الأربعاء، 6 أغسطس، 2008

المحجوب 2

اليوم قررت أزور معرض عماد حجاجالمحجوب 2- و الذي يقام في أمانة عمان الكبرى –رأس العين


على الرغم من الحالة النفسية المتردية جدا قررت أن الحياة تستحق أن تعاش؛ بمعنى مش كل يوم الأخ عماد حجاج رح يعمل معرض و يصحلي أروح عليه ( و على فكرة هاي إحدى مزايا عمان؛ فيها نشاطات كتير مش متوفرة في أربد للأسف)


المهم عرضت على البنت اللي بشتغل معي نروح سوا ووافقت مع اني ما توقعت توافق بالمره

نزلنا من الشغل؛ و بدأت مأساة انك تستنى تاكسي في الشميساني؛ يا التكاسي مليانه أصلا؛ يا انك انتا وواقف بتكتشف انو اللي بيحكيلك انو الحالة الاقتصادية في البلد مترديه –بيكذب عليك و لا مؤاخذه- لأنو معظم أصحاب التكاسي ما بيرضو يوقفو أساسا؛ و كلهم بيأشرو بايدهم تأشيرة –I am not interested- بالعربي مش سائلين عنكم؛ مستوره و الحمدلله!!!

المهم؛ قررنا نمشي ؛ مشينا بالشارع النازل ع الدوار الثالث؛ و بنص الشارع قررنا ناخد تاكسي؛ طبعا مأساة التاكسي تكررت مرة تانيه؛ بس هالمره ربنا ستر ؛ ما طولناش و احنا بنستنى؛ سرقنا التاكسي من شلة "مصاروه" قاعدين بيستنو قدامنا؛ و عشان ضميري يرتاح اجى تاكسي مباشره و طلعهم
المهم تحققت تالمعجزه و ركبنا؛ البنت اللي معي طول الطريق و هي تحكي لي : هاي المنطقه شبه اربد كتير ؛ هي من اربد و ما بتعرف عمان الشرقيه-اللي هي وسط البلد يعني- و انا احكيلها مزبوط كتير شبهها

وصلنا المعرض؛ و شفير التاكسي ما نصبش علي كالعاده و أخد زيادة عن 10 قروش المقرره فوق 15 قرش لأنو ع حد علمي بس 300 عداد هما اللي تم تعديلهم في البلد عشان يصيرو قد التسعيره الجديده:اللي هي 25 قرش؛ و بما أنو الشيء بالشيء يذكر بحب أحكي و أؤكد أنو معظم التكاسي في عمان اذا مش كلها بتاخد ال10 قروش و طباشه كمان ؛ هاد الزوق اللي اسمو ترجيع الباقي ما بيعرفهوش

و سبحان الله؛ أول ما نزلنا من التاكسي لقانا ولد مش معزوم؛ و صار يدعي"الله يوفقك؛ الله يوفقك" ال10 قروش لسا نازله "تازه" من ايدين الشفير لايدي؛ تفضل يا "عمو" ؛ نصيبك كمالة هالليره

دخلنا المعرض و بلشنا نتفرج؛ في لوحات شايفتها قبل هيك و في أشيا جديده؛ حاطين لوحه من هادول زي الملاهي الواحد بيحط راسو فيهم و بيتصور مع ابو محجوب و ابو محمد: انا صورت اللوحه بس

كمان في شاشة عرض تلفزيونيه بتعرض مسلسل ابو محجوب الكرتوني و في هيك كراسي جلد صغار لونهم أبيض "زراف" الواحد بيقعد عليهم و بيتفرج و في ناس قاعده

شريت كتاب المحجوب 2 –الطبعه الشعبيه- لأنو الطبعه اللي مش شعبيه حقها 7 دنانير الله لا يخسر؛ و بس طلعت من المعرض عماد حجاج كان قاعد بيوقع للعالم على الكتب؛ في قدامي "زلمه شايب" عماد عم بيوقعلو و بيسأل الزلمه اذا حق الكتاب مناسب؛ الزلمه رد بأنو غالي شوي؛ مع انو شاري 4 نسخ من اللي حقهم 7 دنانير!!! ما سمعت رد عماد منيح بس أكيد كان قاعد عم يبرر شي عن حق الكتاب؛ الزلمه الشايب في الصوره اللي تحت مباشره

في هيك شب زريف؛ لابس لبس أردني تقليدي – دشداشة بنيه و شماغ أحمر و متزنر بشماغ كمان- شو يا حزركم ماسك بايدو؟؟؟ No,No مش قهوه ساده يا شباب ؛ ابريق شاي "الربيع" كبير مع كاسات ورق مكتوب عليها الربيع كمان- ما هو شاي الربيع راعي المعرض-البنت اللي معي ربطت بسرعه و حكت له: شاي بنعنع؟؟ زي شاي ابو محجوب اللي في الكاركاتيرات ضحك و حكى آه؛ انا كنت عم بصور في عماد حجاج و بستناه يخلص عشان يوقع لي نسختي؛ درت الكاميرا عالشب و حكيتلو أصورك؟؟ حكالي لأ؛ و دار ظهرو و ضلو واقف!!! عن جد استغربت منو!!! ما رضي يتصور!!!

خلص عماد؛ باركت لو عالمعرض و وقع لي باسمي عالكتاب ؛ وهاد التوقيع في الصوره بس اسمي ما طلع في الصوره- كأنكو مش عارفينو يعني- أخدت النسخه و شربنا شاي بنعنع من الشب الزريف؛ و طلعنا من الأمانه




الدنيا كانت غروب؛ و انا زميلتي بنتشاور كيف بدنا نروح؛ حكيت لها من رغدان السياحي بنركب سرفيس عالداخليه و من هناك بنروح ؛ طيب وين رغدان السياحي يا ميّاسي؟؟ امشي يا حلوه !!!

سألنا عن الطريق و مشينا؛ مشوار كتير حلو؛ الجو فيه نسمه بارده لطيفه: ناس كتير و زحمه ؛ محلات قديمه و جديده؛ محلات أثاث مستعمل أول مره بشوفها؛ محلات آثار شرقيه؛ بازارات؛ ملاحظه عن محلات وسط البلد انو "اليافطات" كتير منها لسا مكتوبه بخطوط قديمه؛ خط الرقعه اسود و ابيض و احمر ؛ في "يفط" لساها من ايام قبل ما يعرفو "آرمات النيون و الفسفوري" شيء قديم فعلا؛ و انا بمشي البنت اللي معي انا وياها كتير مستمتعات بالوضع؛ انا بفكر قديش وسط البلد بمحلاته القديمه؛ محلات القماش و بسطات العطور بيشبه "سوق أبوظبي التجاري القديم" عن جد نسخه

وصلنا الساحه الهاشميه؛ و البنت الي معي بعد ما اشرتلها ع "جبل القلعه" صارت تتخوت:هاد جبل القلعه اللي شرفو تامر حسني؛ هي اتعرفت عالساحه الهاشميه لأنها ما كانت تعرفها؛ اول مره بتشوفها ؛ صوت ام كلثوم في الخلفيه بخليك تحس خالك رجعت لورا زي كأنو الزمن وقف؛ بس مرينا من سبيل الحوريات؛ اتذكرت رواية سميحه خريس اللي انا بقرأ فيها هلأ و اللي عم تحكي عن عمان في الثلاثينات –الروايه اسمها دفاتر الطوفان؛ هاي عمان القديمه اللي بتحكي عنها الروايه و هاد السبيل اللي الناس كانت تنام عندو و كان ايامها و الله اعلم فيه مي مش ناشف زي هسه

لقيت محل تصليح كنادر؛ فققررت أخيط كندرتي ؛ قعدت ع كرسي من هاودل اللي كانو يطلعو زمان –مشبكين بحبال- قعدت لحد ما الزلمه خلص و صوت ام كلثوم في الخلفيه أيضا

برغدان السياحي اللي هو فعلا سياحي؛ لانو فاضي و لحد هلأ مش قادره أستوعب ليش بنوه ووين حطو هالمصاري - من جوه فيه تراس كتير حلو مع زريعه- بينفع ينحط فيه كراسي و أراجيل و أحلى قعده أنس

محاولة العبور "للضفة" التانيه من الشارع عن طريق جسر المشاه عشان ناخد تاكسي باءت بالفشل؛ لأنو طلعة الجسر من المجمع مسكره؛ ما حد يسألني ليش؛ حتى جسر المشاه معطل في هالمجمع؛ رجعنا عالمجمع لقينا سرفيس عالعبدلي و هوب عالداخليه؛ ترويحه

انبسطنا كتير بهالمشوار اللي ما كان متوقع؛ المعرض و المشي في البلد و تصليح الكندره كمان؛ مرات في مشاوير مش مخططلها بالمره بس جد بتخلي الواحد مبسوط؛ انا انبسطت كان كل شي رايق و قديم؛ شي جميل والله جميل جدا


ملاحظه: أبو محجوب من الشخصيات الكاريكاتوريه المعروفه بالأردن؛ مبتكره هو عماد حجاج صاحب المعرض؛ يعبر أبو محجوب و بواقعيةه كوميدية و سوداء أحيانا عن واقع الشعب و المجتمع الأردني خصوصا و العربي عموما؛ لمتابعة كاريكاتيرات أبو محجوب على الرابط التالي:






هناك 20 تعليقًا:

Qabbani يقول...

جميل :)

هي تمشايتي اليومية تقريبا :)

يعني لازم كل يوم امر من مجمع السياحي مشي لوسط البلد سقف السيل , شارع الأمير محمد و ما حوله

ليه؟ مابعرف بحب امر من هالأماكن شبه يومي والي مغامرات اكتير :)

بحس بالناس لما بمشي بهيك اماكن

يلا منيح يلي انبسطي

Amjad Wadiِ يقول...

I enjoyed reading about your trip ... but you looked like a tourist

Mala2e6 يقول...

مياسي حلو كتير الكزدورة و الشرح احلى.. زمان ما نزلت عالبلد
طيب لسة المعرض شغال ولا شطبوا؟

مياسي يقول...

qabbani

هي فعلا أماكن حلوه مع انها قديمه

و بتشوف فيها ناس كتير كمان

هايني بحاول انبسط شكرا عالنصيحه:)

مياسي يقول...

Amjad

yea i am a tourist, from Irbed in Amman u know:D
happy that u enjoyed the trip:)

مياسي يقول...

mal2e6

أهلا وسهلا من زمان عملنا هالكزدروه عشان تزورينا

بنصحك تنزلي؛ بتغيري جو:]

والله يا ملاقط المعرض افتتحوه يوم الأحد؛ ما أظن انو خلص؛ روحي و شوفي ع أي حال؛ ما لقيتي المعرض بتلاقي وسط البلد لساه ما خلص:)

eNAS يقول...

يا عيني
شكلها رحلة روعه والله

ان شالله بس اخلص جامعه ممكن اطلع مع صحباتي... هلا بعدني صغيرة ومش شغل اطلع لحالي او مع بنات متل, ما صرحت المصادر المسؤولة :P
بس جد كتير روعه تفاصيل الرحلة
وكمان كسبتي خياطة الكندرة... شكلها من كثر المشي فرطت
:D:D
ان شالله بتستمتعي اكتر واكتر بايامك الجايه ,وبتكتشفي كمان واكتر
يلاا وانا كمان ادعيلي اشوف اماكن تانيه
:)

مياسي يقول...

ايناس

مش رح أعلق عالمصادر المسؤوله؛ سلميلي عالهندسة الصناعيه أنا بس

ان شالله بتروحي؛ بعد موافقة المصادر المسؤوله:)

هي الروحه فعلا كانت حلوه

rasha يقول...

عجبنى حكيك كتير...اسلوبك جميل

وعلى فكرة...البوست بتاع ليلة الخميس جننى...
شبه ليلة امبارح بالظبط وانطباعى عن نيشان البايخ جدا ...الفرق ان الدفيدوف بتاعتى كلاسيك مش لايت :)

وبما انك مش مدخنة...يلاش تبتدى حتى لو فشة خلق.

blackcairorose يقول...

مياسى

كل صيف وانتى بخير وبحالة معنوية أفضل أفضل أفضل

ود خالص وسلام من قلبى وشكر مخلص على سؤالك يا عزيزتى

anas يقول...

ميسو انا قرأت الموضوع مبارح بس كنت مسطل لدرجة فكرت حالي بموقع امجد p:
مشان هيك ما قلت اشي
بس بتعرفي عندك وصف للاحداث ومجريات الرحله اكثر من رائع وجد استمتعت بالقراءه
يعني بتعرف انا ابن عمان ولا دريت عن المعرض
اي شبعرفني انا كويس لسه حافظ اسمي



والاغنيه اللي حطيتها نقزتني اشتغلت مره وحده ابييييييييه قلبي ضاع بين رجلي p:

:)

سوزان يقول...

تمشايه حلوة ...
زكرتيني بالتكاسي كانوا يضحكوا على زوجي لانه اجنبي يسحبوا منه بالميه استغنوا الله لا يوفقهم
مبين عليكي مرشده سياحيه ممتازه ميسو

Sola يقول...

2eh ya meso ezayek
enty feeen
wa7ashteny
bas keda

راجى يقول...

دى مزيكة موش مجرد حكى
استمتعت جدا بالشامى
اكرمك الله

مياسي يقول...

rasha

أهلا و سهلا نورتينا!!!

رأيك أعتز بيه؛ خصوصا انو من وحده لها مثل اسلوبك و قصصك :)

سلامتك من الجنان!! مالو بوست الخميس؛ بيكفي نيشان اللي مالو دخل

و الله يا رشا شكلو الموضوع حيقلب جد؛ لانو الضغوط كترت!!

بعدين الديفيدوف الكلاسيك اتقل:P

مياسي يقول...

BCR

شكرا عالاماني الطيبه:)
وحمدلله ع سلامتك؛ اشتقنالك!!

زماااااان عنك:)

مياسي يقول...

أنس

عادي؛ و انا دايمن نعسانه؛ أهلا و سهلا فيك و انتا نعسان و انتا مصحصح:)

شكرا عالاطراء؛ مع اني مستغربه حاسه الشرح اقل من عادي!!!!

و منشان الاغنيه يا أنوس غيرناها؛ هلأ نانسي عجرم مكان جينيفر لوبيز؛)

مياسي يقول...

سوزان

أفهم من هيك انو جوزك أشقر كتير؟؟

ههههه؛ يعني ما انتي عارفه كلو بدو يمشي حالو ع حساب التاني بهالبلد

يسلمو عالاطراء انتي كمان؛ ما بعرف عن الدليل السياحي؛ بس فيكي تحكي انو الطلعه معي حلوه؛ بنتبه لكل شي و بحب اتسلى:)

فكرك اغير عن الهندسه؟؟ مش جايبه همها!!!

مياسي يقول...

sola

هايني هون يا سالي؛ وين بدي اروح يعني؟؟

مياسي يقول...

راجي

أحلى مزيكه بوجودك؛ زورونا تجدوا ما يسركم

أهلا و سهلا بك دائما:)