الاثنين، 14 أبريل 2008

تاغ من أنووس

أنووس موديلي تاغ يمكن من ألف سنه !!! و كل مره بدي أرد عليه ما بتزبط معي ....

أول مره: كنت كتير مشغوله بالشغل مش فاضيه أرد بالمره
و بعدين اللاب توب "فيّز" اضطريت أفرمتو و طلع معهوش سي دي تعريفات كرت ال ADSL أنا من زمان كان لازم طخيت حموده ابن خالتي لما جاب لي ياه و ما جاب لي سي ديات الجهاز

حكيت معلش رحت ع جهاز أخوي لقيت العربي مش نازل حكيت ما بدهاش هالتاغ أبصر شو قصتو!!!!

الخلاصه حكيت أكتر من التاغ هون و هسه بدي أجاوب عليه خلص بيكفي

موضوع التاغ هو عشر أشياء عنك - مش أنت عزيزي القارىء - عن شخصي الكريم طبعا ؛ و بما أني مش من هالشخصيات العظيمه ضليت أدوّر أسبوع شو بدي أحكي عن حالي و الآن مع عشر أشياء عني:

1- مش متدينه كتير؛ أي نعم بصوم و بصلي بس زياده عن هيك عادي ما بعمل شي ؛ التدين الفعلي أني أخاف الله و أتقيه و أراعي الناس؛ مش عبادة حركات و فتاوي و حكي مالو دخل من اللي داوشينا فيه هالأيام

2- ما بلبس كعب و لا بحبو ؛ و لو يهملي أضل لابسه شوز دايمن ما بوّفر ؛ الحمدلله أني طويله ف مستغنيه عن الحاجه إلى لبس الكعب العالي

3- زمان كنت كتيييييير مزاجيه - بما أني من مواليد برج الجوزاء- يعني مودي دايمن متقلب؛ مرات كنت أروح مشوار بالشارع يخرب مزاجي و أبطل أروح ؛ بس الحمدلله من يوم ما إجيت عالأدن حتى المزاجيه بطلناها و غيرها أشياء كتير؛ الحمدلله ع نعمة الغربه لوول

4- من أيام ما كنت ف المدرسه و أنا متعوده قبل ماأطلع عالدوام أسمع الراديو- دايمن بسمع حد الصبح - و لحد هسه بعدني ع نفس العاده و اللي حوالي مستغربين منها كتير؛ بس كتّر خير محمد الوكيل شكلي رح أبطلها ع دوره و أسمع روتانا !!

5- كتييير بسيطه و بحب البساطه و بكره التعقيد ف الحياه ؛ كتير "بروتوكولات " و قواعد ف هالمجتمع مش قادره أفهمها عشان هيك دايمن العالم شايفيني متمرده و عنيده مع أني مش طالبه أكتر من الصح و بس

6- مؤخرا.. صاير عندي "فوبيا" قويه أني ما رح أتجوز !!!

7- عندي حالة وسواس قهري متقدمه سببها الإحساس العالي بالواجب ؛ يعني إذا بكون ف الباص بطلع الأجره من أول المشوار ؛ و إذا بطلع من الدار بسأل حالي ألف مره إذا سكرت الباب و لا لأ؛ و دايمن بشيك إذا فلوسي و موبايلي معي أو لأ ؛ كمان حس الكمال فظيع لازم كل شي يكون مكانو و إلا بصير في إشي مش منيح " زي اليوم مثلا.. أنا لابسه كندره مش ماشيه عاللبسه و مش قادره أسامح حالي أبدا"

8- مش من النوع العاطفي كتير؛ بقيس كل شي بعقلي و بعدين بحس بس لما أحب حد بحبو مزبوط

9- كبرت و وعيت و أنا بلعب ف الحاره ؛ و دايمن كانو جيرانا ولاد ؛ البنات في أي مكان كانو ينقطعو ما ألاقي حد

10 - الناس لما تتخرج من الجامعه بتفرح؛ أنا يوم تخريجي كنت ضاربه "كشره" مرتبه؛ ما بدي أتخرج يا ربي ضروري يعني!!!


هما العشر أشيا خلصو؛ بس رح أضيف إشي أخير؛ إنو كتير بكره الشتا و لا عمري حبيتو ؛ الشتا بالنسبه إلي كآبه شديده و برد و البرد بكرهو كتير

شكرا لأنووس اللي بعت هالتاغ ؛ و من قواعد التاغ أنك "تيّيغ" خمسه نفر اللي همّي :
1- قباني بيك
2- شريف باشا
3- ست سالي
4- الورده السودا هانم
5 - ملاقط غسيل خانوم

خلصت الاعترافات لهون و هلأ صار وقت الشغل

هناك 13 تعليقًا:

Qabbani يقول...

:)
جميل ,الشتى حلو :)

انا جاوبت عن هاد التاج من زمان :)
http://muoffaq.qabbani.net/2008/04/03/10-things-about-me-arabic/

بس بجاوب عليه مرة تانية بس ارجع من الشام :)

Anas يقول...

مش راضي يشتغل معك التاغ,,, اه مهو من قليل بحكولي انووس المنحووس
هع ما علينا

عادي بدكش التخبيصات والفتاوي ,,انا بعرفلك شيخ حبيب ومتساهل
تخيلي :اباح للمساجد انها تعطل يوم الجمعه!!!

مودي والله كان شب بحارتي المشكله اسمو صبحي,,لويش دلعو مودي؟؟

5و8 ) احلا شغلتين ,,هاد هو الحكي اللي بقنعني
ههههه جمييييييييل والله يا مياسي حلو حلو
يا ويلي ..حاس حالي بقرأ بالدستور الاردني وانا بقرأ( تاغ=جك)هاد

هلأ النقطه الاهم ,,ولو هو ممكن انساها
(((((((((((عررررف)))))))))))
فيز:عارفها بسب حاب اسمعها منك
فوبيا: اكيد مش مصطلح اردني
وو بس
شو راح يكوم عنوان البوست التاني؟؟
((بعدين مع دينو لانووس؟))

Anas يقول...

اه نسيت احكي شغله
انا بكره الشتا

مشني نحيف ودايما ببرد

Mala2e6 يقول...

انا اول اشي جاي ابارك و اهني و ارحب فيكي
و شكرا كتير على التاغ ..انا جاوبت واحد شبيه

http://ghasseel.blogspot.com/2007/01/blog-post_14.html

شايفة نحنا شغالين تاغات و انتو وين كنتوا؟

ياللا عليكي اذا هيك واجبات كتيرة لازم تعملي كل التاغات القديمة..

شكرا كمان مرة

غير معرف يقول...

ahlan ahlan ya meso;
ezayek,ba2olek 2eh fe 7ad 3amal hack 3am mail beta3 el yahoo beta3y so what ever u gonna read its not me and if he or she send u like a link 2 send a free sms ignore it so this is the way he or she hack on my email
my new email is
sally.elsawy@yahoo.com
add me plz coz i lost ur email and everybody else email's,i even lost all the date i saved on my email like a copy of all my papers here in usa
plz cancel el word verifecation deh ya meso
ana la2et esmy 3andek hena so harod 3al tag dah 7ader ma3a eno sa3b walahy bas 7ader bas dah law kan ana
slam ya amar

Unknown يقول...

qabbani

الشتا مش مقبول بالنسبه إلي بالمره!!!

لما تشتي بحس حالي ف سجن و ما رح أطلع
كل الناس ممكن تتفرج من الشباك عالدنيا و هي بتمطر إلا أنا ؛ ما بتحمل أتفرج بتاتا

أنا قرأت أجوبتك ع هاد التاغ بس ما بيمنع أنو يكون في عشره غيرهم

ترجع بالسلامه إن شالله و بستنى التاغ

Unknown يقول...

@ !\! o o o

أول شي شو هاي ( تاغ=جك) ؟ ما فهمتها ؟؟

التعريفات:

- فيّز: يعني خلص "ضرب" و ما عاد منو فايده زي لما يحكو " فلان فيوزاتو ضاربه"

-فوبيا: مزبوط زي ما حكيت مش مصطلح أردني هاد مصطلح طبي
فوبيا = رهاب يعني خوف شديد جدا بيصنفوه أنو مرضي
مثلا في ناس عندهم "فوبيا" الأماكن المغلقه يعني إذا طلعو بأصانصير مثلا بيعرقو و ضغطهم بيخرب و هيك


أنا " برّيده" كمان عشان هيك مش صحبه مع الشتا

و مين حكى إنك منحوس ؟؟ هاي " أوشاعات" ما ترد عليهم هادول لوول!!

Unknown يقول...

Mala2e6

شكرا جدا عالزياره بس وين الناقوط؟؟

يعني أنا "بحبشت" في كل امحارم الفاين حكيت يمكن "لايص" هون و لا هون بس ما لقيت شي؟؟

مش بيناتنا يا ستي كمان أنا قرأت التاغ اللي ع مدونتك و ما علي تاغات قديمه الله يخليكي لا تبلشينا أنا يا دوب جاوبت ع هاد!!!


شكرا كمان مره ع زيارتك الكريمه عن جد انبسطت فيها كتير

Unknown يقول...

Sola

وبعدين معك يا بنت؟؟ دايمن حد مشتغل فيكي و سارق ايميلك ؟؟ هاي مش حياه !!!

و الله فقدتك هالأسبوع حكيت البنت صارلها زمان ما بينت وينها؟؟

أنا ضفتك عندي بس اعملي accept و حاضر رح أحاول أشيلو هاد "الأخ المدقق"

ما تتأخريش علي و ابقي خليني أشوفك ماشي؟؟

سلام يا حلوه

غير معرف يقول...

Miassi

I'll more than happy to get the tag

?could you please tell me how

execuse my being not familiar

Regards

Unknown يقول...

Sherif

My Dear:
All you have to do is to mention 10 things about ur self and then ask 5 ppl to do the same thing

My best wishes for u :-)

blackcairorose يقول...

مياسى

الحاجة اللى قولتيها وفكرتنى بنفسى هى رقم 7

انا برضه بجهز الفلوس قبل ما ادفعا للكاشير بوقت طويل

لو فى سوبر ماركت وفيه جزء من السير خالى من مشتروات الشخص السابق لى فى الطابور، أبدأ فى وضع مشترواتى على السير أول بأول

افكر مسبقا فى الحاجة اللى مفروض تتعمل واجهز لها كل احتياجاتها

وامثلة تانية كتيرة

Unknown يقول...

BCR

هاي الشغله في غيرها كتير يعني علامات الوسواس القهري الفظيع

أنا دايمن لازم كمان أكون مستعده لأي شي مرات بحس حالي " في حالة تأهب دائمه" حتى و أنا نايمه !!!!


شكرا عالزياره و صحيح تعي لهون وين التاج؟؟ لسه بستنى!!