف ع أسلوب بعض ف الشغل بيحكي لي :"البنات؛ انتو و لا حد بيعرف يتعامل معكم مش هو اللي كل مره بيحكي شي و مجننا"

نفس الشخص "النيه" انو بحب وحده و كل وقتو ف البريك قاعد عالدرج و بيحكي معها تلفونات يا ترى بيحكيلها كمان أنو النسوان بتفهمش؟؟!!!!

شب تاني بيشتغل معي و هو أنا بعترف انو شاطر كتير؛ ناداني عشان نظام التشغيل "Linux" بدو ينزل عليه سيرفر
عملتلو كل شي من الألف للياء و علمتو ياه: بالأخر كلمة شكرا بالعربي ما حكالي ياها ؛ اتخيلو انو حكاها بالايطالي:"جراسياس" عشان ما يجرح كبرياؤه العظيمه؛ و لما حكيت لو مع الوقت بتتعلم عليه حكالي بكره بصير أشطر منك !!!

بلاش أنا خبرات البنات التانيه:
بنت بعرفها مديرة موارد بشريه و بتدخن "عذرا للفظ بس هي داعسه عاللي عند عندها" بسألها مره شو شعور الشب وانتي بتدخني معاه بتحكي لي دايمن فكرة أنو "هو يعني الشب" سامحلها تدخن و هي معاه واصليتها منو ؛ يعني أنا بكيفي سامحلك ترى!!

نفس البنت الشباب اللي عنده بيسألوها: "ليه هيك انتي داعسه علينا ؟؟ " بتحكيلهم لو ما عملت هيك بتدعسوني انتو!!!

بنت تانيه:
بتكره الشركه اللي هي فيها كتير لنفس الأسباب تقريبا غير "الحكي" اللي عالطالع و النازل ؛ و كمان لأنها "The Only Technical Girl" و شاطره ف شغلها برضو مش خالصه من القر و النق

يعني باختصار؛ لا مكان للبنت اللي بتفهم ف حياة الشب؛ كل ما كنتي "سنو وايت" أو "سندريلا" كان أريح للجميع ؛ و أكبر دليل ع هيك انو الشب ممكن يحب البنت اللي "مخها كبير" بس لما يجي يتجوز بيدور عاللي ما بتفهم ابدا عشان ما تغلبهوش!!! و بعدين بصير بدو اللي تفهمو "قال يعني" و بيخرب بيت منو لإلو عشان أفكاره النيره و لأنو ما بدو يتحمل نتيجة غلطو الأولاني

الخلاصه:
حتى لو البنت صارت تفهم بمعجزه فهو مجتمع الرجل أولا و أخيرا؛ هو بيحط القواعد و هو بيلعب زي ما بدو ؛ فيا ريت كل بنت تفهم من حالها و تختار انها ما تتعلم و تطلع من الصف السادس من المدرسه و تتجوز هيك أصفالها راس و أريح من لفة الدوام و المدارس و الجامعات و غيرو ؛ شو بدها بتعب هالبال؟؟

و برجع بسأل نفس السؤال؟؟ شو هي البنت بالنسبه إلك؟؟ و يا ريت نكون صرحاء مع بعض لو سمحتو!!!

هناك 28 تعليقًا:

blackcairorose يقول...

النمطية عند التعامل مع المرأة موجودة

بعضها بموضوعية مبرر

وكثير منها مجرد نمطيات عفى عليها الزمن

لكن أن يتعامل الرجل الشرقى مع المرأة وبالذات الشرقية بموضوعية وندية هو ما يحتاج لزمن ولا أراه قريبا مع الاسف فى وقت تتراجع فيه انجازات المرأة

وأحيانا بسبب المرأة نفسها

راجى يقول...

عسل وسكر

انا غرقت فى بحر الكلام الشامى يا ناس ومو قادر اطلع منو
كلامك حلو

البنات زى ما صلاح جاهين قال اجمل الكائنات ، وانا بقول اذكاهم كمان

Sherif يقول...

مياسى

اذا شاب قال انه ممكن يستغنى عن جمال الدنيا كله .. او يدعى ان البنات لاتفهم او شئ من هذا القبيل .. فهو لم يدرك ولم يفهم ماهى البنت

المشكلة الحقيقية أن الرجل يحتاج لقوة وارادة كبيرة جدا ليكون رجلا متزنا محترما ويحافظ على مركبه سائرة لبر الامان فى مشوار حياته مع هذا السيل المنهمر من الجمال والاناقة والسحر والذى يحاصره من جميع الجهات

هذه هى حواء بالنسة لآدم .. أى حواء .. واى آدم .. فاطمئنى بنيتى ..

تعالوا بقى بنات حواء .. بنت بتفهم .. وذكية .. وشاطرة .. و..
ازاى بقى مش عارفة تغلب ولد ؟

الرجال هم اضعف مما تتخيلى .. وكلمة حنينة حقيقيةدون ابتذال ..مع احترام .. تستطيع أن تودى برجل ..

الدليل على ذلك هو خوف الزوجة المهول أن يتأثر زوجها بدلال امرأة أخرى .. يبقى مين الأقوى ؟

اذن منافسك ليس سوبرمان كما يدعى .. كل ماتحتاجيه هو ان تثقى فى قدراتك .. صدقينى

لو قلتى غير هذا .. فان ذلك يتعارض مع قولك ذكية .. مجتهدة .. ناجحة .. الخ

ارجو الا اكون قد اطلت .. مع كل امنياتى لك بالتوفيق والسعادة

eNAS يقول...

يمكن لسا ما خضت بالعالم والمكان اللي فعلا ممكن احس انو العالم هون هو عالم الرجال فقط
بس اللي متأكده منو انو مستحيل آدم يعيش من دون حوى ... أو يدبر امورو بلاها
اناشفت بنات اتزوجو وبعد الزواج قطعو عهد على نفسهم انهم ما يعيدوها ... "طبعا مش شرط للكل"
وفعلا كملو حياتهم من دون الرجل
وازواجهم كانو يحكو نفس الحكي"أي والله مجنون اذا بعيدها"
بقعدلو يومين او تلات وببلش بمهمة بحث جديدة
بس مياسي ... بتعرفي مين اللي موجعة راسها
اللي بدها تضل تقارن حالها واعمالها بأعمال آدم ... واكيد كل واحد من الطرفين الو اسلوبه الخاص اللي بميزه
يعني انا بحكيلك شفت ناس متعلمين و واصلين لشهادات وابحاث بصورة عاليه ... بس نظرتهم للبنت لسا نظرة بدائية مجردة
لان البيئة اللي بتربي الانسان مش العلم
واذا كل رجال العالم هيك معناها الدنيا خربانه
بس حلو يكون جزء من الوحدة سندريلاا او سنو وايت:) لانه الانوثه اول عن آخر هي اللي بتخللي البنت تشع بمحيطها
آسفةميييس طولت عليكي ...

Anas يقول...

do2..do2..do2
افوت ولا اقلب وجهي واختصر الشر؟؟

ahmad يقول...

نحن الرجال لم نظلم النساء بل الذي ظلمهن تاريخ مليء بالحقد والكراهيه منبعه عقيده اسلاميه تساوي بين الكلب والمرأه وهذه ليس من عندي بل حديث نبوي شريف
فكيف لمسلم ان يحترم المرأ÷ ودينه يامره بأن لايصلي اذا كانت المرأه جالسه امامه وكيف لمسلم ان يحترم المرأه اذا كان مجرد لمس المرأه تفقد وضوئه فهل بعد هذا تسألي لماذا يعاملون المرأة هكذا؟

ايمن يقول...

احمد
مختلف معك تمانما
فلا يوجد دين سماوي احترم المرأو وقدرها مثل الإسلام
والكلام عن احترام الإسلام للمرأة يطول ويحكي في كتب ومجلدات
ليتك ذكرت نص الحديث الذي تستشهد به
هداني الله واياك لسواء السبيل

Asad يقول...

Ahmed
الإسلام لم يساوي أبدأ بين المرأة والكلب وهذا الحديث مجرد حديث موضوع غبي والأغبى هو من يصدقه ، فالإسلام هو الدين الوحيد ( لا اقول أكثر دين بل هو الوحيد ) الذي احترم المرأة ورفعها إلى القمة وعاملها كأنها جوهرة مصونة ، ثم إن الصلاة لا تصح بوجود أي كان أمام المصلي سواء كانت امرأة أو رجل .
أما مسألة لمس المرأة فقد أشبعها العلماء شرحا ولكن هناك البعض ممن لا يريد أن يفتح عينيه وأذنيه للحقيقة بل يتبع هواه وهوى الشيطان .. افتح أي كتاب فقه وستجد بسهولة أن اللمس المذكور هو اللمس بشهوة أو الجماع ..
أتمنى أن لا تفتي أنت وغيرك من عندك ، واحترم دينك .. أليس اسمك ( أحمد ) ؟

سوزان يقول...

هاي مشكله كبيره كتيره وبتواجه البنات في كل مكان واحيانا تدفع البنات انهم يتعاملوا بنوع من السطحيه ودفعهم الى التعامل بغباء بس ما فينا نلومهم من الصغر الام والاب بيحكوله شاطر ياماما حتى لو انه غلط وبيعطوه القوة ليسيطر على خواته وانه على حق دايما لانه الاخ ولازم يحترم فهيك بيكبر وبعقله انه الستات أغبياء او عقلهم صغير او او
بالنسبه للي بيحكي مع البنت هاد بيكون متل البس قدامها

غير معرف يقول...

l2 enti ma t7o6e hay el afkar b rask eno 3alam lal shabab ..b3deen sho y3ni lw ma 7ka shokran had brj3 la aslo aham eshi tkoon Th8tk 2wyeh b7alek ou tntbhi la shab sho 3ml ow swa :D

غير معرف يقول...

** o la tntbhi

مياسي يقول...

BCR

معك مئه بالمئه أن المرأه مسؤوله عن كثير من النمطيات و تكرسها دائما قولا أو فعلا

وأنا لاأدعي بأن بعض النمطيات غير مبرر ولكن أن لا يحاول الطرفان-سواء الرجل أو المرأه- تغيير القوالب و النمطيه هذا ما يوقعنا في مشكله

مياسي يقول...

راجي

شكرا لك و أكيد أذكاهم :)

انتا الكلام الشامي شكلو عاملك أزمه لوول

مياسي يقول...

sherif

انتا تطول قد ما بدك و البلوج كلو ع حسابك

المشكله مش في الدلال؛ الدلال لوحده يا شريف مش كفايه

الموضوع مش اني أغلب ولد او انهزم قدامه؛ الموضوع انو يعترف بقدراتي من الأساس ؛ يعني زي ما حكيت من قبل : اذا البنت حلوه لازم تتجوز بكير و تكون ما تفهمش هاي نمطيات موجوده بكثره ؛ يعني ع قولة المثل: "شاوروهم و خالفوهم"

مياسي يقول...

enas

يمكن تستغربي لو حكيت لك انو انا ضد انو البنت تحتك بالرجال كتير حتى لو ع مستوى روحة السوق مثلا؛ لانها مع الوقت بتكتسب من أطباعهم و بتخسر شوي شوي من أنوثتها

بس بكره لما تتخرجي و تشوفي الحياه ع أصولها حتحسي اللي انا بحكيلك عنو

أما كون ستات ما رضيو يتجوزوا مره تانيه؛ فهاد لأنو الست اجمالا بس تنجرح صعب ترجع تكون ثقه من أول أما الرجل عزيزتي؛ فالمرأه عنده ضروريه لسبب أو لآخر من غير ما نفصل ليه

بس أنا شخصيا بكتشف يوم عن يوم أنو نظرة الزلمه للمرأه هي أول ع آخر نتاج تربيته و مجتمعه: الرجل اللي مربى ع أنو يحترم فكرة المرأه ف حياتو حتلاقيه بحترمها بره الدار و العكس بالعكس

أما فكرة انو المره تشع فهاد اللي بحكيلك عنو فوق نفس فكرة السوق يعني:)

طولي قد ما بدك عيني ما في مشكل؛ رأيك على عيني :)

مياسي يقول...

anas

فوت و برجلك اليمين كمان؛ لا تقلب و لا تختصر هاي المدونه مفتوحه للكل و انتا أولهم أنووس و لو:)

مياسي يقول...

ahmad

انا هاي الفتوى سمعت فيها بس صراحه مش متأكده منها فما بقدر أناقشك فيها

بالنسبه لأنو الاسلام ظلم المرأه أو انصفها انا بحس انو في شغلات كتير تعتبر مسلمات في ديننا تخص المرأه بحاجه الى مراجعه و توضيح أكثر لحقيقتها و جوهرها

أما واقع ان نحمل الدين وحده المسؤوليه اسمحلي احكي لك عزيزي هذا كلام تنقصه الدقه لأنو اكيد الرجل مرتاح بهيك وضع و عاجبوو بحمل الدين مسؤوليه و يخلي حاله

أهلا و سهلا فيك

مياسي يقول...

ايمن

الكلام ربما يملأ مجلدات و لكن الفعل في هذا الوقت لا يبشر بخير بتاتا و الأنكى انه يستشهد بالدين في كل الأفعال

أهلا و سهلا فيك

مياسي يقول...

asad

بالنسبه لحديث المرأه و الكلب معلوماتي غير دقيقه في هذا الموضوع أما اللمس فأنا متفقه معك في السبب الذي ذكرته

أهلا فيك

مياسي يقول...

سوزان

أكيد بس؛ ما هو بدو ياها تضل متحمليتو

زي ما حكيت لنوساالفكره بتتكرس من المجتمع و العيله و تترسخ و بصير من الصعب تغييرها الا بمعجزه

مياسي يقول...

غير معرف

الموضوع مش شو عمل الشب و سوى و أحط راسي براسو؛ انا مقتنعه بوضعي و عارفه حالي كويس الحمدلله

الموضوع انو هون مجال شغل يعني احنا فعليا ع قدم المساواه قدام العملاء و الاداره ما بينفع احكي و الله انا بنت و هو احسن مني؛ شغلي بقيمني بالآخر

غير معرف يقول...

كل سن وانت طيب ياعمنا المياسى دخلت بلوجك من عند صدبقى الحميم والأنتيم شرف الذى أنسا لى بلوجا أمس فقط --- أعجانى أسلوبك فى الكتابة ومنطقك فى تحليل الأمور كن صديقى ...كن صديقى
ماكس الجديد جدا فى عالم البلوج

غير معرف يقول...

قال جاهين رحمه الله
البنت زى الولد
ماهيش كمالة عدد
فى الاحتمال والجلد
كم ليهم من معجزات
ويا بنات البنات ألطف الكائنات
البنات ناصحين تمام
يعرفوا الحاجة بكام
ينفعو وزراء ماليه واقتصاد مفيش كلام
وليس الذكر كالأنثى وانى سميتها مريم - أى ان الأنثى أكثر تميزا عن الذكر بدليل اصطفاء الله لهاعلى نساء العالمين
رزقنى الله ذكورا فقط فعرفت قيمة البنت وارتباطها الدائم بالأسرة حتى بعد زواجها ورعايتها لوالديها عند الكبر فلكل بنت أن تفخر بكونها بنت هى الزهرة التى تجعل للحياة معنى

Amjad Wadiِ يقول...

أول اشي جراسياس إسباني مش ايطالي ... موضوعك كثير حلو وواقعي ... معك حق إلا بشغلة وحده

و احنا بالتكنولوجيا كان فيه تخصص هندسة ميكانيك .. شغل شباب بس .. ومع هيك كل سنه كان فيه بنت بالدفعه بتوخذ الأولا عليهم

بس بصراحة البنات صعب ينفهمو

ما تفهمني غلط ... ومرات كثير بعملو أشياء ما إلها منطق ولا أساس ... أعطيك مثال من إلي كتبتيه .. البنت إلي مصاحبه الدكتور إلي خاطب .. بتقدر تعطيني سبب منطقي لالي بتعملوا ؟ هاداك طبعاً إنسان نذل إلي خاطب وحده وبعرف وحده ثانيه من وراها وبحكي "الزلمه رحمه و لو كان فحمه"
وبعتذر إذا كان بقربك أو بخصك

مياسي يقول...

غير معرف - ماكس الجديد جدا

شكرا عالاطراء يا ريت المره الجاي تعلق باسم بلوجك عشان نقدر نعلق عندك كمان
شكرا لشرف صاحبك اللي دلك ع هون :)

مياسي يقول...

غير معرف - أبو الذكور فقط

حكيك صحيح فعلا؛ البيت اللي ما فيه بنات بيت ميت ما بيندخل

أهلا و سهلا فيك :)

مياسي يقول...

أمجد

جراسياس اسباني؟؟ معلومه جديده والله شكرا عليها

انا هاد اللي حكيتو يا أمجد؛ عن جد في بنات في تخصصات كتير صعبه و فيك تحكي انهم "فلتات" ماشالله عليهم انا ما حكيت انو هاي البنت مش موجوده حكيت انو الشباب صعب يستوعبو وجودها بالاجمال

بالنسبه للشب انا معك انو مش تصرف نبيل ابدا و لا انا تصرفها عاجبني ؛ لانها عرفت عن البنت التانيه و انا شخصيا مش عارفه شو كان موقفها من الموضوع بس اللي بعرفو انها مصره عهاد الشخص

كمان انا ما بنزه البنات يا أمجد أكيد النا أغلاطنا البسيطه و المركبه و اللي بتساهم فيها شخوص و أشياء كثيره

تحياتي

Crazy Sky يقول...

ناقصات عقل ودين

بالطبع الفهم الخاطئ للدين من اهم الاسباب التى جعلت مثل تلك المفاهيم تعشش داخل العقول حتى أن بعض البنات أصبح رأيها أنها فعلا مخلوق ناقص , ولكن الحقيقة غير ذلك فالمرأة مثل الرجل تماماتفكر وتبدع بل وتتفوق عليه احيانا
ولكن عنما نسمع حديث شريف يخبرنا ان المرأة ناقصة عقل ودين فان كثيرين لا يفهمون مغزى الحديث فهن ناقصات عقل لان العاطفة والقلب بيتحكمو في معظم تصرفاتها مش علشان الفص الخلفي للمخ منزوع .
وناقصات دين لان في حاجة اسمها دورة شهرية\طمث.... تمنعها من الصلاة او الصوم , وهو أمر فطرى فيها لا شأن لها به .
اسف للاطالة