الأحد، 17 يناير، 2010

ثيمة الصمت

وقوفا كنا في صف طويل بانتظار السرفيس

الصف الذي قد يتجاوز الواقفون فيه الـ10 أشخاص يحوي فئات عمرية مختلفة

3 فتيات كنا؛ وبيننا شباب وكهول أيضا

جاء دورنا نحن الصبايا لنركب؛ استعد شاب ليحتل المقعد الأمامي فيما سنحتل نحن الكرسي الخلفي

فجأة يظهر شابان من اللامكان؛ ليسا وقوفا في الصف؛ ولم يكونا من ضمن "الملطوعين" في شمس الشتاء اللطيفة ويستعدان للركوب بكل بجاحة أصحاب الحق

لا اعتراض لم يعترض أحد ولا حتى نحن أصحاب الدور الحالي ولا "المنتظرون" دهرا في الصف

صوت وحيد اعترض وبدا نشازا؛ كان ذلك الشاب في المقعد الأمامي:

- مش من حقك؟

- شو يعني مش من حقي؟

- آه هاظ مش دورك؟ مش مستحي على دمك؟!! البنات واقفة وما بدك تعطيهم دورهم؟ بلاش يا سيدي احترم الناس اللي بتستنى في الطابور وحضرتك هسه شرفت!!

- أنا شرفت هسه؟!! أنا من زمان هون!!

- نعم؟ من زمان؟!! أنا واقف من زمان وشايفك هسه نازل من الباص وبحكيلك فيش تركب!!

- ايه عاد!! بدك الدور اشبع فيه!

يقولها وهو يدفع باب السرفيس بعيدا في غضب؛ نركب جميعا فيما صوت الشاب الواقف يأتي من بعيد "من كل عقله هاظ؟؟ أنا من زمان بالدور!!!"

أحد الكهول يجاوبه قائلا: "معلش يا عمي؛ بدك تتحمل شو بدك تعمل يعني!!"

يعني لو العمو مش واقف بالدور معنا كنت حكيت!!

كلمة لقانون المطبوعات الجديد: ما تخافوا كلنا متل العمو فوق: ساكتين وعين الله علينـا

هناك 12 تعليقًا:

Farah Batarneh يقول...

هههه و الله الناس أمرها عجب !!!!
لا بسكوتهم مريحيننا و لا بكلامهم راضييننا!

و على كلمتك للقانون ..
لو ما كنا ساكتين أو بقينا ساكتين النتيجة وحدة .. همة هدفهم يخرسونا تماما!
ما رح يكتفو بالسكوت لوحدو :)

موفقة

مياسي يقول...

فرح

شفتي بالله؟!!
أنا بحكي ما في داعي حد يغلب حالو

مالو الحيط الحيط والستيره؟ بطلوا ينفعو هسه؟

تسلمي فرح:)

فتاه من الصعيد يقول...

مفيش ذوق ولا نخوه النهارده مع الاسف

ولولا صمتنا عن حقوقنا لما اغتصب حق

تحياتي

مياسي يقول...

مروة

فعلا ما عاد في شي منيح

صار الاشي الكويس شيء غريب ومستهجن:(

ربنا ما سمع من سـاكت

سوزان يقول...

كيفك ميسو زمان عنك!!
انت بتعرفي الناس الفوضيه اللي ما الها قانون ولا شي و عندهم القوة هم اللي اللهم الحق اما الناس اللي مثلنا هم آخر من يحصل على حقه ويمكن ما يحصله كمان

مياسي يقول...

سوزان

معك حق؛ المال السايب بيشجع عالسرقه

صايره استحي من كتر ما بتحكيلي اني غايبه:(

Whisper يقول...

المشكله يا ميسو ان حتى الحيط هدّوه :$ وين بدنا نمشي هلأ ؟؟؟

عكلن طول عمرنا هيك
عليهم عليهم..معاهم معاهم

مياسي يقول...

ويسبر

ياختي مش عارفه امشي بالفي يا اعمليلك حيط وامشي جنبه:)

يا هلا والله

حسام كراسنه يقول...

الحمد لله، الله يديم الحكومة عودتنا انه نظل مسكرين ثمنا، شكراً للحكومة.
على سيرة الطابور، كل يوم بَنّلطِع الصبحيات وانا بستنى باص صويلح، الحلو بالموضوع في تقريباً 3 شكلهم عايشين على الخط شي 20 سنة، بعرفو الكنترول وكل شوفيرية الخط، يعني فاقعة معهم، لما يحسو انه في واحد صف قبلهم، بعمل طوشه وبرجع زي البطل ع الدور؛ الحمد لله لسة في ناس "خارجة عن القانون لحتى تدافع عن حقها" :S

مياسي يقول...

حسام

لا جد بعد في ناس زي هيك؟!! آخر الركاب المحترمين شكلهم:)

وعلى قولة شكرا للحكومه ولكل الناس
لأنو سياسة "السكت" أحسن سياسه عم نتعلمها بحياتنا

الشنكوتي الكبير يقول...

ايه ده انتوا بتركبوا العربيات بالطابور ايه النظام الحلو ده
معندكوش نظام
زق اللي جنبك واسلك
وزاحم بكتفك تركب

ما علينا بس يظهر صعبان عليكي انتي من اللي بيدخلوا في الصف قبل الناس بدون وجه حق
بس ياترى انهي صف تقصدي

همممممم

مش عارف
سلااااااااااااااااااام

مياسي يقول...

شنكوتي

مش لهالدرجه النظام!!
الحال من بعضه في كل البلاد العربية