الجمعة، 21 مارس 2008

عطلة الخميس اللي هو امبارح

امبارح
اللي هو كان عطلة بمناسبة المولد النبوي الشريف

وكعادتنا في الأردن أي عطله حتى لو كانت الأحد بتصير الخميس ليه يا حزركو؟؟

عشان نعطل مع الجمعه و السبت سوا و الناس قال يعني يستمتعو بالعطله

طبعا ما حد ناسي أكيد لما السنه الماضيه عيد العمال اللي هو النيه عيد عالمي ب 1-5 على ما أذكر عملناه الخميس و العالم علقو علينا تا داخو !!!

المهم أنا طبعا كنت بدي هاي العطله من الله عشان أناااااااااام

لأنو كل يوم بصحى عالشغل بدري ف بدي أنام

المهم والله الشهاده لله نمت بس مش للساعه 4 العصر زي أخوي ما بيعمل

يعني عالعشره صحيت

بس عطلة امبارح كانت حافله

يعني من ال 12 ظهرا للساعه 11 بالليل و أنا بره

اول شي رحت عالسوق شريت قمصان و جاكيت جينز

كمان شريت فستان حفله ن زماااااااااااااااااان جاي ع بالي أشتري واحد مع أنو لا في حفله و لا يحزنون بس جاي ع بالي خلص هيك

رحنا عالساحه الهاشميه كانت كلها أجانب و في واحد أردني زريف شعرو بلون الكنافه قرف سمانا من أول الطلعه لاخرها و هو مستلمنا شو هاد لو أحلى شوي شو بيعمل!!

الأجانب كانو معبيين الساحه الهاشميه الغريب أنهم أجانب كتير مرتبين و حلوين بعدين عرفت السبب لأنهم أوربيين مش أمريكان :]

روحنا شرينا مشاوي من بره و اتغدينا ف البيت بعدين أنا و خالتي كملنا الطشه رحنا زياره عند جارتها و قعدة النسوان صعب تنفهم

لحظه بيكونو بيحكو الله و الرسول و الدين و التسبيح و التهليل

بعد شوي بيصير الحكي اشي تماما ما الو علاقه و لا دخل و القعده كانت متنوعه و شامله

يعني في اللي متجوزه و اللي متطلقه و متجوزه كمان مره
في الخاطبات كمان يعني "على وش جواز" اللي بعدهم ما شافوش الواقع ع قولة المتجوزات

و في العزابيه "زي حالاتي" إلا لا إلهم و لا عليهم

المهم و الله مو متزكره نص الحكي اللي انحكى من الدوشه و كالعاده القعده الكبيره بتصير مجموعات صغيره و ببطل حد فاهم ع التاني

بس كل اللي استوعبتو انو أنا مبسوطه بالجلسه بس مع هيك مش معهم

مش كتير هامني و لا كتير مندمجه بجاري و بس

في هيك مواقف بحكي لحالي عن جد مرات الانسان بيفقد القدره على التعاطف يعني أنا دايمن بحكي:

مشكلتك الخاصه بتحجب المشكله العامه ما بتشوف غير حالك بالاخر و انتا بس مهتم بحالك و بتدراي

المهم خلصت الجلسه و روحو نص العالم و روقنا شوي

روحت و غيرت و ع أساس بدي أنام بس الحمدلله ما عرفت أنام ضليت أفكر و بس شو هاد يا ربي !!!

الخلاصه أنا اليوم جيت عالدوام (و ما حد يسأل بتداومي الجمعه؟؟!!) اه بداوم أنا ف شركه أمريكيه و بعطل سبت و أحد

و كمان لسا نعسااااااااااااااااااااانه !!! بعدين يا ربي !!!

نهفات صارت امبارح:

أنا لابسه بلوزه صيفي شوي واسعه من قدام , بنت خالتي بتحكي لي شكلك زي الحامل, يا سلام!!
بالساحه الهاشميه فتنا عالمدرج , اترجتني بنت خالتي نطلع لفوق حكيت لها أنا بخاف أنا المرتفعات بخاف منها كتيييير

كل عيلتنا عندهم فوبيا مرتفعات الطابق التاني و كتير

المهم طلعنا و أنا نازله صرت أزحف زحف عالدرج نزول من الخوف , و كمان معدتي صارت توجعني و حده وراي نازله وراي بتحكيلي أنزل قدامك ع الدرج أسندك لا تخلفي هلأ ؟؟

أحسن حكيت لها أنا مش متجوزه أصلا حكت لي أنا شفتك لابسه واسع و نازله زحف حكيت يمكن حامل يا عيييييني مالهم العالم اليوم!!!

المهم خالتي بتحكي لي فال خير و أنا بحكي اني كتييييييييير نعسانه يلا سلام هلأ وراي شغل





ليست هناك تعليقات: