مياسي

المرأة الجميلة جدا

2009-11-06T16:42:00.002+02:00

كانت متزوجة ولها من الأولاد خمسة وكانت سعيدة جدا

كانت تدير الرؤؤس جدا حيثما مشت في طرقات القرية؛ وكان الشيوخ قبل الشباب ينتظرون مقدمها ليمتعوا نواظرهم بذلك الجمال الباهر جدا

مات زوجها فجـأة؛ وصارت أرملة جميلة حزينة جدا

عادت إلى منزل أبويها وخطبها أناس كثر جدا

رفضت أن تتزوج من شخص أخر؛ فأجبرها والدها على الزواج من أخي زوجها المتزوج وبقيت ساكنة في بيت زوجها القديم جدا

أنجبت من زوجها الجديد ولدين؛ كبر أولادها وصار لكل منهم وظيفة وزوجة؛ وتزوجت ابنتاها وصارت المرأة الجميلة وحيدة جدا

في النهاية طلبت المرأة التي كانت جميلة جدا الطلاق وحصلت عليه بعد كل هذا العمر الطويل جدا

عندما تكره المرأة فهي تكره جـدا

ملاحظة: مأخوذة عن قصة حقيقية وواقعية جدا

البحث عن العروس الخارقة

2009-10-31T00:00:00.003+02:00

عزيزتي الأم "الباحثة عن العروس الخارقة"؛ معلش بس ملاحظة صغيرة ولا مؤاخذه يعني؛ يعني لما يكون ابنك قاعد بالجامعه شي "عشر سنين" ما شالله وهم المفروض يكونوا "خمسة" مش أكتر

ولما يكون صار لو سنه بس بره ولا وراه ولا قدامو "يعني من الاخر مطرّق" ومش عامل اشي زياده غير حرف هالميم اللي راصو قبل اسمو

ولما تكوني ما خليتيش بنت الا وطليتي بوجهها بحثا عن المواصفات الخارقه لابنك المحترم لدرجة انو الشب زهق وصار يروح معك بس عشان تحلي عنه ومش سائل عن العروس كلها على بعضهـا

يعني رجاء هو ابنك مقطوع شكله؟!! ولا طاير بالسجاده عشان طلع لحاله مهندس بعيله ما فيهاش مهندسين؟!!

تا نشوف آخرتها مع هالعروس الخارقة اللي بدكم تجيبوها!!!

ملاحظة: اكيد مواصفات العروس الخارقة لازم تشمل كونها بيضا "بتوجّ وجّ" و"عيونها خضر" وصغيرة ويستحسن تجيب راتب – طبعا الأولوية للمعلمات- في حال في وحدة حبّت ترشح حالها "لعريس الهنا"

مستحسن أروح أنام أنا "انمغصت خلاص" والدنيا برد موووووت

تصبحوا على خير

اسمعوا صغير وملّعب

صـور اليوم

2009-10-21T00:56:00.004+03:00

ما بعد الشّروق –السـاعة السابـعة صبـاحـا

اجتهـاد – السـاعة الخامسة ونصف مساء

بمناسبة العيـد

2009-09-24T01:46:00.001+03:00

صديقتي التي ستتزوج قريبا؛ عبرت عن رأيها في موضوع يتعلق بفكرة استكمال الدراسة في الخارج بقولها:

" أن علي ان استمتع بأيام العزوبية ما استطعت لانها لا تغدو أن تكون أياما مؤقتة مهما طالت؛ولذا فعلى المرء أن ينتهز أي فرصة مناسبة لتحقيق ما يريده " ولكن مع موافقتي على ما قالته لم يكن هذا ما أثار اهتمامي في حديثها

الواقع أن شيئا آخر هو ما أكد لي فكرة تدور في رأسي منذ وقت طويل

قالت أنني تقريبا لم أحظ بفرصة كاملة لأكون على عاتقي في هذه الحياة؛ بمعنى أنه لم تكن لي تجربتي الخاصة والمنفصلة عن ما ومن حولي –كتأثير وتداخل- وإن سفرا ما قد يتيح لي مثل هذه الفرصة كي أحظى بمثل هذه التجربة ؛ ولربما على حد قولها توافرت لي فرصة التغيير ولربما حصلت –نوعا ما في نظرها- على فرصة الالتقاء بشخص يناسب أفكاري وتطلعاتي بمعزل عن محيطي الذي يبدو لي مؤخرا اني أرفضه على مستوى اللاوعي الذي استحال وعيا وصار يعلن عن نفسه من خلال افعال كثيرة؛ تبدأ بالعصبية الزائدة وتنتهي أو لا تنتهي بخوفي المرضي من الارتباط

صديقتي التي لامست وترا حساسا أدخلني في مزاج اكتئاب مخفف وزعل؛ لم يغضبني ما قالته بقدر غضبي من نفسي؛ هناك أفكار قد تصارح بها نفسك على استحياء وفي خفاء ولكنك تصفع بها نفسك في عنف حين يضع أحدهم على جرحك ويلامسه وهو يقول لك ها هو ذا!!

الخيارات التي لم أتخذها؛ والجرأة التي لا أمتلكها ؛ والجبن الذي يغلف تصرفاتي الى جانبي حذري الشديد لمعرفتي بطيشي وعدم نضجي الكافي لمواجهة تكاليف الحياة وأعباء اتخاذ القرار؛ يجعل مني مؤخرا انسانة شديدة العصبية والتوتر ؛ كما قلت لقريبتي إنني بحاجة الى استرخاء ولكن تبدو الراحه عصية؛ من الصعب بل من المستحيل علي أن أسترخي في حين أن أي لحظة هدوء ستكون نسبية استعدادا لضربة جديدة

خوفي من الحياة يزداد يوما عن يوم؛( بعلمي كنت جريئه شو صار معي؟)؛ أتوقع أن الجرأة كانت ظاهرية "بس"؛ والان وحين وصلت الى مفارق مفصلية نوعا ما في حياتي اتضح لي مدى ضعفي الذي يمنعني حتى من "عيش" الحياة

وكالعاده خرجت هذه التدوينه عن مسارها ولم أقل كل ما أريده وكل ما كان بنفسي!!! وكل عام وانتو بخير

وين راح اللباس؟

2009-09-08T03:18:00.001+03:00

أظن أنه قد مضى ما يقارب الـ 8 سنوات على آخر مرة صليت فيها التراويح في جامع. منذ أن استقر بي المقام هنا؛ لم أسمع بإمرأة في محيطي تصلي في المسجد. لطالما حيرتني هذه المسألة!! إلى أن كنت يوما في زيارة لبيت عمتي رحمها االله.

سألتها "سلفتها" الجديدة المتنقبة فيما كانت سلفتها الأخرى حاضرة (وهي معروفة بروح النكتة) :

-ليش يا أم فلان ما بتصلن التراويح بالجامع؟

تصدت السلفة ذات الدم الخفيف للإجابة؛ باعتبارها الأقدم والأكثر خبرة-مع أنها غريبة عن البلد- وهذا ما قالته:

- هاي يا حبيبتي؛ زمان كانوا الحجات يصلوا

معذرة استعارت الموظفة القلم مني

في الجامع؛ بتعرفي كيف ختيارت زمان بقن (كانوا)؛ لازم يشلحوا اللباس – سروال داخلي طويل كان بمثابة الثياب الداخلية في تلك الأيام- ( كنت أسمتع بذهول أول مره بعرف وأظن أن الغرض من ذلك هو الطهارة)؛ المهم

- أه شو المهم؟

- راحن هالختيارات يصلن التراويح بعد ما حطن اللباسات في الخزانة؛ بس خلصن هالصلاة؛ كل واحدة رجعت بدها لباسها؛ طلع يا حبيبتي إنو كل اللباسات مسروقة!!!

- يا ويلي عليهن!!! وبعدين؟

- ولا قبلين؛ هاظ يوم وهاظاك يوم؛ ومن يومها ولا عادت ختياره وحده عتبت الجامع!!!

وهكذا وبسبب هذه القصة التي لا أعلم مدى صحتها من عدمه أو عمرها؛ لم تطء إمرأة المسجد بسبب الحادث المذكور

وسلامتكم وتعيشوا .

يرجى التعاون

2009-09-08T02:07:00.001+03:00

ذهبت اليوم إلى عمان..

لا أذكر آخر مرة زرت فيها عمان ولكني أظنها كانت في آواخر الشتاء

لم تتغير عمان كثيرا؛ كعادتها يزداد الأغنياء غنى ويزداد "المشحّرون" شقـاء

على إحدى الإشارات؛ سيارة زرقاء قديمة وقد ألصق صاحبها على زجاجها الخلفي لوحة تحمل العبارة التالية:

" سائق جديد ... يرجى التعاون"!!!

بما أنني كنت في عمان؛ تذكرت أمرا يخص عمان أيضا؛ تعرفون الشارع الذي يقع أمام مجمع النقابات في الشميساني؟ في هذا الشارع يوجد كشك صغير مختص ببيع "قهوة الغلي" إلى جانب أي بسكوت أو شكولاته بشرط "ما يكون من الغالي".

أقل ما يمكن أن نصف به رائحة الشارع بأنها "مقرفة"!!؛ الشارع ما هو إلا عبارة عن مكب لبقايا أو "حثل" أكواب القهوة الورقية بعد الانتهاء منها؛ ولذا فرائحة الحموضة تملأ الشارع بكثافة لدرجة مقززة.

كثيرا ما كان يخطر لي وأنا أعبر الشارع "لازمه شطف"!!! ؛ ومن ثم أمضي بأفكاري لأتخيل مجموعة من الشباب ممسكين "بالقشاطات" فيما سائل التنظيف مختلطا بالماء يسيل في الشارع.

لا أنفك أفكر بأنه حل رائع!!

أكتب هذه التدوينة وأنا جالسة في مبنى تابع لإحدى الدوائر الحكومية؛ أقطع بها زمن الانتظار الذي مضى منه ساعة للآن؛ أرضية المكتب تلمع لدرجة أنه يمكنك أن ترى فيها "صفحة وجهك"- الكريم طبعا- يعني "تتمرى بالعربي"؛ فيما تتناثر الملفات على الأرض وفي كرتونة كبيرة بجانبي

لاتوجد خزائن ولا رفوف لحفظ الملفات مع أن الحرص على النظافة والرفاهية في الدائرة ككل واضح لكل ذي عينين!!! يطالعني ملف باسم "أحلام فايز فوزي الأغير" ملقى في الكرتونة أيضا.

أحلام؛ إذا كنت تطالعين هذه التدوينة الآن؛ أود أن أقول لك أن ملف القوى البشرية الخاص بك يرقد معززا في كرتونة كبيرة بين أكوام من الملفات؛ يعلو ملفك ملف معنون باسم "عوني خليل" فيما يتموضع أسفله ملف باسم "عبدلله"... هذا للعلم فقط .

تحياتي لك أينما كنت أحلام

الصورة: مجموعة من العمال المصاروة يقلهم ونش؛ يظن أخي أن العامل الذي يتكلم "مخاوي عليهم" فيما أعتقد أنه يحاول أن يثبت صحة وجهة نظره بخصوص شخص مـا

ملتقطة عند إشارة "المواصفات والمقاييس"؛ طريق المدينة الطبية – عمّـان

وقفات 3 لما قبل رمضان

2009-08-21T01:14:00.002+03:00

الديفينس

الديفنس والذي يعني "الدفاع" بعد الترجمة؛ هو المناقشة الثانية التي تجاوزتها اليوم؛ تأخرت عن موعد تقديم موعد تحديد هذه المناقشة أسبوعا فتحولت إلى "ممسحه"!! حتى رئيس القسم الذي "لا بيهش ولا بينش بهدلني"؛ بسبب "تياستي" الأزلية بالمعاملات و الطلبات وخلافه؛ تحولت إلى ما يشبه "المكوك الطائر" بين الكليات الهندسية والطبية واليرموك؛ فضاع يومان؛ إضافة إلى ظروف أخرى: تأخرت عن تسليم موعد الرسالة بالتعديلات المطلوبة؛ بعد سردية طويلة لا أشعر بالرغبة في تذكرها مجددا؛ وبعد أن أخذ المشرف على عاتقه تسليم النسخة للممتحن الآخر الذي كان يرفض الحضور بلا نسخة-أعتقد أنه سلمه إياها في المسجد بعد الصلاة- مما يهدد برسوبي!!! مرت الزوبعة التي أخذت من وقتي وأعصابي الكثير بسلام!! لن أفيض في وصف شعوري باليأس إلى درجة أن التأخير أو الرسوب لم يعن لي شيئـا!! ديفينس وحالة ملل!! 10 أيام من النكد المتواصل انتهت جزئيا اليوم؛ للآن ما زلت متوجسة من أن يحصل شيء جديد!!

فتش عن المرأة

جريمة شرف في الأردن لشاب يقتل شقيقته طعنا؛ إمرأة أخرى قتلها شقيقها بعد مصالحة وهمية لأنها تزوجت "خطيفه"؛ فتاة تبلغ السادسة عشرة يقتلها عمها وذلك بسبب كونها مغتصبة ؛حريق في عرس في الكويت يتسبب بموت عدد لا بأس به من النساء والأطفال كان المتسبب فيه طليقة العريس الأولى وأم ولديه؛ حتى هنا بالقرب منا؛ قوات الدرك تتدخل لفض الاشتباكات بين عشيرتين في بلدة مجاورة- والتي ظللت لمدة يومين أستمع لصوت الأعيرة النارية بعد منتصف الليل بسببها-حيث قتل الخال ابن أخته وكان السبب هي زوجة أخ المغدور!! المرأة حاضرة بقوة في كل أخبار الشهر الماضي؛ "بس مش طالعه بالريحة الطيبة للأسف"!!!

اليوم الأخير قبل رمضان

ربما لا يعرف الكثيرون أن بحوزتي رخصة سياقة مع وقف التنفيذ؛ بوقف التنفيذ أعني أن هذه الرخصة "مركونه" منذ ما يقارب الست سنوات؛ وكان السبب عدم وجود السيارة

توفرت السيارة صيف العام الماضي؛ سيارتنا التي كانت نتيجة فحصها 4 جيد – والتي تستحق تدوينة لوحدها بسبب "حركاتها القرعة"؛ السيارة تمتاز بثقل الغيارات إضافة إلى أن "الهاند بريك" يلزمه "حيل" مش متوفر عند "أبو الشباب"- والتي هي أنا- لرفعه وتحركيه.

في اليوم الأخير قبل رمضان الماضي؛ قدت السيارة وإلى جانبي عمي في واحد من أكثر شوارع إربد إزدحاما؛ على الإشارة لم أتمكن من التحكم "بالهاند بريك" فانزلقت السيارة بخفة لتصطدم بمقدمة سيارة سرفيس بيضاء خلفنا!!!

لم يكن الاصطدام مشكلتنا الرئيسية؛ حيث إنني حين نظرت من النافذة-وكنت في حالة صدمة- وجدت إمرأة واقفة على الرصيف تصرخ في لأن ابنتها كانت تعبر خلال الفراغ الذي كان بين السيارتين حين انزلقت السيارة الـ4 جيد

كلمات من عينة: "كان البنت راحت"؛ و"إذا يا عمي بتعرفوش تسوقو ليش بتطلعو بسيارات"؛ "وشو هاد هي أرواح الناس لعبة؟!!" كل هذا وأنا صامتة لا أرد ؛ تولى عمي كل المهمات الأخرى؛ انتقل إلى مقعد السائق؛ وحرك السيارة التي كانت قد بدأت تعطل السير؛ ونظرت إلى مقدمة سيارة السرفيس ولم تكن الإصابة بالشيء الذي يذكر؛ ولذا تجاوزنا تعقيدات "الكروكه" بعد أن قال لنا السائق ذو النظارات السوداء: "الله معكو عمو"

تحولنا إلى فرجة؛ ولم أعد الكرة مجددا "زي ما تحكوا اخدت موقف من سيارتنا كلها"؛ قدتها مرة لمدة عشر دقائق مجددا مع أخي وكان ثمن الحصة "باكيت ويستون" وكان هذا آخر عهدي بالقيادة!!

حين أفكر في ذلك اليوم أفكر تلقائيا باليوم؛ العشرون من أغسطس كان يوما حاسما؛ كرهت هذا الصيف لأنه كان عبارة عن "ملاحقة بملاحقة"؛ وجاء رمضان على حين غرة بالنسبة لي وقد أحسست بأني "مغدورة"؛ "انضحك علي" بـمناسبات صيفية واجتماعيات أخرى كثيرة؛ ولكن لم تتح لي الفرصة لتسلية حقيقة تمسني أنا شخصيا.

رمضان كريم

رمضان كريم وعساكم من عواده؛ وكل عام وأنتم بخير؛ اعذروا تدويني السيء؛ وذلك بسبب قلة الممارسة والحالة المزاجية المتردية.

على الهامش:

- لا أعرف لماذا حين تكون على القمة لساعات معدودة؛ لا تلبث أن "توقع على راسك غز بعدين" ولفترة طويلة جدا!!

- أحيانا يأبي الناس أن يخيبوا أملنا بهم؛ ومع أنه لربما من الواجب أن نفرح لصحة توقعاتنا؛ نتمنى لو خابت هذه التوقعات بالذات؛ ولو لمرة واحدة فقط في الحياة!!

تحديث: الآن وبعد الانتهاء كتابة هذه التدوينة؛صوت الأعيرة النارية وصوت سيارات الشرطة في البلدة المجاورة يعلو من جديد !!! مواجهات أخرى وفيما يبدو هناك مطاردة قائمة بين الشرطة وبين من قاموا بالتصويب على الدورية!!

ناقشت يا جمـاعة!!

2009-08-09T22:36:00.005+03:00

أول شي شكرا يا ايناس عالوردات جد حبيتهم؛ الوردات اللي عليهم كرت من إيناس والتانيين من بنت خالتي :)
أنا ناقشت اليوم وبلاش أحكيلكم؛ استلموني ساعه ونص لدرجة إنو خلاص مليت حالي؛ كنت بدي أنزل وأحكيلهم خلاص إعملوا ما بدالكم!!

في نهفتين عملتهم اليوم:
الأولى: أنو الدكتور بيحكلي هيك فجـأة: انتي متحيزة لجنسك!! (نعم يا عمو!! ليكون بتعرف أنو عندي مدونه!!)
المهم بيسألني ليش المعظم هم بنات مش شباب في الرساله؛ بحكيلو في شباب كانوا 4 بنات و3 شباب ؛ ولا بدك ياهم 3 ونص يعني؟ يعني الناس كانوا شبه نايمين بس سمعوا هيك حششوا؛ حتى المشرف ضحك مزبوط!!!

التانيه: انو هو طلع قصدو عالبنات اللي سجلوا بصوتهم للسيستم؛ مفكرهم 7 بنات!!! طبعا مش عارفه من وين جابهم!! المهم بيحكي لي ليه ما جبتي حد متخصص يعمل لك التسجيل زي أبو عبيد مثلا!! (للي ما بيعرفوه أبو عبيد مذيع البث المباشر) حكيت له: ومن وين بدي أجيب لك ياه أبو عبيد يا دكتور؟ قام رد وحكى: انتي ما تجيبيه خلي المشرف يدفع له مصاري!!!
المشرف حكاله: لا يا دكتور انا هيك بنسحب!!!

المهم لما حكوا اني خلاص ناجحه؛ خالتي عجت زغروده وصاروا خالاتي يبكوا؛ حسيت حالي بدي أبكي معاهم جد بس مسكت حالي!!! الصراحه ما صدقت انهم نجحوني!!
الحمدلله!!!

شكرا لكل اللي حضروا؛ إيناس شكرا جدا-والفوشيه لابقه- دريمي شكرا كمان وانبسطت بشوفتك كتير؛ وشكرا لأمجد على الحضور

وشكرا لكل اللي سـألوا وكانوا مهتمين يعرفوا شو عملت؛ من قلبي شكرا:)

ودامت دياركم عامره بالأفراح!!!

الحلـوان .. أخيـرا!!!

2009-08-05T22:54:00.004+03:00

اليوم شفت ايناس واخدت حصتي من الحلوان
مـا طلع كعك عيد زي ما كنت مفكره؛ اشي زاكي كتير وطعمه هيل :)

طبعا بلشنا لقاء القمه "بالنميمة على الشعب البلوجري" لازم دايمـا هيك بنعمل بس نشوف يعض

قعدنا بره وفي "عشيرة" نحلات "قززوا" ايناس بحياتها؛ وانا احكيلها يا بنتي طنشي ما بيعملولك شي بس ولا حدا هون!!! كان لازم صورتهم هم كمـان

اليوم نار الله الموقده جد؛ الشوب والرطوبه فظيعه؛ ايناس عزمتني على كوكا كولا مع الحلوان؛ قلتلها صحيح يا ايناس انا ما بحب الكوكا كولا بالمره بس هاي ازكى كوك شربتها بحياتي!!!

السفن دايت لايناس والكوك إلي؛ والصوره بناء على طلبها قال بدها إثبات إنها حلتني؛ هاي يا عمو اثبات وما تخافي ايناس ما رح انشر الصوره التانيه:)

وطبعا لانو ختامها مسك رحت على القسم واكتشفت انو السكرتيره مروحه قبل نهاية الدوام بشي ساعة ومش مسلمه رئيس القسم نموذج تحديد موعد المناقشة!!! مع اني سلمتها ياه من يوم الاثنين والمفروض المناقشة الأحد!! طبعا بلاش احكيلكم شو صار فيي!! وسحبت حالي انا وايناس وروحنـا

وعلى هيك في بكره كمان مشوار من صباحية ربنا علشان نموذج !!! والله المستعان!!!

ملاحظة: عاجبيتني الصورة كتير!!! مش مصدقه انو أنا صورتها!!!

ذكريات عن حرب الخليج الثـانية

2009-08-02T02:15:00.001+03:00

أول ما يتبادر إلى ذهني هو صبيحة ذلك اليوم الحار من أغسطس؛ كان لعمي غير المتزوج في حينها عادة مقدسة تخلص منها بعد عهد الفضائيات الجديد؛ كان مغرمـا بالاسمتاع إلى الراديو ومتابعة الأخبار باستمرار؛ هل يذكر أحد مـا برنامج "حكم العدالة"؟ أظن أن كل الأردن كانت تتابع هذا البرنامج مما يدلل على مدى شعبية الإذاعة في تلك الأيام.

المهم؛ كان لعمي راديو أسود لفه "بمغيّطه" حتى لا تتداعي أجزاؤه؛ في ذلك الزمـان-الذي يبدو لي الآن بعيدا جدا من يصدق أن 19 عاما مر على ذلك التاريخ!!- كنا معتادين على الإفطار في "البرنده"؛ نفطر ونستمع إلى الأخبار ثم نسمع أن صدام اجتاح الكويت!!! فنتوقف عن كل شيء حتى نسمع جيدا ما يقال مرتين!!!

كان ذلك صيفا انقلبت فيه موازين الحياة؛ كنا "بنصّيف على أساس" والآن صار علينا أن نرجع إلى الإمارات مرة أخرى، كنا نتباحث في قرار الرجوع فيما الناس تفر بحياتها من الكويت هربا عبر الصحراء؛ وفيما انقسم الشارع العربي إلى نصفين ما بين مؤيد للغزو ومعارض؛ والعائدون العائدون!!! كان العائدون يتوافدون بغزارة ومعظمهم من أصل فلسطيني؛ هؤلاء الذين قيل فيما بعد أنهم قد جلبوا معهم عصر الانفتاح إلى البلد ، ذلك العهد الذي انتهى معه عهد "الشـاين" ومنتجات شركة "الانتاج" إلى الأبد؛ صار شامبو "الفلورا" و"جليمو" مجرد ذكرى بعيدة. بدأ عهد "الهيد أند شولدرز" و "السينكرز".

الإشاعات عن السيارت الفارهة؛ عن الناس المتحررين –نسبيا- بعرف ذلك الزمان
(لربما لم يكن أحد ليحزر أن البلد كلها ستصير متحررة كما هو الوضع عليه الآن!!!)

ردا على موقف الأردن الذي اختار الصف العراقي؛ طرد الكثيرون من أصل أردني من أعمالهم في الخليج وعادوا؛ أما نحن فعدنا بالعكس.

الصحراء السعودية الحارقة أضافت إلى رمالها مشهدا جديدا: الأبراج التي تحوي جنودا شقرا ذوي عيون ملونة؛ مرتدين الزي العسكري وحاملين رشاشاتهم؛ تجدهم في كل مكان: في محطات البنزين وعلى جوانب الطرق.

حين عدنا إلى الخليج؛ كانت مرحلة أخرى؛ توقف التلفاز عن بث الكرتون-وكان ذلك لمن هو في عمرنا كارثة عظمى!!! في زمن كانت هناك قناتان رئيسيتان ولم يبدأ زمن الفضائيات بعد- المذيع يبث أخبارا وصورا عن دبابات و مدرعات وتحالفات وتجمعات!!! رباه!! كم كرهته وهو لا يبث ألا صور الصحراء الكئيبة وإطلاق النار.

وحين بدأت تهديدات صدام بالكيماوي؛ بدأنا في تحصين البيوت ضد الغاز؛ الأشرطة اللاصقة كانت تسد النوافذ على حوافها ومتقاطعة كذلك؛ التموين فالتموين فالتموين؛ المعلبات والطعام سريع التحضير؛ حين عدت إلى الأردن في الصيف الذي تلا ذلك الصيف؛ وجدت الكل قد حول نوافذ بيته إلى تقاطعات؛ أذكر أنها استغرقت وقتا طويلا جدا حتى زالت ولكن أثرها النفسي لم يزل.

الخوف؛ التكهنات الخوف من التفنيشات؛ التكهنات ثم الخوف ثم لا شيء!!! لا كيماوي ولم يضرب صدام إسرائيل- كما وعد في حينها وصدقه كثر- وحررت الكويت بفعل جهود قوات التحالف ورأينا "الأمريكان" في أرض الحرم!!!

منذ ذلك الزمن للآن تغيرت أشياء كثيرة؛ عاصرت الحرب الثالثة التي سقطت فيها العراق؛ وانتهى فيها عهد صدام أسوأ نهاية؛ عرفنا العولمة وجلبت معها عالما جديدا على الكل بدأ مع عهد العائدين من الكويت؛ ولكن أجمل شيء في تلك السنة كانت أني ولأول مرة في حياتي رأيت البرد!!! كنت أعيش في صحراء قاحلة لا تمطر فيها إلا قليلا وكان البرد من قبيل المعجزة، وقفنا يومها فرحين في الحوش مع جارتنا ننظر إلى البرد في فرح غامر!!! إلا أننا قبل البرد كنا نتحدث عن تخزين المعلبات ونتبادل النصائح حول استنشاق الغاز وتحصين النوافذ!!

إذا كانت لديكم ذكريات مماثلة شاركوني بهـا.

خوف

2009-07-28T02:26:00.003+03:00

"واليوم لماذا أخاف الموت؟ خليق بي أن أخاف من الحياة أكثر؛ فهي الأكثر إيلاما! ولماذا تتفرق سحب الإيمان من سمائي كل حين. إيماني مثل سحابات الصيف رقيق ولا ظل له."

~~عزرائيل صـ195~~

عزازيل صـ195

حوار عبثي

2009-07-24T03:59:00.004+03:00

-ممكن ...؟!!!
-معقول هيك صار؟؟!!
-يا زلمه مش معقول!!!
-طيب قول وبدل؟
-مش ممكن انو هيك صار؟ هالسولافه مش خاشه بمخي يا عمي!!!
-شو هاظ اللي بتحكيه يمّه؟!!
-ليش وعشان ايش؟ و شو لزومه أصلا؟
-مش ضروري
-عـادي ومالو داعي
-مش مهم بقولك المهم هسه مين اللي حكى هيك عن .... ؟؟

-أقولك: أي بقطع إيدي إذا ما كانت هاي كلها سولافة نسوان؛ الله يلعن حرمهن وحرم اللي ظابهن بالدور!!!

ترشيحـات تصويتات

2009-07-18T02:05:00.000+03:00

شعاري الانتخابي:بسرعـه لأنو وراي رسـاله بتستنى

المدونة أولا مرشحـه ضمن مسـابقة مدونة صيف 2009 التي بدأتها كل من صاحبة القصص الطرمة والأخ المحروق
كل المطـلوب منك عزيزي الناخب أن "تكبس" هنـا وتصوت للمدونة التي تعجبك (وما تنسانا رجاء!!!)؛ ومن الواجب أن تكون من ربع (شلّة أو جمـاعة) الفيس بوك (كتـاب الوجه) بالعربي الفصيح!!!

ثـانيا: لأن منصبا واحدا لا يكفي (الواحد لازم يأمن حالو بهيك أيّـام صعبه)؛ المدونـة مرشحة أيضا ضمن جـائزة هديل العـالمية للإعلام الجديد؛ رابط التصويت هنــا
بالنسبة للتصويت الثاني؛ بعد أن تضع إيميلك الذي تنوي التصويت به؛ تظهر لك قائمة بالمدونات المشاركة؛ اختر المدونات ثم تابع إجراءات التصويت (شكرا لـ 77Math على التوضيح)

ملاحظـة أخيرة: عزيزي الناخب؛ صوتك أمانة فضعه حيث يستحق رجـاء(ديموقراطيّة افتراضية بلوجريّه على أساس!!!)
ملاحظه عالمـاشي: بعدني بجلي؛ بس أخف شوي من أوّل!!

الجـلايّه اللي عليها رساله!!

2009-07-10T22:32:00.001+03:00

هاد اللقب اللي طلعت فيه تقريبا من أسبوع؛ من وقت ما اجو أهلي بالزبـط-مع انو انا جلايه من زماااااااااااااان

ناس فايته وناس طالعه؛ قرود بتنطط وعفاريت صغار بتعيّط

ضيافه رايحه وضيافه جايّه؛ اعملي شاي؛ حلي عصير؛ شقحي بطيخ؛ طبعا غير الجلي والناس والصياح-أختي بتساعدني والله كتير اذا مش عم تبلش اكثر؛ بس هي بتطلع من حصتها الضيافه أكثر شي؛ غير هيك وراها امتحانات فيرست والثانيه مش ملحقه دراسه من هالميمعه!!

احنا مشكلتنا الرئيسيه بتتركز في العدد؛ يعني ممكن تطلعي شي 20-25 كاسة شاي عالوقعه- وعلى فكره هاظول مش دايمن بيكونوا ناس جاي تزور-لا يابا ممكن يكونوا اولاد عمامي بس حابين يسهروا للساعه واحده ثنتين تحت الداليه ويا حرام بدهم حد يسليهم!!!

طبعا من أسبوع وانا بس عالسيناريو التالي:

اجلي جلي الفطور؛ حطيلنا غدا مش عارف شو في وراهم؛ بيرجعوا نص العيله من الجامعه برجع بحط أكل كمان مره؛ وبجلي؛ بالليل بيجو ضيوف جداد بنرجع بنعمل شاي وبنحط عصير وبنركب قهوه تكمالة السهره

بتودي الصغار يعدولك البشر اللي قاعده برّه؛ بتحطي شي 10 كاسات؛ بتيجي الوالده: شو هاظ؟ زيدوهم صاروا شي 15!! وبعدين؟!!!

بفوت عالمطبخ مره كل ساعه او نص ساعه بكتشف أنو كأنك يا ابو زيد ما غزيت!!!

المطبخ متروس ترس وبرجع بجلي كمان مره؛ هديك المره جليت يمكن الساعه 4 الصبح!!

أمي العزيزه عندها مفهوم واحد عن كونا انا واختي معدلات وشاطرات؛ لازم تظلي بالمطبخ واقفه؛ يا بتحطي ضيافه يا بتجلي؛ ودايمن اذا ما طلعت الضيافه بعد شي 10-15 دقيقه عالاكثر بتيجي تبهدل؛ غلبت وانا بفهمها انو عادي والمسائل ممكن تمشي اسلس من هيك بس مشان الله تقعد مطرحها وتتركنا ندبر المسائل بس وين تا تقتنع!!!

اليوم حكيتلها مشان الله؛ الشغاله اللي موصين عليها من المكتب مش ناوييين تجبيوها؟(بتخوت طبعا) ولا الشغاله اللي حاطه بلاشر-كريم اساس يعني- خلاص بتكفي؟ (قصدي عن حالي أكيد)

بتذكر مره كنت انا واختي قاعدين بنتفرج على مسلسل سوري؛ بما أنو الشوام بيضيفوا دايمن قهوه-مش شاي على طول زي الأردنيه- البنت فاتت يا دوب؛ ركبت القهوه هوب صارت خالصه-شغل مسلسلات يا عمي- بحكي لأختي أيواااااااااا؛ زي هيك أمي لازمها بنات؛ بس تركب القهوه تنزل مباشره!!!

طبعا هاظ كمان غير كونك بشتغلي سكرتيره؛ وكوّايه ومستشاره وترجمان لأخوانك الصغار-لسه عنا اعمار 15 و 11 و4 سنين حتى؛ عيله ممتده اسم الله عليهم؛ بيحبوا يجيبوا ميداليات ويتسلوا فيهم (أو بالأحرى يلهدوهم على آخر عمرهم السعيد كأنو الكبار مش كفايه!!!)؛ هاد مش عاجبو؛ وهاداك بيقاهر بالثاني؛ والفيلم الفلاني بسألوكي عنه؛ وبيزعلوا بس تطنشيهم؛ وبيتأففوا من العيشه ومش عاجبهم إشي؛ وشو هاد الأردن بتخزي وبتملل وحـاله!!!

النوم؛ انسى غرامك راح؛ من الصبح بيقعد ابوي وعمي بالبلكونه؛ وانا غرفتي عالبلكونه وهات يا حكي ومناقشات-صارلي من أول ما وعيت بسمعها؛ انا على فكره اكره ما علي حد يحكي فوق راسي وانا نايمه؛ راسي خفيفه كتير؛ عشان هيك حاطه جنبي مسجل؛ مباشره بولع الراديو على فن اف ام يا أيام اف ام وعالصوت العالي بكمل نوم اذا كمل

الرساله؛ ما بعرف والله ايمت رح تكمل مع هالوضع؛ صعب الواحد يركز بهيك اجواء؛ وعنا مناسبه وعم بلفلف بالسوق وبحمحومة الشوب صارلي اسبوع من مطرح لمطرح ويادوب ألحق؛ وبس اروح عالمشرف عالرساله ويسألني: ليش متأخره لهسه؟!!! بكون نفسي أجاوبه: والله اجتماعيّـات يا دكتور!!!

بتهون وبطلعلهـا قرون!!! وبعدين بيسألوكي ليش بعدك ما خلصتي؟!! أنا عارفه والله شكلو بتدلع!!!

ملاحظه: العنوان تسماية أخوي-15 سنه- كل مايفوت عالمطبخ ويشوفني بجلي بيحكي لي:"شو أخبارك يا جلايه عليها رساله؟!!!"

حدث اليوم في السوق

2009-07-07T13:21:00.006+03:00

فيما كنا نمر انا واختي في احد شوراع اربد الضيقة التي لا تكاد تتسع إلا لمرور سيارة واحدة فقط؛ أن رأينا رجلا "شايب"-بيطلع بحيطان الأربعين خمسين سنه- يتجادل بصوت عال مع امرأتين في سيارة كيا خضراء-السيارة المميزة للشعب الأردني حاليا وذلك بسبب كونها "بتوفّر"

لم أسمع جيدا ما قاله لهما ولكن سمعت إحدى الامرأتين تقول له:

"مش من حقك تزعل؛ لكان لشو البانكيت(الرصيف) موجود؟"

ثم أنهت الحديث بتحريك سيارتها المتوقفة في عرض الشارع الضيق؛ فيما تابع الرجل الصياح بصوت عال –ونسيت ما قاله بصراحة- ليقول بصوت أعلى:

-صحيح إنك وحده حيوانه!!!!

فيما كنا نبحث في إحدى محلات الألبسة عن "أواعي شوي طويلة ومستّره"؛ أن انتبهت للبائع الشاب الذي يرتدي سلسلتين حول رقبته؛ إحداهما عبارة عن الأرنب المميز لمجلة البلاي بوي الشهيرة؛ وأقول في نفسي: من كل عقله هاد؟ حاططلي أرنب مألمس ومبسوط على حاله؟!!!"؛ معقول مش عارف شو معناه هالأرنب؟!!"

خرجت من المحل وصارحت شقيقتي بأفكاري؛ ثم قالت لي: "آه صح؛هاي العلامه مره صاحبتي أيام المدرسه حكت لي انها مش كويسه!!!"

فيما كانت شقيقتي في غرفة القياس تجرب قيمصا نيلي اللون؛ أن تقدمت فتاة من البائع لتسأله: "عندكو طقم صباحيه عرايسي!!!"؛ فيخطر في بالي أن المحل ليس مخصصا لهذه الفئة أساسا؛ ويرد عليها أحد الباعة بقوله: "لأ؛ عنا بس تنانير قصيره إذا بينفع!!!"

البائع الآخر وبعد أن غادرت يضحك ممازحا إياه: "مالك اتخربطت وانخطف لونك بس سألتك عن العرايسي؟!!"

ملاحظة: هذا ما حدث البارحة؛ ولذا لربما كان من الواجب تغيير العنوان؛ ولكن لأسباب تقنية انترنتية منعت النشر في حينه؛ يبقى العنوان على ما هو عليـه

ابتسامة

2009-07-05T00:43:00.001+03:00

قلت البارحة لصديقة قديمة جدا لم أرها منذ ما يقارب 12 عاما أنني كلما تذكرتها ابتسمت

سألتني عبر شاشة محادثة الفيس بوك عن السبب؟

قلت لها ان ابتسامتها تحديدا هي ما تجعلني ابتسم

كانت لها ابتسامة صافية كأنما تنبع من القلب مباشرة –هي ابتسامة ممزوجة أيضا بشقاوة مصريّة محببة

ابتسمت عبر الشاشة وقالت لي ان كل الذين تعرفهم يقولون لها ذات الشيء

ولذا رسمت لي على الشاشة ابتسامة ايموشن وقالت لي:

هذه من القلب؛ لك أنت فقط

أناس لم تعرفهم كثيرا ولكنك تبتسم فقط لابتسامة صارت الآن ذكرى في خيالك...

ومع ذلك شكرا يا صديقتي... لأن ابتسامتك كلما مرت ببالي، جعلتني اشعر بسعادة خفية بشكل أو بآخر فأبتسم...

تلقائيا...

شيء مدهش حقا!!!

ثلاث قصائد من الشعر الإيراني

2009-06-19T23:30:00.000+03:00

رستم يبارز اسفنديار في إحدى المنمنمات الفارسية

بي. إس. في أول الصفحة: اشتريت هذا الكتاب –مع أني لا أحب الشعر إلا مسموعا و في حالات قليلة – و أفضل عليه النثر و الرواية و ذلك من أجل القصيدة الأولى؛ فهمت شيئا عندما قرأتها أول مره على عجالة في المكتبة ثم عندما أعدت قراءتها في البيت فهمت شيئا آخر؛ رجاء إلى من يفهم أن يفهمني!!

الأولى ...

في ساحة المدينة

يـداه و رجلاه في الأغلال

يجرجرونه بتهمة كبرى

-أيها الصعلوك

قالها أنيق

- حثالة المجتمع

قالها طبيب

- أيتها القذارة

قالها كنّاس

- أعوذ بالله

قالها عفيف

إمرأة كانت عابرة....

للشاعرة الإيرانيّة: فاطمة راكعي

الثانيـة...

أمـومـة

لم أحسد أبدا

الشعراء

سحرة بلاد الكلام

لم أحسد أبدا

الفلاسفة

حكماء أرض الحكمة

لم أحسد أبدا

العرفاء

رواد إقليم العشق

فقط كنت أحسد

الأنبياء

قبل أن أصبح أمـا...

فاطمة راكعي

الثالثـة

الوحـدة

الوحدة

إمرأة في أواخر الليل

الوحدة

نصب جندي مجهول

في ساحة خالية

الوحدة

صوت بلا صورة

على مغناطيس الفضاء

الوحدة

ذكرى ضائعة

بين الغرباء

الوحدة

عنزة جبلية حزينة

لم يبق من سلالتها

غير قرون معلقة

على جدران الفنادق

للشاعرة الإيرانية: فرشته ساري

!!!27

2009-06-09T18:33:00.005+03:00

يا رب

ساعدني لأتغلب على جنوني المستتر؛ ومزاجية الجوزاء التي لا تحتمل؛ وأفكاري التي صارت لا تطاق!!!

نسيت: والحر الفظيع أيضا!!!

27 سنة ولكني أشعر أني ما زلت في براءة الـ 15 (حتى أنني كنت أقل براءة لربما!!!) وأشعر أن هذا لكثير!!!

شيء ما ... خطير

2009-06-04T02:56:00.001+03:00

خطر لي اليوم وأنا أراقب الطريق من النافذة أن شيئا ما سيجمعنا

ومع أني لا أعلم عنك شيئا لربما... ولم أرك في حياتي مطلقا...

ومع أن حياتي عودتني أن لا تسير كما أتمنى تماما وغالبا ما تمضي على نحو غير متوقع أبدا... ومع ذلك

لا أكف عن الإيمان في أعماقي بأن شيئا ما سيجمعنا

شيء ما.. خطير

على بعد مسافة ما

2009-05-30T15:09:00.000+03:00

حضرت البارحة حفلتي خطوبة متتابعتين لمدة 4 ساعات متواصلة ولكم أن تتخيلوا الإرهاق الناتج عن ذلك؛ إضافة إلى ذلك أديت اليوم صباحا امتحان التوفل؛ وعلقت خالتي قائلة : "وراكي امتحان ودايره من حفله لحفله!!!" ما علينا

الحفلة الأولى كانت صادمة بجميع المقاييس؛ مدهش ما تفعله الفتيات أحيانا بأنفسهن للتغلب على خيبات الأمل!!! وربما أخصص لها تدوينة منفصلة بعد الإحاطة بجميع تفاصيلها وظروفها ولكن الحفلة التي تلتها هي ما أريد أن أتكلم عنه

العروس ابنة لأم مطلقة؛ انفصل والداها منذ زمن بعيد وهي لا تزال طفلة صغيرة؛ وربتها زوجة والدها كابنة لها تماما؛ لم تكن علاقة الفتاة بأمها وثيقة جدا وذلك لأن الأم تزوجت بعد طلاقها مباشرة تقريبا وانتقلت إلى محافظة أخرى فيما بقيت الفتاة في حضانة والدها؛ كانت علاقتها بزوجة الأب قوية إلى درجة أنها كانت تناديها " ماما" فيما تنادي والدتها يا خالتو!!!

اختلفت الفتاة مع زوجة أبيها مؤخرا؛ وجاءت ظروف خطبتها ولما تتصالح مع زوجة أبيها بعد-مع أن الخطأ من جانب الفتاة- وحضرت زوجة الأب الخطبة وفي قلبها حزن شديد

وجاء وقت التلبيسه- وقفت زوجة الأب من بعيد تراقب فيما دموعها تتساقط ؛ ووقفت الأم على المصمد (الكوشه) ولكن على مسافة بعيدة لتمسح دمعة وحيدة هي أيضا؛ فيما كانت ابنة عم العروس تقوم بواجب مساعدتها في ارتداء الذهب وهو ما تقوم به الأم عادة في هكذا موقف!!!

ومع أن زوجة الأب وبعد إلحاح شديد من زوجة خالي اختارت أن تبادر بالصلح فقبلت ربيبتها و"اتصورت معاها"ومع العريس؛ ومع أنها كانت تتمنع وذلك على حد قولها :" انها ربت وتعبت؛ وطول عمرها كانت تحسها زي بنتها؛ اتخيلي تكون بنتك ومش قادرة تكوني جنبها؛ أنا ربيتها شي 20 سنه"!!؛ خطر لي وأنا أنظر إلى الأمين –المربية والتي هي بالولادة أن كلتيهما على مسافة ما!!!

فلمن ننسب الفتاة الآن؟ شيء محير ومحزن فعلا أن تكون أنت وأمك –مهما كان تصنيفها- على مسافة!!!!

A wisdom by Miss Z.

2009-05-30T14:50:00.003+03:00

In TOEFL exam this morning, Miss Zee, an American watcher from the main center in Amman kicked a medical student out before just the exam begins, she said to him in loud voice:

- A medical student, you always come with an attitude, you won't submit your exam, when you calm down and listen carefully, you can come back "Ya Doctor"!!! –She said it with a clear Arabic accent!!

-When you clam down, you can come back "Ya Doctor", just once again !!!

After a while, Miss Z returned the student back, she asked all the students in the Hall:

-How many of you are in Medical Services here?

A bunch of students raised their hands up. She continued:

-Well I know that being in Medical study makes you believe that you are strong in English than other colleagues in engineering or whatever, you are doctors for God Sake, how can you be so rude and save people lives?!!! Being doctors doesn't give you the right to act this way!!!

-If you were in the States you would be acting like: "Yes Madam", "Sorry Sir", "Sure Sir", I just cannot understand why can't you people do the same here?!!!

سؤال محيّرني -1

2009-05-28T19:30:00.003+03:00

قبل شوي جدي لأمي سألني:
-ما دامك هون؛ ليش ما خليتي المرة تيجي تشوفك؟ أنا مش فاهم انتي بدك تتجوزي ولا بدك تصيري راهبه؟!!!
-لا لا يا جدي شو راهبه ما راهبه!!! طبعا لأ!!!

بصراحة طول عمرها هالفكرة مخوفيتني؛ شو راهبه؟!!! طيب ليش لكان أنا بعمل هيك؟!!!

الواقع أني...

2009-05-27T02:12:00.001+03:00

كذبت على حالي كتير والوضع صار "أوفر"....
وحتى هادول الكلمتين اللي كتبتهم هون حاسه حالي بكذب فيهم كمان على حالي....

والمدونة أسخم وأسخم كمان!!!
هاي الكذبه الكبرى!!!

مش العرسان أهاليهم!!! – الحلقة الثـانية

2009-05-22T01:07:00.003+03:00

عن أبو زنوبة نتحدث اليوم

ووالدة أبو زنوبة هي بطلة القصة

نهاية يوم ربيعي رائق؛ عائدة من دوام الماجستير في الجامعة، اقتربت من باب المنزل فطالعني وجه غريب لامرأة غريبة لا أعرفها تقف على باب "بكم صغير" (سيارة نصف نقل) تحدّث جدتي فيما يبرز رجل كهل يحمل على ظهره حزمة أغصان من الجهة الثانية

كنت منشرحة (منشكحة يعني)؛ فألقيت السلام على المرأة الجميلة الطويلة البيضاء البشرة والتي ترتدي دشداشا بنيا وعلى جدتي ودخلت

في نفس اليوم أخذت جدتي تحدثني:

-شايفه المره اللي كنت بحكي معها اليوم لما مريتي؟

-مالها ؟ (قلبي وغوشني طبعا)

-بتسألني بتحكي لي : مين هاي يا حجه؟ (لما مريت طبعا)

-هاي بنت ابني

-ما شالله الله يخليها؛ ما بتجوزوهاش يا حجه؟ (هاي نتيجة تكوني محترمة وتسلمي عالعالم!!!)

-يعني عندك ابن يا حجه؟ (هاي جدتي)

-آه عندي

-و شو بيشتغل ما شالله؟

-عسكري!!!!

-ايوه هاظ اللي ناقص؟ وشو رديتي؟

-قلتلها يا حجه: لو بدنا نجوزها لعسكري زمان جوزناها (جواب دبلوماسي وذكي طبعا واللبيب بيفهم المفروض)

مرت أيام؛ وذات مساء ربيعي- صيفي رائق؛ وفيما أنا أجاهد لأفهم أقصر مسافة تفصل بين البلورات على ركني مكعب وذلك في مادة الحسابات المتوازية؛ دخل أخي فجأة إلى الغرفة-وهو غير بطل القصة السابقة- وهو يقول:

-اعملي شاي

-لمين؟!!

-مش عارف ناس

الشاي لما ينطلب مني ويكون في عريس بحس مباشره!!

-ولك شو في؟

-ما بعرف!!!

جاءت عمتي لتقول لي:

-هاظول خطاب؛ هاي المرة اللي تاعت (....) (القرية التي تنتمي إليها المرأة)

-أيوه هاظ اللي ناقص!!!

نظرت من النافذة نظرة خاطفة فرأيتها-كانوا جلوسا تحت الدالية؛ ورأيت معها زوجها وشابا غريبا (قدرت أنه العريس لابد)

أعددت الشاي؛ وسلمته لأخي ليقوم بواجب الضيافة؛ وأوصيته أن "يتطقّس" (يعني ينتبه ويستكشف جيدا) عن الوضع

بعد فترة جاء أخي؛ كان منفجرا في الضحك؛ حتى أني تعبت في محاولة إقناعه أن يكف عن الضحك ويلتفت إلي ليخبرني ماذا جرى

-اسمعي عليّ

-أيوه قول خلّصني

-قال شو؛ هم كاينين بيزورو ابن عمهم في مستشفى (...) ؛ ابن عمهم قص اصبعه بماكينة لأنه بيشتغل في المدينة الصناعية؛ وخطر لهم قال يعملولنا زيارة

-آه طبعا؛ مستفقدينا على غفلة كالعاده!!!

-طيب والشب؟

-ماله الشب؟

-ولك ماله يعني؟

-الشب ياختي لابس تيشرت أبيض (مش عارفه ليه اتخيلته لابس تحت التيشرت فانلة عليها اعلان كوكا كولا) وشكلو داب عالجيش ما بعرف الدفاع المدني ومن عمره 16 سنه؛ بتعرفي هاي ألأشكال كيف بيكونو و..

-ولك شو ما تكمل؟

-ولابس حفاية باصبع

-كيف يعني؟

-يعني شكلها زنوبة!!!!

روحوا الجماعة؛ وجاءت جدتي؛ لم تضف جديدا على قصة أخي غير أن أم العريس كانت "بتتفلت" بدها تفوت عالبيت؛ وجدتي لم تعطها فرصة؛ ولما لم تستطع بدأت تلمح إلى كونها "حابة تشوفني" ؛ فجاوبتها جدتي:

-عليها امتحان يا حجة!!!

ثم قالت جدتي أنها بما معناه حاولت أن توصل لهم في لطافة أنه لا مجال للموافقة وما في نصيب؛ الأم لم تقصر في وصف بيت ابنها "الحجر" اللي معمره فوق بيت أهله؛ وبيت العريس "داقر للباب" (يعني ممتلئ من الإبرة إلى الصاروخ) ؛ وضحت جدتي أنه لا يوجد تكافؤ علمي بين الطرفين فهب الأب منفعلا و مدافعا:

-يعني الدكتور يا حجة مش رح يكون أحسن من ابني؛ ابني اذا انظامت البنت (ظلمت) ما رح يسكت!!! (مين حكى عن الظلم مش عارفة!!!)

جاء أخي (بطل القصة السابقة)؛ قلت له ما جرى فضحك من قلبه؛ ثم قال لي:

-لاااااااااااااااااا!!!! هاي لازم تحطيها بالسي في (CV) تاعتك جد!!! مش عارف من وين بتجيبي هالأشكال؟!! (الله يسامحك يا خوي!!)

راحت القصة مجددا ولم تكن هذه آخر حلقة!!!

في يوم رمضاني؛ -وكانت جدتي قد ذهبت إلى العمرة في العشر الأوائل- صحوت صباحا بعين نصف مغمضة على شخص ما يطرق الباب-فتحت الباب وإذا بفتاة صغيرة تقول لي:

-أمي بدها ياكو

نظرت لأرى من أمها التي "بدها يانا"؛ كانت مؤخرة البكم البيج تواجهني: وفيما فتح الباب فجأة نظرت جيدا فرأيت قدما نتنعل حذاء تنزل من البكم؛ ثم نزلت المرأة بكاملها (لا أعرف لماذا خطر لي وقتها أن الموقف يشبه الأفلام الأجنبية حين ينزل شخص مهم جدا من السيارة السوداء) عرفتها طبعا!!!

قالت لي:

-وين الحجه؟

-بالعمره

-آه صار لها زمان؟

-يعني كم يوم

-طيب بدي أسألك: أرضكو اللي فوق؛ ضمنتوها إشي (من الضمان)

-والله ما بعرف يمكن؛ بس تيجي الحجه إسأليها ( في بالي: ما انتي أكيد عارفه انها مضمنه؛ ليش جايه؟!!)

المرأة كانت تعمل- تقريبا – متعهدة أراضي؛ بمعنى تتضمن أرضا للزراعة وهي مهنة معروفة في القرى

عادت جدتي من العمرة وأخبرتها بالقصة فردت بما معناه: هاي حجة هي عارفة انو ما عنا أرض للضمان!!!

بعد سنة تذكرت القصة؛ سألت جدتي:

-شو أخبار متعهدة الأراضي؟

-آه أنا ما قولتلك؟

-شو؟

-مش الزلمه جوزها مرّ علي من كم يوم!!

-بالله شو بدو؟

-ولا شي؛ كاين شايف أبوكي بالصيف؛ وحاكي معاه عليكي؛ أبوكي حاكيلو بتركلك خبر عند أخوي أبو فلان بالمحل – توفي عمي الصيف الماضي رحمه الله

-طيب؟؟

-بيحكي لي رحت عالمحل وسألت ابو فلان

-شو قللك؟

-ولا شي بيقول ابو البنت ما ترك لك خبر عندي عن شي

-لكان خلاص ما ترك ما ترك؛ لشو جاي تسألني؟!!

-وأنا وين كاينه؟

-ما حدا حب يظايقك والقصه صارت بسرعه

-آآآآآآآآآآآآه طيب!!!

ومنذ فترة قالت لي جدتي:

-بتتذكري فلانه-الأم؟!

-آه المتعهدة؟ مالها ؟!!

-شفتها هذيك المره وسألتني عنك

-طيّب؟

-بقولها لسا ما إجى نصيبك بتحكي لي والله البنت بعدها مش طالعه من نفسي!!

أيواااااااااااااااااااااااااااااااااااااااا؛ طيب المره الجايه لما تشوفيها قوليلها تطلّعني من نفسها رجاء؛ بدي أتجوّز!!!!

الحلقة الأولى

الحلقة القادمة: أخوي الدكتور

2009-05-20T16:53:00.000+03:00

زهقت!!!